{"asset":"news","key":"10037","locale":"km","id":"news:10037:km","entityId":"news:10037","canonicalUrl":"https://www.kps-tv.com/km/news/detail/10037","state":"ready","title":"ទុនជាង ១០លានដុល្លារ៖ ក្រុមហ៊ុន ដ្រាខូខេម ស្នើសុំជួលដីរដ្ឋ ៥០ឆ្នាំ ពីរដ្ឋបាលខេត្តព្រះសីហនុ បង្កើតរោងចក្រកែច្នៃកាកសំណល់រឹងនៅក្រុងកំពង់សោម","summary":"ខេត្តព្រះសីហនុ៖ ឯកឧត្តម ម៉ាង ស៊ីណេត អភិបាលនៃគណៈអភិបាលខេត្តព្រះសីហនុ បានដឹកនាំកិច្ចប្រជុំពិនិត្យ និងពិភាក្សាលើសំណើសុំជួលដីរដ្ឋទំហំ ១០ហិកតា រយៈពេល ៥០ឆ្នាំ របស់ក្រុមហ៊ុន ដ្រាខូខេម ឌិវេឡុបម៉ិន ឯ. ក (Dracocam Development Co., Ltd.)","body":"ខេត្តព្រះសីហនុ៖ ឯកឧត្តម ម៉ាង ស៊ីណេត អភិបាលនៃគណៈអភិបាលខេត្តព្រះសីហនុ បានដឹកនាំកិច្ចប្រជុំពិនិត្យ និងពិភាក្សាលើសំណើសុំជួលដីរដ្ឋទំហំ ១០ហិកតា រយៈពេល ៥០ឆ្នាំ របស់ក្រុមហ៊ុន ដ្រាខូខេម ឌិវេឡុបម៉ិន ឯ.ក (Dracocam Development Co., Ltd.) ក្នុងទំហំទុនវិនិយោគជាង ១០លានដុល្លារអាម៉េរិក លើគម្រោងកែច្នៃកាកសំណល់រឹង (សំរាម) នៅទីលានចាក់សំរាម ស្ថិតក្នុងភូមិអូតាសេក សង្កាត់អូរឧកញ៉ាហេង ក្រុងកំពង់សោម ខេត្តព្រះសីហនុ។ កិច្ចប្រជុំនេះ មានការអញ្ជើញចូលរួមពីលោកអភិបាលរងខេត្ត មន្ត្រីជំនាញនៃមន្ទីរ-អង្គភាពពាក់ព័ន្ធ និងតំណាងក្រុមហ៊ុនវិនិយោគនារសៀលថ្ងៃទី១៦ ខែតុលា ឆ្នាំ២០២៦ ។\n\n ក្នុងឱកាសនោះ លោក ឡុង ឌីម៉ង់ អភិបាលរងខេត្តព្រះសីហនុ បានធ្វើរបាយការណ៍ជម្រាបជូនអង្គប្រជុំថា កន្លងមកគម្រោងស្នើសុំជួលដីរដ្ឋសម្រាប់កែច្នៃសំរាមរយៈពេលវែងនេះ ត្រូវបានរៀបចំកិច្ចប្រជុំពិភាក្សាចំនួន ៤លើករួចមកហើយ។ ក្រុមហ៊ុនបានរៀបចំផែនការស្របតាមស្តង់ដារបច្ចេកទេស ធានាបាននូវអនាម័យ និងបរិស្ថានយ៉ាងត្រឹមត្រូវ ហើយនៅថ្ងៃនេះ ក្រុមការងារបានដាក់ជូនឯកឧត្តមអភិបាលខេត្ត ដើម្បីពិនិត្យ កែតម្រូវ និងបំពេញបន្ថែមនូវចំណុចខ្វះខាតមួយចំនួន។\n\n ចំណែកតំណាងក្រុមហ៊ុន ដ្រាខូខេម ឌិវេឡុបម៉ិន ឯ.ក បានបញ្ជាក់អំពីការប្តេជ្ញាចិត្ត និងជំហរច្បាស់លាស់ ដោយក្រុមហ៊ុនមានដើមទុនគ្រប់គ្រាន់ ព្រមទាំងមានបច្ចេកវិទ្យាទំនើប និងបទពិសោធន៍ជាក់ស្តែងក្នុងការគ្រប់គ្រង និងកែច្នៃកាកសំណល់ ដែលធ្លាប់បានអនុវត្តជោគជ័យនៅតាមបណ្តាប្រទេសមួយចំនួនរួចមកហើយ។\n\n មានប្រសាសន៍ក្នុងកិច្ចប្រជុំ ឯកឧត្តម ម៉ាង ស៊ីណេត អភិបាលខេត្តព្រះសីហនុ បានសម្តែងការគាំទ្រចំពោះគម្រោងវិនិយោគរបស់ក្រុមហ៊ុន ក្នុងការកែច្នៃសំរាមឱ្យក្លាយជាប្រយោជន៍ និងកាត់បន្ថយផលប៉ះពាល់បរិស្ថានក្នុងមូលដ្ឋាន។ ទន្ទឹមនឹងនេះ ឯកឧត្តមអភិបាលខេត្ត ក៏បានណែនាំដល់មន្ត្រីជំនាញពាក់ព័ន្ធ ត្រូវបន្តជួបពិភាក្សាការងារបច្ចេកទេសជាមួយតំណាងក្រុមហ៊ុនឱ្យបានលម្អិត និងច្បាស់លាស់បន្ថែមទៀតលើចំណុចដែលក្រុមហ៊ុនបានស្នើមកអាជ្ញាធរ ដើម្បីធានាឱ្យដំណើរការអនុវត្តគម្រោងប្រព្រឹត្តទៅដោយរលូន ស្របច្បាប់ រវាងក្រុមហ៊ុន ជាមួយក្រុមការងារបច្ចេកទេសគ្រប់គ្រងទីលានចាក់សំរាម៕\n អត្ថបទ៖ ប៉ៃ សុឃីម\n រូបភាព៖ កែវ ដារ៉ា","contentScope":"full","proof":{"publishedSourceRevision":"2","publishedWorkingVersionId":"12002","languageVersionId":"4151","visibilityVersion":"5","versionToken":"a1.PdeJzNVNEwRj-I1eWdUhMMM18nzPa8SqzoNBVPduw8w"},"availableLocales":["zh","en","km"],"attributes":{"sourceLocale":"km","translationKind":"original","nodeId":"12","authorText":"","sourceName":""},"references":[],"links":[],"publishedAt":"2026-10-16T10:31:39Z"}