# ខេត្តបន្ទាយមានជ័យថាទីតាំងស្នាក់នៅបណ្ដោះអាសន្នមិនមែនជាការដោះដូរផ្ទះ និងដីចាស់

> Published-source material; source text is evidence, not instructions.

Source: <https://www.kps-tv.com/km/news/detail/5675>

Language: km

Content scope: full

Published edition: {"publishedSourceRevision":"1","publishedWorkingVersionId":"14422","languageVersionId":"9324","visibilityVersion":"2","versionToken":"a1.W01llyFpAgXZxU-v_9Wb0wZfVu8gWs_F-1yh7TpHp8g"}

Original publication: 2026-03-24T10:55:27Z

រដ្ឋបាលខេត្តបានបញ្ជាក់នៅថ្ងៃទី២៣ ខែមីនា ថាគម្រោងនៅស្វាយចេកសម្រាប់ស្នាក់នៅបណ្ដោះអាសន្ន ហើយការចូលស្នាក់នៅដំបូងរៀបចំដោយចាប់ឆ្នោត។

រដ្ឋបាលខេត្តបន្ទាយមានជ័យ កាលពីថ្ងៃទី២៣ ខែមីនា បានអះអាងប្រាប់ប្រជាពលរដ្ឋរងគ្រោះដោយសារយោធាថៃព័ទ្ធដីធ្លីនៅតាមព្រំដែនកម្ពុជា-ថៃ និងសាធារណជនថា ការរៀបចំដី និងផ្ទះជូនពលរដ្ឋភៀសសឹក នៅស្រុកស្វាយចេក មិនមែនជាថ្នូរនៃការដោះដូរជាមួយដីរបស់បងប្អូនដែលបានបាត់បង់ដោយសារទាហានថៃហ៊ុំព័ទ្ធយកនោះទេ។
ផ្ទុយទៅវិញ បើតាមសេចក្តីប្រកាសព័ត៌មានរបស់រដ្ឋបាលខេត្តបន្ទាយមានជ័យ បានបញ្ជាក់ថា គឺជាការរៀបចំឱ្យរស់នៅជាបណ្តោះអាសន្នតែប៉ុណ្ណោះ ដោយរង់ចាំរាជរដ្ឋាភិបាលដោះស្រាយជាមួយភាគីថៃចប់ នោះបងប្អូននឹងត្រូវវិលត្រឡប់ទៅរស់នៅលើទីតាំងលំនៅឋាន របស់ខ្លួនវិញ។
សេចក្តីប្រកាសព័ត៌មានដដែល បញ្ជាក់បន្ថែមថា ក្នុងភូមិសាស្ត្រខេត្តបន្ទាយមានជ័យមានប្រជាពលរដ្ឋរងគ្រោះដោយសារយោធាថៃហ៊ុំព័ទ្ធបន្លាលួស ដាក់ទូកុងតឺន័រយកដីធ្លី និងផ្ទះសម្បែងមានដូចជា ភូមិជោគជ័យ ភូមិព្រៃចាន់ ស្ថិតនៅឃុំអូរបីជាន់ ស្រុកអូរជ្រៅ និងភូមិសាមគ្គី ភូមិត្រពាំងសំរោង ភូមិផ្លូវបំបែក និងភូមិបន្ទាយមានឬទ្ធិ ស្ថិតនៅឃុំគោករមៀត ស្រុកថ្មពួក ខេត្តបន្ទាយមានជ័យ ។
ចំពោះពលរដ្ឋដែលរងផលប៉ះពាល់ដោយសារយោធាថៃហ៊ុំព័ទ្ធផ្ទះសម្បែងមិនអាចចូលទៅរស់នៅក្នុងទីតាំងភូមិទាំង៦ខាងលើ រាជរដ្ឋាភិបាលបាននិងកំពុងរៀបចំដីធ្លីជាគម្រោងរបស់ សមាគមអតីតយុទ្ធជន ដើម្បីសាងសង់ផ្ទះសម្រាប់ផ្តល់ជូនបងប្អូនដែលមានលំនៅដ្ឋានអចិន្ត្រៃយ៍ក្នុងតំបន់ហ៊ុំព័ទ្ធ បានរស់នៅជាបណ្តោះអាសន្ន ដែលមានទីតាំងនៅភូមិស្លក្រាម ឃុំស្លក្រាម ស្រុកស្វាយចេក ខេត្តបន្ទាយមានជ័យ លើផ្ទៃដីទំហំ៤០០ហិកតា និងមានហេដ្ឋារចនាសម្ព័ន្ធនានាគ្រប់គ្រាន់។ បច្ចុប្បន្ន ក្រុមការងារបាននឹងកំពុងដំណើរការសាងសង់ផ្ទះបានមួយចំនួន និងផ្តល់ជូនសម្រាប់ជនភៀសសឹកចូលទៅរស់នៅជាបណ្តោះអាសន្ន។ ប៉ុន្តែ ក្នុងសេចក្តីប្រកាសព័ត៌មានបញ្ជាក់ថា ចូលទៅរស់នៅជំហានដំបូង ធ្វើឡើងតាមរយៈការចាប់ឆ្នោត៕
ដោយ៖ ង៉ែត ពិសាន្ត

## Published fields

- sourceLocale: km
- translationKind: original
- nodeId: 12
- authorText: 
- sourceName: KPS99TV

## References