{"asset":"news","key":"5535","locale":"km","id":"news:5535:km","entityId":"news:5535","canonicalUrl":"https://www.kps-tv.com/km/news/detail/5535","state":"ready","title":"សាខាក.ប.ប.ព្រះសីហនុត្រួតពិនិត្យរង្វាស់ និងតម្លៃនៅស្ថានីយ៣","summary":"ការត្រួតពិនិត្យថ្ងៃទី១៦ ខែមីនាគ្របដណ្ដប់Total, Caltex និងPeace។ មន្ត្រីព្រមានចាត់ការលក់ខ្វះ បន្លំគុណភាព ស្តុករង់ចាំឡើងថ្លៃ និងលក់លើសតម្លៃ ហើយរាយមធ្យោបាយបណ្ដឹង។","body":"ខេត្តព្រះសីហនុ៖ លោក ឃុន ស៊ីម៉ន ប្រធានសាខា ក.ប.ប. ខេត្តព្រះសីហនុ បានបញ្ជាក់យ៉ាងច្បាស់ថា អគ្គនាយកដ្ឋាន ក.ប.ប. នឹងមិនមានការយោគយល់ឡើយ ចំពោះស្ថានីយណាដែលរកឃើញថាបានប្រព្រឹត្តអំពើមិនសុចរិត។ វិធានការច្បាប់នឹងត្រូវអនុវត្តយ៉ាងម៉ឺងម៉ាត់បំផុត ចំពោះករណីបន្លំអ្នកប្រើប្រាស់លើគុណភាព ឬបរិមាណប្រេង ការស្តុកទុកប្រេងដោយភូតភរថា «អស់ប្រេង» ដើម្បីបិទស្ថានីយរង់ចាំការឡើងថ្លៃ (ការកេងចំណេញដោយស្តុកទំនិញ) និងការលក់ថ្លៃលើសពីតម្លៃកំណត់របស់ក្រសួងពាណិជ្ជកម្ម។\nលោកប្រធានសាខា ក.ប.ប. ខេត្ត បានមានប្រសាសន៍ដូចនេះ នៅរសៀលថ្ងៃទី១៦ ខែមីនា ឆ្នាំ២០២៦ ខណៈលោកបានដឹកនាំក្រុមការងារ សហការជាមួយមន្ទីរជំនាញពាក់ព័ន្ធ ចុះត្រួតពិនិត្យបច្ចេកទេសរង្វាស់ និងតម្លៃលក់រាយប្រេងឥន្ធនៈ នៅក្នុងក្រុងព្រះសីហនុ លើស្ថានីយចំនួន ៣ រួមមាន Total, Caltex និង Peace។\nប្រតិបត្តិការនេះមានការចូលរួមសហការយ៉ាងសកម្មពីមន្ទីរពាណិជ្ជកម្ម មន្ទីររ៉ែ និងថាមពល និងមន្ទីរឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍។\nគោលបំណងសំខាន់នៃការចុះត្រួតពិនិត្យយ៉ាងសកម្មនេះ មិនត្រឹមតែអនុវត្តតាមតួនាទីភារកិច្ចប៉ុណ្ណោះទេ ប៉ុន្តែថែមទាំងឆ្លើយតបទៅនឹងក្តីបារម្ភរបស់សាធារណជនពាក់ព័ន្ធនឹងបញ្ហាតម្លៃ និងគុណភាពប្រេង។ គោលដៅសំខាន់ៗរួមមាន៖ ធានាថាការវាស់វែងបរិមាណប្រេងពីម៉ាស៊ីនមានភាពត្រឹមត្រូវ ទប់ស្កាត់ការលក់ថ្លៃលើសកំណត់ និងជំរុញឱ្យអាជីវករអនុវត្តតាមសេចក្តីជូនដំណឹងស្តីពីតម្លៃលក់រាយរបស់ក្រសួងពាណិជ្ជកម្ម ព្រមទាំងការពារការលាយបញ្ចូលសារធាតុផ្សេងៗដែលអាចប៉ះពាល់ដល់គុណភាពប្រេង និងបង្កហានិភ័យដល់យានយន្តរបស់អ្នកប្រើប្រាស់។\nដើម្បីឱ្យការអនុវត្តច្បាប់កាន់តែមានប្រសិទ្ធភាព សាខា ក.ប.ប. ខេត្តព្រះសីហនុ បានអំពាវនាវដល់ប្រជាពលរដ្ឋ ប្រសិនបើជួបប្រទះភាពមិនប្រក្រតី ដូចជា ការលក់ខ្វះលីត្រ ប្រេងគ្មានគុណភាព ឬលក់ថ្លៃលើសហេតុ សូមរាយការណ៍ជាបន្ទាន់តាមរយៈ៖\n • លេខឥតគិតថ្លៃ៖ 1266\n • លេខការិយាល័យ៖ 023 231 856\n • លេខទំនាក់ទំនងផ្ទាល់៖ 012 925 317 / 012 875 989 / 012 824 948\nការចូលរួមរាយការណ៍ពីសំណាក់ប្រជាពលរដ្ឋ គឺជាផ្នែកសំខាន់ក្នុងការលុបបំបាត់អំពើមិនសុចរិតក្នុងធុរកិច្ច និងការពារសិទ្ធិ ក៏ដូចជាផលប្រយោជន៍របស់អ្នកប្រើប្រាស់ទាំងអស់គ្នា៕\nដោយ៖ ប៉ៃ សុឃីម","contentScope":"full","proof":{"publishedSourceRevision":"1","publishedWorkingVersionId":"14501","languageVersionId":"9561","visibilityVersion":"2","versionToken":"a1.4qnzctRQzBcEXDDvcpiU_NpHam0COi8GJafeQsEvBHU"},"availableLocales":["zh","en","km"],"attributes":{"sourceLocale":"km","translationKind":"original","nodeId":"12","authorText":"","sourceName":"KPS99TV"},"references":[],"links":[],"publishedAt":"2026-03-17T06:45:58Z"}