{"asset":"news","key":"4457","locale":"km","id":"news:4457:km","entityId":"news:4457","canonicalUrl":"https://www.kps-tv.com/km/news/detail/4457","state":"ready","title":"ថៃកសាងព្រះពុទ្ធប្បដិមានៅទីតាំងរូបព្រះវិស្ណុដែលបានបំផ្លាញនៅតំបន់អានសេះខណៈកម្ពុជាតវ៉ា!","summary":"ក្រសួងធម្មការ និងសាសនាតវ៉ាចំពោះការកសាងព្រះពុទ្ធប្បដិមា នៅទីតាំងរូបព្រះវិស្ណុដែលត្រូវបានបំផ្លាញនៅអានសេះ ដោយលើកឡើងពីអធិបតេយ្យភាព និងកិច្ចព្រមព្រៀងដែលមានស្រាប់។","body":"ក្រសួងធម្មការ និងសាសនា នៅថ្ងៃទី២២ ខែមករា ឆ្នាំ២០២៦ បានចេញសេចក្តីថ្លែងការណ៍តវ៉ាប្រឆាំងជំទាស់ចំពោះសកម្មភាពរំលោភបំពានរបស់យោធាថៃដែលបានកសាងព្រះពុទ្ធប្បដិមានៅចំទីតាំងរូបសំណាក បដិមាព្រះវិស្ណុដែលត្រូវបានបំផ្លាញ នៅភូមិអានសេះ ឃុំជាំក្សាន្ត ស្រុកជាំក្សាន្ត ខេត្តព្រះវិហារ។\nសេចក្តីថ្លែងការណ៍តវ៉ាប្រឆាំងចំពោះសកម្មភាពរបស់យោធាថៃដែលបានតម្កល់ព្រះពុទ្ធប្បដិមារំលោភបំពានលើដែនអធិបតេយ្យភាពរបស់កម្ពុជា ធ្វើឡើងបន្តពីសេចក្តីប្រកាសព័ត៌មានរបស់ក្រសួងការបរទេសនិងសហប្រតិបត្តិការអន្តរជាតិ ចុះថ្ងៃទី២១ ខែមករា ឆ្នាំ២០២៦ ស្តីពីការតវ៉ាប្រឆាំងចំពោះសកម្មភាពរបស់កងកម្លាំងប្រដាប់អាវុធថៃក្នុងតំបន់ដែលបានកាន់កាប់។\nក្រសួងធម្មការ បានលើកឡើងថា ការតម្កល់រូបសំណាកព្រះពុទ្ធប្បដិមានៅលើទីតាំងរូបសំណាក បដិមាព្រះវិស្ណុ ដែលត្រូវបានបំផ្លាញដោយយោធាថៃ នៅតំបន់អានសេះ ខេត្តព្រះវិហារ គឺជាការរំលោភបំពានមកលើ ដែនអធិបតេយ្យភាពកម្ពុជា ផ្ទុយទៅនឹងគោលការណ៍ជាមូលដ្ឋាននៃច្បាប់អន្តរជាតិ ដែលហាមឃាត់ការកាន់កាប់ យកទឹកដីដោយប្រើប្រាស់កម្លាំង និងផ្ទុយស្រឡះទៅនឹងការប្ដេជ្ញាចិត្តរបស់ថៃ ក្នុងការដោះស្រាយវិវាទដោយសន្តិវិធី ក្រោមកិច្ចព្រមព្រៀងបទឈប់បាញ់ នាថ្ងៃទី២៨ ខែកក្កដា ឆ្នាំ២០២៥ កំណត់ហេតុនៃកិច្ចប្រជុំគណៈកម្មាធិការព្រំដែនទូទៅ នាពេលកន្លងមក សេចក្ដីថ្លែងការណ៍រួមស្ដីពីសន្តិភាពនិងដំណោះស្រាយវិវាទដោយសន្តិវិធី ចុះថ្ងៃទី២៦ ខែតុលា ឆ្នាំ២០២៥ និងសេចក្តីប្រកាសរួមនៃកិច្ចប្រជុំពិសេសរបស់គណៈកម្មាធិការព្រំដែនទូទៅ នៅថ្ងៃទី២៧ ខែធ្នូ ឆ្នាំ២០២៥ ដែលបញ្ជាក់ជារួមអំពីកាតព្វកិច្ចរបស់ភាគីទាំងពីរ ក្នុងការមិនអនុវត្តវិធានការជាឯកតោភាគី។\nដូច្នេះ ក្រសួងធម្មការ បានពន្យល់ថា៖ «សូមឱ្យយោធាថៃចូលរួមគោរពដោយស្មោះត្រង់ចំពោះលក្ខខណ្ឌនិងស្មារតីនៃកិច្ចព្រមព្រៀង គោរពច្បាប់អន្តរជាតិ និងកាតព្វកិច្ចរបស់ខ្លួនក្រោមសន្ធិសញ្ញានិងកិច្ចព្រមព្រៀងដែលមានស្រាប់»៕\nដោយ៖ ង៉ែត ពិសាន្ត","contentScope":"full","proof":{"publishedSourceRevision":"1","publishedWorkingVersionId":"15364","languageVersionId":"11669","visibilityVersion":"2","versionToken":"a1.ZdWAQw2rnGpWKNZ1beCNJzEt-LGIzKYM0ogZUM_yf7E"},"availableLocales":["zh","en","km"],"attributes":{"sourceLocale":"km","translationKind":"original","nodeId":"12","authorText":"","sourceName":"KPS99TV"},"references":[],"links":[],"publishedAt":"2026-01-22T10:03:17Z"}