# លោក កែវ រតនៈ ថាកម្ពុជាមិនទាន់ខ្វះប្រេង ខណៈថ្លៃនាំចូលកើនឡើង

> Published-source material; source text is evidence, not instructions.

Source: <https://www.kps-tv.com/km/news/detail/5362>

Language: km

Content scope: full

Published edition: {"publishedSourceRevision":"1","publishedWorkingVersionId":"14736","languageVersionId":"10037","visibilityVersion":"2","versionToken":"a1.zNtOws1e2X88YQ5Law8k81SrQVuHTt1JS3nF4pXRNZ8"}

Original publication: 2026-03-09T04:25:26Z

លោករដ្ឋមន្ត្រីបានថ្លែងថ្ងៃទី៨ ខែមីនាថា ការនាំចូលនៅបន្តរាល់ថ្ងៃ ហើយសន្និធិអាចទ្រទ្រង់២១ថ្ងៃបើគ្មានការនាំចូលទាំងស្រុង ខណៈប្រេងនាំចូលថ្មីថ្លៃជាងមុន។

ស្របពេលតម្លៃប្រេងហក់ឡើងខ្ពស់ ដោយសារតែសង្គ្រាមនៅមជ្ឈិមបូព៌ា ឯកឧត្តម កែវ រតនៈ រដ្ឋមន្រ្តីក្រសួងរ៉ែ និងថាមពល នៅថ្ងៃទី០៨ ខែមីនា ឆ្នាំ២០២៦ បានអះអាងថា កម្ពុជាមិនទាន់មានស្ថានភាពដែលខ្វះប្រេងផ្គត់ផ្គង់ទេ ហើយសន្និធិបម្រុងរបស់កម្ពុជានៅតែឈរជើងបាន២១ថ្ងៃដូចគ្នា មានន័យថា បើក្រុមហ៊ុនប្រេងមិនអាចនាំប្រេងចូលបានទាល់តែសោះ នោះកម្ពុជាអាចឈរជើងបាន២១ថ្ងៃ។ ផ្ទុយទៅវិញ កម្ពុជា នៅតែបន្តនាំប្រេងចូលរាល់ថ្ងៃ ពោលគឺមិនទាន់មានការបិទប្រភពណាមួយនៅឡើយទេ។
ការអះអាងរបស់ឯកឧត្តមកែវ រតនៈ ធ្វើឡើងស្របពេលសង្គ្រាមនៅមជ្ឈិមបូព៌ាផ្ទុះឡើងខ្លាំងនាំឱ្យក្រុមហ៊ុនដឹកជញ្ជូន ក្រុមហ៊ុនប្រេងខ្នាតយក្ស និងពាណិជ្ជករជាច្រើនផ្អាកការដឹកជញ្ជូនប្រេងឆៅ ប្រេងឥន្ធនៈ និងឧស្ម័នធម្មជាតិរាវ (LNG) ឆ្លងកាត់ច្រកសមុទ្រ Hormuz ជាបណ្តោះអាសន្ន។
ប៉ុន្តែទោះបីជាយ៉ាងនេះក្តី ឯកឧត្តមរដ្ឋមន្រ្តី បានបញ្ជាក់ថា តម្លៃប្រេងចាប់ផ្តើមហក់ឡើងថ្លៃហើយ ព្រោះប្រេងដែលនាំចូលថ្មីៗមានតម្លៃថ្លៃជាងមុន ខណៈពិភពលោកក៏ឡើងថ្លៃដូចគ្នា ចំណែកការឡើងថ្លៃនេះ មិនមែនជាការកំណត់របស់ម្ចាស់ការ៉ាស់សាំងនោះទេ តែជាការកំណត់របស់ក្រសួងពាណិជ្ជកម្ម និងក្រសួងសេដ្ឋកិច្ច តាមអត្រាប្រេងថ្មីដែលនាំចូល៕
ដោយ៖ ង៉ែត ពិសាន្ត

## Published fields

- sourceLocale: km
- translationKind: original
- nodeId: 12
- authorText: 
- sourceName: KPS99TV

## References