# សំរាមកើនជាង១ពាន់តោនក្នុង១ថ្ងៃ!ក្រុងព្រះសីហនុបំពាក់កាម៉េរ៉ាឃ្លាំមើលអ្នកចោលសំរាមផ្តេសផ្តាស

> Published-source material; source text is evidence, not instructions.

Source: <https://www.kps-tv.com/km/news/detail/4505>

Language: km

Content scope: full

Published edition: {"publishedSourceRevision":"1","publishedWorkingVersionId":"15239","languageVersionId":"11471","visibilityVersion":"2","versionToken":"a1.stV2hKtgP0rlCrNnK2CpDN3yyqOJP1Za24O7QJ1EtCk"}

Original publication: 2026-01-25T03:43:30Z

ក្រុងព្រះសីហនុប្រើកាម៉េរ៉ាតាមផ្លូវត្រួតពិនិត្យការចោលសំរាម ខណៈមន្ត្រីថាសំរាមជិត១១០០តោនក្នុង១ថ្ងៃ និងគ្រោងទីលានបណ្តោះអាសន្នថ្មីឆ្នាំ២០២៦។

ដើម្បីរបៀបរាប់រយ សណ្តាប់ធ្នាប់នៃការទុកដាក់សំរាមឱ្យបានត្រឹមត្រូវ និងអនាម័យល្អ ក្រុងព្រះសីហនុបានបំពាក់កាម៉េរ៉ាតាមដងផ្លូវមួយចំនួនចាំឃ្លាំមើលអ្នកចោលសំរាមផ្តេសផ្តាស ខណៈមន្រ្តីជំនាញលើកឡើងថា បច្ចុប្បន្ន បរិមាណសំរាមនៅខេត្តព្រះសីហនុមានការកើនឡើងជាកំហុគរហូតដល់ជាង៨០០តោនទៅជិត១,១០០តោនក្នុង១ថ្ងៃ ដែលនាំឱ្យទីលានទុកសំរាមគ្មានសមត្ថភាពក្នុងការផ្ទុកសំរាមបន្តទៀតបាន។
មូលហេតុដែលនាំឱ្យសំរាមមានការកើនឡើងជាកំហុគ បើតាមលោក ហ៊ិប សុខាន់ណារ៉ូ នាយកគ្រប់គ្រង់ទីលានទុកដាក់សំរាមរបស់ខេត្តព្រះសីហនុ បានពន្យល់ថា ដោយសារបរិបទថ្មីនាំឱ្យប្រជាពលរដ្ឋទិញទំនិញឬកម្ម៉ង់ម្ហូបអាហារទៅតាមដេលីវ៉ារី (Delivery) ចាប់តាំងពីអំឡុងនៃជំងឺរីករាលដាលកូវីដ-១៩មកម្ល៉េះ។  ដូច្នេះនាំឱ្យសំរាមមានកាតកើនឡើងជាបន្តបន្ទាប់ចាប់ពីពេលនោះមក។
ដើម្បីឆ្លើយតបនឹងបរិមាណសំរាមមានការកើនឡើងជាកំហុគដូច្នេះ នាយកគ្រប់គ្រង់ទីលានទុកដាក់សំរាមរបស់ខេត្តព្រះសីហនុ បានបញ្ជាក់ថា ឆ្នាំ២០២៦នេះ ខេត្តព្រះសីហនុ នឹងរៀបចំទីលានទុកដាក់សំរាមថ្មីបណ្តោះអាសន្នមួយទៀត ហើយក្នុងឆ្នាំ២០២៧ លោកសង្ឃឹមថា ក្រសួងបរិស្ថាននឹងជួយសម្របសម្រួលរៀបចំទីលានទុកដាក់សំរាមថ្មីដែលមានស្តង់ដា និងអនាម័យសម្រាប់ខេត្តព្រះសីហនុ។  បន្ថែមពីនេះ លោកក៏បានផ្ញើសារទៅកាន់ប្រជាពលរដ្ឋទាំងអស់ឱ្យចេះទុកដាក់ និងវែកញែកសំរាមបានត្រឹមត្រូវ ហើយត្រូវកាត់បន្ថយការវេចខ្ចប់។
ទន្ទឹមគ្នានេះ ដើម្បីទប់ស្កាត់ការចោលសំរាមពាសវាលពាសកាលដែលនាំឱ្យបាត់បង់សណ្តាប់ធ្នាប់សាធារណៈ និងសោភណភាពទីក្រុង លោកសរ កក្កដា អភិបាលក្រុងព្រះសីហនុ បានបញ្ជាក់ទៅកាន់អ្នកដែលពូកែចោលសំរាមផ្តេសផ្តាសថា បើមិនចង់ខ្មាសគេទេ ត្រូវចូលរួមទុកដាក់សំរាមឱ្យបានត្រឹមត្រូវ ព្រោះក្រុងព្រះសីហនុបានបំពាក់កាម៉េរ៉ាតាមដងផ្លូវមួយចំនួន ដើម្បីឃ្លាំមើលអ្នកចោលសំរាមពាសវាលពាសកាល។ ប៉ុន្តែ ក្នុងនោះលោកមិនបានបញ្ជាក់លម្អិតអំពីទីតាំងដែលត្រូវបំពាក់កាម៉េរ៉ាមានចំនួនប៉ុន្មានទីតាំងនោះទេ៕
ដោយ៖ ង៉ែត ពិសាន្ត

## Published fields

- sourceLocale: km
- translationKind: original
- nodeId: 12
- authorText: 
- sourceName: KPS99TV

## References