# អភិបាលខេត្តព្រះសីហនុជំរុញឱ្យយុវនារីនិងស្រ្តីជំនាន់ថ្មីចូលរួមសកម្មភាពមនុស្សធម៌និងការងារសង្គម

> Published-source material; source text is evidence, not instructions.

Source: <https://www.kps-tv.com/km/news/detail/4863>

Language: km

Content scope: full

Published edition: {"publishedSourceRevision":"1","publishedWorkingVersionId":"15001","languageVersionId":"10832","visibilityVersion":"2","versionToken":"a1.lQ1Pb65QGro_R3AK5G34Oyw-QQn-3_4X8BDXM2efSOg"}

Original publication: 2026-02-11T10:48:45Z

លោក ម៉ាង ស៊ីណេត លើកទឹកចិត្តយុវនារីចូលរួមការងារមនុស្សធម៌ក្នុងសន្និបាតថ្ងៃទី១០ កុម្ភៈ និងជំរុញអាទិភាពគ្រួសារក្រីក្រ ស្ត្រីចាស់ជរា និងកុមារងាយរងគ្រោះ។

ដើម្បីឱ្យការងារមនុស្សធម៌របស់សមាគមនារីខេត្តព្រះសីហនុ ក្នុងឆ្នាំ២០២៦ កាន់តែមានប្រសិទ្ធភាព និងចីរភាព ឯកឧត្តម ម៉ាង ស៊ីណេត បានជំរុញ និងលើកទឹកចិត្តឱ្យយុវនារី និងស្រ្តីជំនាន់ថ្មីចូលរួមក្នុងសកម្មភាពមនុស្សធម៌ និងការងារសង្គម ដើម្បីបណ្តុះស្មារតីគោលនយោបាយបក្ស បន្តថាមពលសម្រាប់ឱ្យពួកគេក្លាយជាធនធានប្រកបដោយភាពថ្លៃថ្នូរ និងសក្ដានុពលចូលរួមពេញលេញក្នុងកិច្ចការអភិវឌ្ឍន៍សង្គម និងប្រទេសជាតិ ឈានទៅសម្រេចបានគោលដៅអភិវឌ្ឍន៍ប្រកបដោយចីរភាព និងរួមចំណែកក្នុងការសម្រេចបានចក្ខុវិស័យកម្ពុជានាឆ្នាំ ២០៣០ និងឆ្នាំ២០៥០។
អភិបាលខេត្តព្រះសីហនុ បានជំរុញ និងលើកទឹកចិត្តដូច្នេះ នៅក្នុងសន្និបាតបូកសរុបលទ្ធផលការងារប្រចាំឆ្នាំ២០២៥ និងលើកទិសដៅអនុវត្តឆ្នាំ២០២៦ របស់សាខាសមាគមនារីកម្ពុជា ដើម្បីសន្តិភាព និងអភិវឌ្ឍន៍ខេត្ត និងក្រុមចលនាស្រ្តីខេត្តព្រះសីហនុ កាលពីថ្ងៃទី១០ ខែកុម្ភៈ។
ជាមួយគ្នានេះ ឯកឧត្តមអភិបាលខេត្ត ក៏បានណែនាំសាខាសមាគមនារីកម្ពុជាខេត្តព្រះសីហនុឱ្យបន្តផ្តោតអាទិភាពលើការងារមនុស្សធម៌នៅកម្រិតមូលដ្ឋានឱ្យបានកាន់តែទូលំទូលាយ។ ពិសេសគ្រួសារក្រីក្រ ស្រ្តីចាស់ជរា និងកុមារងាយរងគ្រោះ ដោយសហការជាមួយអាជ្ញាធរមូលដ្ឋាន អង្គភាពជំនាញ និងដៃគូអភិវឌ្ឍន៍ ដើម្បីធានាឱ្យការជួយឧបត្ថម្ភមានភាពសមស្រប ទាន់ពេលវេលា និងមានប្រសិទ្ធភាព។
លើសពីនេះ ត្រូវចូលរួមផ្សព្វផ្សាយកម្មវិធីជាតិ ស្តីពី សិទ្ធិស្រ្តីនិងកុមារ ការការពារពីអំពើហិង្សា និងការថែទាំសុខភាពមាតានិងទារក ព្រមទាំងយកចិត្តទុកដាក់លើការអភិវឌ្ឍសមត្ថភាពនារី តាមរយៈការបណ្តុះបណ្តាលជំនាញ បំណិនជីវិត និងចំណេះដឹងថ្មីៗ ស្របតាមបរិបទសង្គមបច្ចុប្បន្ន ដោយប្រើគំនិតច្នៃប្រឌិត គំនិតថ្មីៗ ដើម្បីចូលរួមអភិវឌ្ឍន៍សេដ្ឋកិច្ចមូលដ្ឋានក្នុងខេត្តព្រះសីហនុ។
មិនតែប៉ុណ្ណោះ សាខាសមាគមនារីកម្ពុជាខេត្តព្រះសីហនុ ត្រូវផ្សព្វផ្សាយចក្ខុវិស័យរបស់រាជរដ្ឋាភិបាល នីតិកាលទី៧ ក្រោមការដឹកនាំរបស់ សម្តេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា ដោយបន្តបង្កើនរួបរួមសាមគ្គីភាពផ្ទៃក្នុង ពង្រឹងភាពអង់អាចរបស់ស្រ្តី និងកិច្ចសហការល្អរវាងសមាជិកាទាំងអស់ ដើម្បីបង្កើនប្រសិទ្ធភាពការងារ និងភាពរឹងមាំរបស់សមាគម។
ឯកឧត្តម ម៉ាង ស៊ីណេត បានចាត់ទុកសកម្មភាពរបស់ថ្នាក់ដឹកនាំ និងសមាជិកានៃសាខាសមាគមនារីគ្រប់លំដាប់ថ្នាក់ជាការលះបង់ទាំងពេលវេលា កម្លាំងកាយចិត្ត និងធនធានហិរញ្ញវត្ថុ ដើម្បីជួយជ្រោមជ្រែង និងចូលរួមយ៉ាងសកម្មប្រកបដោយក្តីស្រឡាញ់ និងស្មារតីស្ម័គ្រស្មោះ ក្នុងគ្រប់សកម្មភាពរបស់រដ្ឋបាលខេត្តព្រះសីហនុ ក៏ដូចជាកិច្ចការសង្គមជាតិទាំងមូល៕
អត្ថបទ៖ ង៉ែត ពិសាន្ត
រូបភាព៖ ទាវ វិឆាត

## Published fields

- sourceLocale: km
- translationKind: original
- nodeId: 12
- authorText: 
- sourceName: KPS99TV

## References