# អាជ្ញាធរទុកពេល៧ថ្ងៃឱ្យអាជីវករលក់ដូរនៅសាលាបឋមសិក្សាស្ទឹងមានជ័យរុះរើតូបចេញ

> Published-source material; source text is evidence, not instructions.

Source: <https://www.kps-tv.com/km/news/detail/4682>

Language: km

Content scope: full

Published edition: {"publishedSourceRevision":"1","publishedWorkingVersionId":"15090","languageVersionId":"11099","visibilityVersion":"2","versionToken":"a1.O_se0GnJKid-mjP6t2ZlB9phmkoKanquI62JTuxnsCw"}

Original publication: 2026-02-03T04:17:25Z

រដ្ឋបាលសង្កាត់ស្ទឹងមានជ័យទី២ទុក៧ថ្ងៃចាប់ពីសេចក្តីជូនដំណឹងថ្ងៃទី២ កុម្ភៈ ឱ្យអាជីវករតាមផ្លូវមុន្នីរ៉េតនិងមុខសាលាបឋមសិក្សាស្ទឹងមានជ័យរុះរើការរំលោភដីចំណីផ្លូវ។

ដើម្បីលុបបំបាត់ការលក់ដូររំលោភលើដីចំណីផ្លូវសាធារណៈ និងចូលរួមអនុវត្តរក្សាបាននូវសោភណ្ឌភាព សណ្តាប់ធ្នាប់សាធារណៈឱ្យទីក្រុងស្អាត និងបង្ការបញ្ហាគ្រោះថ្នាក់ចរាចរណ៍ជាយថាហេតុ អាជ្ញាធរសង្កាត់ស្ទឹងមានជ័យទី២ បានដាក់ចេញវិធានការទុកពេល៧ថ្ងៃឱ្យអាជីវករលក់ដូរនៅតាមបណ្តោយផ្លូវមុន្នីរ៉េត និងនៅមុខសាលាបឋមសិក្សាស្ទឹងមានជ័យរុះរើសំណង់ តូប ស្លាកប៉ាណូ និងសម្ភារៈចេញដោយខ្លួនឯង។
តាមសេចក្តីជូនដំណឹងរបស់រដ្ឋបាលសង្កាត់ស្ទឹងមានជ័យទី២ នៅថ្ងៃទី០២ ខែកុម្ភៈ បានបញ្ជាក់ថា អាជីវករលក់ដូរនៅតាមបណ្តាផ្លូវមុន្នីរ៉េត និងមុខសាលាបឋមសិក្សាស្ទឹងមានជ័យ សូមបញ្ឈប់ការលក់ដូររំលោភដីចំណីផ្លូវសាធារណៈ ពិសេសម្ចាស់ទីតាំងឬម្ចាស់តូបហាមមិនអនុញ្ញាតឱ្យដាក់តាំងលក់ប៉ះពាល់ផ្លូវសាធារណៈឡើយ។ ដូច្នេះសូមអាជីវករធ្វើការរុះរើសំណង់ តូប ស្លាកប៉ាណូ សម្ភារៈ និងទំនិញផ្សេងៗចេញដោយខ្លួនឯងលើដីចំណីផ្លូវសាធារណៈ ដោយទុករយៈពេល៧ថ្ងៃ ចាប់ពីថ្ងៃជូនដំណឹងនេះតទៅ។
រដ្ឋបាលសង្កាត់ស្ទឹងមានជ័យទី២ បញ្ជាក់បន្ថែមថា ក្នុងករណីមិនព្រមអនុវត្តទៅតាមខ្លឹមសារសេចក្តីជូនដំណឹងនេះទេ រដ្ឋបាលសង្កាត់ នឹងចុះចាត់វិធានការរុះរើចេញឱ្យអស់ ដោយពុំទទួលខុសត្រូវរាល់ការខូចខាតបាត់បង់សម្ភារៈដែលមាននៅលើទីតាំងខាងលើនេះឡើយ។
យ៉ាងណា កន្លងទៅ ឯកឧត្តម ឃួង ស្រេង អភិបាលរាជធានីភ្នំពេញ បានណែនាំឱ្យអាជ្ញាធរមូលដ្ឋានខណ្ឌទាំង១៤ និងសង្កាត់ទាំង១០៥ ត្រូវយកចិត្តទុកដាក់រក្សាឱ្យបាននូវសន្តិសុខ សណ្តាប់ធ្នាប់ និងអនាម័យ បរិស្ថានល្អ៕
ដោយ៖ ង៉ែត ពិសាន្ត

## Published fields

- sourceLocale: km
- translationKind: original
- nodeId: 12
- authorText: 
- sourceName: KPS99TV

## References