{"asset":"news","key":"4254","locale":"km","id":"news:4254:km","entityId":"news:4254","canonicalUrl":"https://www.kps-tv.com/km/news/detail/4254","state":"ready","title":"សភាពាណិជ្ជកម្មកម្ពុជា នាំយកអំណោយប្រគល់ជូនសមាគមសិល្បករខ្មែរ ដើម្បីយកចែកជូនគ្រួសារវីរកងទ័ពនិងពលរដ្ឋភៀសសឹក២ពាន់គ្រួសារ","summary":"សភាពាណិជ្ជកម្មកម្ពុជាបានប្រគល់អំណោយរបស់មូលនិធិជូនសមាគមសិល្បករខ្មែរ កាលពីថ្ងៃទី១១ ខែមករា ដើម្បីត្រៀមចែកជូនដោយផ្ទាល់ដល់គ្រួសារកងទ័ព និងពលរដ្ឋភៀសសឹកសរុប២ពាន់គ្រួសារ នៅខេត្តសៀមរាប។","body":"សភាពាណិជ្ជកម្មកម្ពុជា បាននាំយកអំណោយសប្បុរសធម៌របស់មូលនិធិសភាពាណិជ្ជកម្មកម្ពុជា ដែលមានគ្រឿងឧបភោគបរិភោគ និងសម្ភារៈប្រើប្រាស់ផ្សេងៗ មកប្រគល់ជូនសមាគមសិល្បករខ្មែរ កាលពីថ្ងៃទី ១១ខែមករា ឆ្នាំ២០២៦  ដើម្បីយកទៅចែកជូនប្រជាពលរដ្ឋភៀសសឹក និងគ្រួសារវីរកងទ័ពចំនួន ២ពាន់គ្រួសារ ដោយផ្ទាល់ នៅខេត្តសៀមរាប។\nអំណោយទាំងនេះអ្នកឧកញ៉ា ឡាវ កាង អនុប្រធានសភាពាណិជ្ជកម្មកម្ពុជា តំណាងដ៏ខ្ពង់ខ្ពស់អ្នកឧកញ៉ា គិត ម៉េង ប្រធានសភាពាណិជ្ជកម្មកម្ពុជា និងលោកជំទាវអ្នកឧកញ៉ា ម៉ៅ ចំណាន គិតម៉េង ប្រធានសមាគមសិល្បករខ្មែរ ដោយមានការអញ្ជើញចូលរួមពីថ្នាក់ដឹកនាំ សមាជិក-សមាជិកានៃសភាពាណិជ្ជកម្មកម្ពុជា និងសិល្បករខ្មែរជាច្រើនរូបផងដែរ ចំពោះពិធីប្រគល់-ទទួលអំណោយ បានធ្វើឡើងនៅសមាគមសិល្បករខ្មែរ ។\nក្នុងឱកាសនោះ អ្នកឧកញ៉ា ឡាវ កាង ក្នុងនាមអ្នកឧកញ៉ា គិត ម៉េង ប្រធានសភាពាណិជ្ជកម្មកម្ពុជា បានថ្លែងអំណរគុណយ៉ាងជ្រាលជ្រៅចំពោះ សប្បុរសជនទាំងអស់ ដែលបានចូលរួមបរិច្ចាគថវិកា និងសម្ភារៈប្រើប្រាស់ចំាបាច់ផ្សេងៗ ជាមួយមូលនិធិសភាពាណិជ្ជកម្មកម្ពុជា ក៏ដូចជា សមាជិក សមាជិការសភាពាណិជ្ជកម្មកម្ពុជា សិល្បករខ្មែរ និងសាធារណជន ដែលបានចំណាយទាំងកម្លាំងកាយ និងកម្លាំងចិត្ត ចូលរួមយ៉ាងសកម្មក្នុងការជួយវេចខ្ចប់ និងលើកដាក់គ្រឿងឧបភោគបរិភោគ និងសម្ភារៈផ្សេងៗ សម្រាប់យកចែកជូនប្រជាពលរដ្ឋជនភៀសសឹក និងគ្រួសារវីរកងទ័ព។\nអ្នកឧកញ៉ា