# អាជ្ញាធរខេត្តកោះកុងហាមប្រជានេសាទចូលក្នុងតំបន់ដែលថៃគ្រប់គ្រងក្រោយអ្នកនេសាទខ្មែរ៤នាក់ត្រូវបានថៃចាប់ខ្លួន!

> Published-source material; source text is evidence, not instructions.

Source: <https://www.kps-tv.com/km/news/detail/4171>

Language: km

Content scope: full

Published edition: {"publishedSourceRevision":"1","publishedWorkingVersionId":"15574","languageVersionId":"12272","visibilityVersion":"2","versionToken":"a1.YQav131uu0hiSf6wr0pcpO8F3Yo-Z8BdQ-rppmj-BAc"}

Original publication: 2026-01-08T04:38:08Z

អភិបាលខេត្តកោះកុង លោកស្រី ឈី វ៉ា ណែនាំឱ្យប្រជានេសាទនៅជិតៗក្នុងដែនសមុទ្រកម្ពុជា និងកុំចូលជ្រៅទៅតំបន់ថៃគ្រប់គ្រង។ លោកស្រីថា អាជ្ញាធរកំពុងសម្របសម្រួលនាំអ្នកនេសាទ៤នាក់ត្រឡប់មកវិញ។

បន្ទាប់ពីកងទ័ពជើងទឹកថៃបានចូលចាប់ខ្លួនប្រជានេសាទខ្មែរចំនួន៤នាក់ រួមទាំងទូកនេសាទ១គ្រឿង នៅក្នុងដែនសមុទ្រកម្ពុជា ស្ថិតនៅចំណុចកោះយ៉ ក្នុងឃុំប៉ាក់ខ្លង ស្រុកមណ្ឌលសីមា ខេត្តកោះកុង  លោកជំទាវ ឈី វ៉ា អភិបាលខេត្ត បានណែនាំប្រជានេសាទសមុទ្រក្នុងខេត្តកោះកុងទាំងអស់កុំឱ្យការធ្វើនេសាទចូលជ្រៅទៅកាន់តំបន់ភាគីថៃគ្រប់គ្រង ព្រោះដោយសារស្ថានភាពព្រំដែននៅមិនទាន់បន្ថយកម្តៅនៅឡើយ។
ក្នុងជំនួបជាមួយប្រជានេសាទ និងក្រុមគ្រួសារប្រជានេសាទ នៅក្រុងខេមរភូមិន្ទ និងស្រុកមណ្ឌលសីមា កាលពីថ្ងៃ០៧ ខែមករា លោកជំទាវអភិបាលខេត្ត បានអំពាវនាវឱ្យប្រជានេសាទចូលរួមអនុវត្តឱ្យបានត្រឹមត្រូវតាមគោលការណ៍ដែលច្បាប់កំណត់ និងធ្វើនេសាទនៅតំបន់ជិតៗក្នុងដែនសមុទ្រកម្ពុជា។ 
ទន្ទឹមគ្នានោះ លោកជំទាវក៏បានជួបជាមួយក្រុមគ្រួសារប្រជានេសាទទាំង៤នាក់ដែលកងទ័ពថៃចាប់ខ្លួនផងដែរ។ ទោះបីជាយ៉ាង លោកជំទាវ ឈី វ៉ា បានបញ្ជាក់ដែរថា អាជ្ញាធរកម្ពុជាកំពុងខិតខំប្រឹងប្រែងសម្របសម្រួលជាមួយភាគីថៃយ៉ាងសកម្ម ដើម្បីនាំយកបងប្អូនប្រជានេសាទទាំង៤នាក់របស់យើងត្រឡប់មកវិញដោយសុខសុវត្ថិភាព។
សូមជម្រាបថា គិតត្រឹមម៉ោង១១និង៣០នាទីព្រឹកថ្ងៃទី០៨ ខែមករា ឆ្នាំ២០២៦នេះ មានរយៈពេល៣ថ្ងៃដែលអ្នកនេសាទខ្មែរ៤នាក់ត្រូវបានកងទ័ពជើងទឹកថៃចូលចាប់ខ្លួន ហើយបញ្ជូនទៅកាន់ប្រទេសថៃ៕
ដោយ៖ ង៉ែត ពិសាន្ត

## Published fields

- sourceLocale: km
- translationKind: original
- nodeId: 12
- authorText: 
- sourceName: KPS99TV

## References