# កម្ពុជា នឹងកែប្រែសហគមន៍កោះស្រឡៅជាគោលដៅលំហែរបៃតង ដើម្បីទាក់ទាញទេសចរជាតិ និងអន្តរជាតិ

> Published-source material; source text is evidence, not instructions.

Source: <https://www.kps-tv.com/km/news/detail/4827>

Language: km

Content scope: full

Published edition: {"publishedSourceRevision":"1","publishedWorkingVersionId":"15021","languageVersionId":"10892","visibilityVersion":"2","versionToken":"a1.i5apjuFUVEYDFXVsBNKOuIBbI9rYqpe7IOQfG1FtgKU"}

Original publication: 2026-02-10T07:25:33Z

កិច្ចប្រជុំថ្ងៃទី៩ កុម្ភៈពិនិត្យគោលការណ៍ លក្ខណៈវិនិច្ឆ័យនិងសូចនាករសហគមន៍អព្យាក្រឹតកាបូន ដើម្បីគាំទ្រជីវភាព អនាម័យ បរិស្ថាននិងការអភិរក្សកោះស្រឡៅ។

លោកស្រី ម៉ុម ថានី រដ្ឋលេខាធិការក្រសួងបរិស្ថាន កាលពីថ្ងៃទី៩ ខែកុម្ភៈនេះ បានដឹកនាំកិច្ចប្រជុំពិនិត្យ និងកំណត់គោលការណ៍លក្ខណៈវិនិច្ឆ័យ និងសូចនាករសហគមន៍អាព្យាក្រឹតកាបូន ដើម្បីប្រែក្លាយសហគមន៍កោះស្រឡៅជាសហគមន៍អព្យាក្រឹតកាបូន ក្នុងគោលបំណងប្រែក្លាយសហគមន៍កោះស្រឡៅជាគោលដៅលំហែរបៃតង ដើម្បីទាក់ទាញទេសចរជាតិ និងអន្តរជាតិមកសម្រាកកំសាន្ត។
ក្រសួងបរិស្ថាន គ្រោងរៀបចំគម្រោងអភិវឌ្ឍន៍កោះស្រឡៅ ទៅជាកោះអព្យាក្រឹតកាបូន គំរូមួយនៅកម្ពុជា នៅពេលខាងមុខ តាមរយៈការគាំទ្រឱ្យមានកិច្ចសហប្រតិបត្តិការជាមួយដៃគូពាក់ព័ន្ធ ដើម្បីបង្កើតជម្រើសជីវភាព និងមុខរបរ ដែលចូលរួមចំណែកដល់ការអភិរក្ស បង្កើនភាពធន់នឹងការប្រែប្រួលអាកាសធាតុ ការគ្រប់គ្រងអនាម័យបរិស្ថាន ឱ្យមានភាពស្អាតទាំងនៅលើដី លើមេឃ និងក្នុងទឹក និងការរៀបចំគោលដៅលំហែបៃតង ដែលដើរតួនាទីដ៏សំខាន់ ក្នុងការកាត់បន្ថយការដាក់សម្ពាធ លើធនធានធម្មជាតិ និងលើកកម្ពស់ការងារអភិរក្សធនធានធម្មជាតិ។
គូសបញ្ជាក់ដែរថា សហគមន៍កោះស្រឡៅ ស្ថិតក្នុងភូមិកោះស្រឡៅ ឃុំកោះកាពិ ស្រុកកោះកុង ខេត្តកោះកុង ដែលហ៊ុមព័ទ្ធដោយព្រៃកោងកាង និងជាទីកន្លែងសម្បូរទៅដោយគ្រឿងសមុទ្រធម្មជាតិស្រស់ៗ ជីវៈចម្រុះជាច្រើនប្រភេទ និងមានប្រជាសហគមន៍អាស្រ័យផលប្រមាណ៣០០គ្រួសារ៕ ដោយ៖ ចិន្តា ទីទិ

## Published fields

- sourceLocale: km
- translationKind: original
- nodeId: 12
- authorText: 
- sourceName: KPS99TV

## References