{"asset":"news","key":"4301","locale":"km","id":"news:4301:km","entityId":"news:4301","canonicalUrl":"https://www.kps-tv.com/km/news/detail/4301","state":"ready","title":"ស្ថាប័នជំនាញក្រើនរំលឹកសាធារណជនប្រយ័ត្នចាញ់បោកកម្ចីអនឡាញ","summary":"នាយកដ្ឋានប្រឆាំងបទល្មើសបច្ចេកវិទ្យាព្រមានពីកម្ចីអនឡាញដែលទាមទារឯកសារ និងថ្លៃរដ្ឋបាលជាបន្តបន្ទាប់ ប៉ុន្តែមិនផ្តល់ប្រាក់កម្ចី ហើយអាចយកឯកសារ និងរូបថតទៅគំរាមនិងបរិហារកេរ្តិ៍។","body":"នាយកដ្ឋានប្រឆាំងបទល្មើសបច្ចេកវិទ្យា បានក្រើនរំលឹកសាធារណជនឱ្យប្រុងប្រយ័ត្នការឆបោកកម្ចីអនឡាញ មុននឹងខ្ចីប្រាក់តាមអនឡាញត្រូវពិចារណាឱ្យបានហ្មត់ចត់ បន្ទាប់ពីមានជនរងគ្រោះចាញ់បោកកម្ចីអនឡាញឈ្មោះ \"ម៉ាដាម អត្រាកម្ចីប្រាក់\" ដោយមិនបានឱ្យប្រាក់កម្ចីដល់ជនរងគ្រោះ ថែមទាំងយកឯកសាររបស់ជនរងគ្រោះមកគំរាម និងយករូបថតមិត្តភក្កិ បងប្អូនជនរងគ្រោះយកទៅបង្ហោះបរិហារកេរ្តិ៍ទៀតផង។\nបើតាមនាយកដ្ឋានប្រឆាំងបទល្មើសបច្ចេកវិទ្យា បានឱ្យដឹងនៅថ្ងៃទី១៤ ខែមករានេះថា ថ្មីៗនេះឃើញមានការបង្ហោះផ្សព្វផ្សាយពាក់ព័ន្ធនិងការឆបោកកម្ចីអនឡាញ ក្រោមទំព័រហ្វេសប៊ុកឈ្មោះ \"ម៉ាដាម កម្ចី\" បានបង្ហោះផ្សព្វផ្សាយផ្តល់ប្រាក់កម្ចីអនឡាញ។ ក្នុងនោះ នាយកដ្ឋាន បានពន្យល់ដូច្នេះថា នៅពេលដែលអ្នកប្រើប្រាស់បណ្តាញទំនាក់ទំនងសង្គមចាប់អារម្មណ៍ និងទាក់ទងទៅតាមរយៈគណនីហ្វេសប៊ុក (Messenger) ពេលនោះគេតម្រូវឱ្យពួកគាត់ទាក់ទងទៅគណនីតេឡេក្រាមឈ្មោះ \"ម៉ាដាម អត្រាកម្ចីប្រាក់\" ភ្ជាប់នឹងលេខ 011 940 695។ ក្រោយពួកគាត់ជជែកព្រមព្រៀងតាមតម្លៃស្នើប្រាក់កម្ចីរួចហើយ ជនអនាមិកក៏បានឱ្យពួកគាត់ ថតផ្ញើឯកសារមួយចំនួនមានដូចជា៖ អត្តសញ្ញាណប័ណ្ណ សៀវភៅគ្រួសារ សៀវភៅស្នាក់នៅ ថតរូបកាន់អត្តសញ្ញាណប័ណ្ណ ថតរូបកន្លែងធ្វើការជាដើម។ បន្ទាប់មកជនអនាមិកក៏បានផ្ញើ QR Code មកឱ្យពួកគាត់ស្កេន QR Code ដើម្បីវេរលុយជាថ្លៃរត់ឯកសារ ឬថ្លៃរដ្ឋបាលជាដើម។\nនាយកដ្ឋានជំនាញ បានបន្ថែមថា ក្រោយពីទទួលបានប្រាក់ ជនអនាមិកនោះនៅតែបន្តឱ្យវេរលុយជាបន្តបន្ទាប់រហូតផ្តាច់ទំនាក់ទំនងជាមួយជនរងគ្រោះ និងបានលុបសារទាំងអស់ចោល ដោយជនអនាមិកមិនបានឱ្យប្រាក់កម្ចីដល់ជនរងគ្រោះនោះឡើយ ថែមទាំងអាចយកឯកសារដែលជនរងគ្រោះបានផ្ញើឱ្យ មកធ្វើការគំរាម និងយករូបថតមិត្តភក្កិ បងប្អូន របស់ជនរងគ្រោះនៅក្នុងប្រព័ន្ធសង្គមហ្វេសប៊ុកយកទៅបង្ហោះ បរិហារកេរ្តិ៍ ពាក់ព័ន្ធនឹងការធានាកម្ចីនេះទៀតផង។\nនាយកដ្ឋានប្រឆាំងបទល្មើសបច្ចេកវិទ្យា បានក្រើនរំលឹកដល់សាធារណជនមេត្តាពិនិត្យ ពិចារណាឱ្យបានហ្មត់ចត់ មុនសម្រេចចិត្តក្នុងការខ្ចីប្រាក់តាមរយៈអនឡាញ ជាពិសេសសូមពិនិត្យថា តើអ្នកផ្តល់កម្ចីនោះមានស្ថាប័នកម្ចីស្របច្បាប់ដែរឬទេ? មុននឹងសម្រេចចិត្តក្នុងការខ្ចី ជៀសវាងទទួលនូវហនិភ័យនានានៅពេលក្រោយ៕\nដោយ៖ ង៉ែត ពិសាន្ត","contentScope":"full","proof":{"publishedSourceRevision":"1","publishedWorkingVersionId":"15484","languageVersionId":"12002","visibilityVersion":"2","versionToken":"a1.LgP9e41XG41aC1OXE_xiY09jNozEA0bX8b5PuZbFOuE"},"availableLocales":["zh","en","km"],"attributes":{"sourceLocale":"km","translationKind":"original","nodeId":"12","authorText":"","sourceName":"KPS99TV"},"references":[],"links":[],"publishedAt":"2026-01-14T06:47:07Z"}