បានចាត់ទុកថា កាយវិកាដ៏ថ្លៃថ្លានេះស្តែងឱ្យឃើញនូវទឹកចិត្តដ៏ល្អប្រពៃ ក្នុងបុព្វហេតុមនុស្សធម៌ ប្រកបដោយស្មារតីស្នេហាជាតិ ហើយក៏បានបង្ហាញពីស្មារតីសាមគ្គីភាព ជាធ្លុងមួយរបស់មហាគ្រួសារខ្មែរ ដើម្បីចូលរួមគាំទ្រ និងលើកទឹកចិត្តដល់វីរកងទ័ពកម្ពុជា ដែលបាននិងកំពុងការពារបូរណភាពទឹកដីយ៉ាងអង់អាចក្លាហាន ក៏ដូចជា ការចូលរួមចំណែកបន្ធូរបន្ថយការលំបាករបស់ប្រជាជនភៀសសឹកមួយចំនួន ដែលមិនទាន់អាចវិលទៅកាន់គេហដ្ឋានរបស់ខ្លួនវិញបាន បើទោះបីជាស្ថានភាពព្រំដែនកម្ពុជា-ថៃ នាពេលនេះ មានភាពស្ងប់ស្ងាត់ លើបទឈប់បាញ់មកក៏ដោយ។\nបើតាមលោកជំទាវឧកញ៉ា នួន ពេជ្រសុផល អគ្គនាយករងជាន់ខ្ពស់ និងជាជំនួយការផ្ទាល់អ្នកឧកញ៉ា គិត ម៉េង ប្រធានសភាពាណិជ្ជកម្មកម្ពុជា មានប្រសាសន៍ថា ក្រុមការងារមូលនិធិសភាពាណិជ្ជកម្មកម្ពុជា បានមកជួយសមាគមសិល្បករខ្មែរ រៀបចំលើកដាក់គ្រឿងឧបភោគបរិភោគ និងសម្ភារៈប្រើប្រាស់ចាំបាច់ផ្សេងៗ ដែលជាអំណោយសប្បុរសធម៌របស់មហាគ្រួ សារសភាពាណិជ្ជកម្មកម្ពុជា និងសប្បុរសជន បានបរិច្ចាគជូនមូលនិធិសភាពាណិជ្ជកម្មកម្ពុជា ដើម្បីត្រៀមយកចែកជូនភៀសសឹកនៅខេត្តសៀមរាប។\nសូមរំលឹកថា អ្នកឧកញ៉ា គិត ម៉េង ប្រធានសភាពាណិជ្ជកម្មកម្ពុជា បានសម្រេចបង្កើតមូលនិធិសភាពាណិជ្ជកម្មកម្ពុជា ដើម្បីទទួលនូវអំណោយចំបាច់ផ្សេងៗ ពីសប្បុរសជន ដើម្បីរួមកម្លាំងខ្មែរតែមួយ ក្នុងការជួយដល់វីរកងទ័ពកម្ពុជា និងប្រជាពលរដ្ឋភៀសសឹក ដែលត្រូវបានជម្លៀសមកកាន់មណ្ឌលសុវត្ថិភាពនានា៕\nដោយ៖ ប៉ៃ សុឃីម","contentScope":"full","proof":{"publishedSourceRevision":"1","publishedWorkingVersionId":"15555","languageVersionId":"12215","visibilityVersion":"2","versionToken":"a1.Gd5-UxUC3QyrBjArOlmorJEWEM-XwO-UetlXHfVuUWY"},"availableLocales":["zh","en","km"],"attributes":{"sourceLocale":"km","translationKind":"original","nodeId":"12","authorText":"","sourceName":"KPS99TV"},"references":[],"links":[],"publishedAt":"2026-01-12T03:02:13Z"}