# បារាំងបញ្ជាក់ជាថ្មីពីការប្តេជ្ញាជួយផ្តល់ឯកសារដែលខ្លួនមានពាក់ព័ន្ធរឿងព្រំដែនកម្ពុជានិងថៃ  

> Published-source material; source text is evidence, not instructions.

Source: <https://www.kps-tv.com/km/news/detail/5199>

Language: km

Content scope: full

Published edition: {"publishedSourceRevision":"1","publishedWorkingVersionId":"14817","languageVersionId":"10280","visibilityVersion":"2","versionToken":"a1.cB6m98Iz65sal2tGv7wmZqGAIjeVyJYbp3UstaDSjkQ"}

Original publication: 2026-02-28T08:10:15Z

លោក Jean-Noël Barrot បានបញ្ជាក់ក្នុងជំនួបថ្ងៃទី២៥ កុម្ភៈជាមួយលោក ប្រាក់ សុខុន ថាបារាំងត្រៀមជួយភាគីកម្ពុជា–ថៃចូលប្រើបណ្ណសារពាក់ព័ន្ធព្រំដែន និងគាំទ្រដំណោះស្រាយសន្តិវិធី។

រដ្ឋមន្ត្រីអឺរ៉ុប និងការបរទេសបារាំង ឯកឧត្តម Jean-Noël Barrot បានបញ្ជាក់ជាថ្មីម្ដងទៀតថា ប្រទេសបារាំងនឹងជួយសម្រួលដល់កម្ពុជានិងថៃ ក្នុងការចូលទៅកាន់បណ្ណសារឯកសារទាំងឡាយដែលខ្លួនមានទាក់ទងនឹងការកំណត់ព្រំដែន។ ការប្ដេជ្ញាចិត្តម្តងទៀតបែបនេះ ធ្វើឡើងកាលពីថ្ងៃទី២៥ ខែកុម្ភៈ ក្នុងជំនួបរវាងឯកឧត្តម Barrot និងរដ្ឋមន្ត្រីការបរទេសកម្ពុជា ឯកឧត្តម ប្រាក់ សុខុន ក្នុងអំឡុងពេលឯកឧត្តមធ្វើទស្សនកិច្ចទៅកាន់ទ្វីបអឺរ៉ុប និងអង្គការសហប្រជាជាតិ។
ឯកឧត្តម Barrot បានបញ្ជាក់ជាថ្មីនូវការប្ដេជ្ញាចិត្តរបស់បារាំងចំពោះស្ថិរភាពក្នុងតំបន់ និងបានសង្កត់ធ្ងន់លើសារៈសំខាន់នៃការអនុវត្តពេញលេញនូវកិច្ចព្រមព្រៀងបទឈប់បាញ់ ថ្ងៃទី២៧ ខែធ្នូ ឆ្នាំ២០២៥ ដែលនៅមានសុពលភាពរហូតមកដល់សព្វថ្ងៃ។ ឯកឧត្តម ថ្លែងថា កិច្ចសន្ទនានយោបាយរវាងប្រទេសកម្ពុជានិងថៃ គួរបន្តទៅមុខទៀត ព្រោះវាចាំបាច់ដើម្បីឈានទៅដល់ដំណោះស្រាយដោយសន្តិវិធី និងយូរអង្វែងចំពោះវិវាទព្រំដែន ដោយអនុលោមតាមច្បាប់អន្តរជាតិ និងការប្ដេជ្ញាចិត្តទ្វេភាគីរបស់ប្រទេសទាំងពីរ។
រដ្ឋមន្រ្តីអឺរ៉ុបនិងការបរទេសបារាំង បានថ្លែងទៀតថា៖ «បារាំងគាំទ្រកិច្ចខិតខំប្រឹងប្រែងរបស់អាស៊ានក្នុងរឿងនេះ ហើយកំពុងទាក់ទងជាមួយដៃគូទាំងពីរដោយភាពមិនលម្អៀងទាំងស្រុង។ វាបញ្ជាក់ជាថ្មីពីឆន្ទៈរបស់យើងក្នុងការជួយសម្រួលដល់ភាគីទាំងពីរក្នុងការចូលទៅកាន់បណ្ណសារឯកសារទាំងឡាយដែលយើងមានទាក់ទងនឹងការកំណត់ព្រំដែន»។
កន្លងទៅថ្មីៗនេះ ប្រទេសបារាំង បានបង្ហាញពីឆន្ទៈរបស់ខ្លួនក្នុងការផ្ដល់ឯកសារបណ្ណសារដល់កម្ពុជាឬថៃ ក្នុងកិច្ចខិតខំប្រឹងប្រែងស្វែងរកដំណោះស្រាយដោយសន្តិវិធីចំពោះជម្លោះព្រំដែនផងដែរ៕
ដោយ៖ ង៉ែត ពិសាន្ត

## Published fields

- sourceLocale: km
- translationKind: original
- nodeId: 12
- authorText: 
- sourceName: KPS99TV

## References