{"asset":"news","key":"5838","locale":"km","id":"news:5838:km","entityId":"news:5838","canonicalUrl":"https://www.kps-tv.com/km/news/detail/5838","state":"ready","title":"អភិបាលខេត្តកណ្ដាលណែនាំឱ្យប្រុងប្រយ័ត្នពេលជួលអចលនទ្រព្យ និងសហការទប់ស្កាត់ការឆបោក","summary":"ក្នុងពិធីប្រគល់បណ្ណកម្មសិទ្ធិថ្ងៃទី១ មេសា លោក គួច ចំរើន ណែនាំឱ្យពិនិត្យឯកសារ ធ្វើកិច្ចសន្យាត្រឹមត្រូវ និងរាយការណ៍សញ្ញាសង្ស័យ ព្រមទាំងបញ្ជាក់សេវាច្រកចេញចូលតែមួយនិងកាតព្វកិច្ចពន្ធ។","body":"កណ្ដាល៖ ឯកឧត្តម គួច ចំរើន អភិបាលខេត្តកណ្ដាល បានបន្តណែនាំប្រជាពលរដ្ឋឱ្យបង្កើនការប្រុងប្រយ័ត្នខ្ពស់ក្នុងការជួលអគារ ផ្ទះ និងកន្លែងស្នាក់នៅផ្សេងៗជូនជនបរទេស ដោយត្រូវពិនិត្យឯកសារពាក់ព័ន្ធ និងធ្វើកិច្ចសន្យាឱ្យបានត្រឹមត្រូវ មុនពេលជួល ដើម្បីជៀសវាងហានិភ័យ និងការផាកពិន័យតាមច្បាប់។\nការណែនាំនេះ ត្រូវបានលើកឡើងក្នុងឱកាសពិធីចែកវិញ្ញាបណ្ណបត្រសម្គាល់ម្ចាស់អចលនវត្ថុជូនប្រជាពលរដ្ឋ ចំនួន ៤,៦៨២បណ្ណ ស្ថិតនៅ ៩ភូមិ ក្នុងសង្កាត់សំពៅពូន ក្រុងសំពៅពូន ខេត្តកណ្ដាល នាថ្ងៃទី០១ ខែមេសា ឆ្នាំ២០២៦។ ក្នុងនោះផងដែរ អភិបាលខេត្តកណ្ដាល បានផ្សព្វផ្សាយអំពីហានិភ័យនៃបទល្មើសបោកប្រាស់តាមប្រព័ន្ធបច្ចេកវិទ្យា (Online Scam) និងអំពាវនាវឱ្យប្រជាពលរដ្ឋចូលរួមសហការជាមួយអាជ្ញាធរ។\nឯកឧត្តម បានណែនាំបន្ថែមឱ្យប្រជាពលរដ្ឋយកចិត្តទុកដាក់ពិសេសចំពោះករណីជួលកន្លែងស្នាក់នៅជាក្រុម ឬមានការតំឡើងប្រព័ន្ធអ៊ីនធឺណិតមានទំហំធំដែលអាចបង្កការសង្ស័យ ហើយក្នុងករណីមានសញ្ញាមិនប្រក្រតី គួររាយការណ៍ជាបន្ទាន់ទៅសមត្ថកិច្ច ដើម្បីអនុវត្តវិធានការត្រួតពិនិត្យ និងបង្ក្រាបបានទាន់ពេលវេលា។\nជាមួយគ្នានេះ ឯកឧត្តម គួច ចំរើន ក៏បានអំពាវនាវដល់ប្រជាពលរដ្ឋដែលមានដីធ្លីនៅ ៩ភូមិ នៃសង្កាត់ព្រែកជ្រៃ និងសង្កាត់សំពៅពូន អញ្ជើញមកទទួលយកបណ្ណកម្មសិទ្ធិដីធ្លី (ប្លង់រឹង) នៅការិយាល័យច្រកចេញចូលតែមួយ សាលាក្រុងសំពៅពូន ដោយមិនចាំបាច់រត់ការតាមកន្លែងផ្សេងៗឡើយ។\nឯកឧត្តម បានបញ្ជាក់ថា ការផ្តល់សេវាកម្មតាមច្រកចេញចូលតែមួយ គឺមន្ត្រីជាអ្នកសម្របសម្រួលឯកសារទាំងអស់ជូនប្រជាពលរដ្ឋដោយមិនគិតថ្លៃ ខណៈប្រជាពលរដ្ឋត្រូវបំពេញកាតព្វកិច្ចបង់ពន្ធតាមច្បាប់របស់រដ្ឋ។\nបន្ថែមពីនេះ ឯកឧត្តម គួច ចំរើន បានណែនាំដល់មន្ត្រីសុរិយោដីឱ្យធានាការផ្តល់បណ្ណកម្មសិទ្ធិដល់ម្ចាស់កម្មសិទ្ធិករឱ្យបានគ្រប់គ្នា ដោយមិនអនុញ្ញាតឱ្យមានការរុញឯកសារឱ្យប្រជាពលរដ្ឋរត់ការដោយផ្ទាល់ឡើយ។ ក្នុងករណីមានអំពើមិនប្រក្រតី ប្រជាពលរដ្ឋអាចរាយការណ៍ដោយផ្ទាល់ ដើម្បីអនុវត្តវិធានការដោះស្រាយបានទាន់ពេលវេលា៕ ដោយ៖ KPS99TV","contentScope":"full","proof":{"publishedSourceRevision":"1","publishedWorkingVersionId":"14307","languageVersionId":"8989","visibilityVersion":"2","versionToken":"a1.F1Pg_CEuXoClPgf8_D1ODSRmLdXfko78XsdjjNdOu1g"},"availableLocales":["zh","en","km"],"attributes":{"sourceLocale":"km","translationKind":"original","nodeId":"12","authorText":"","sourceName":"KPS99TV"},"references":[],"links":[],"publishedAt":"2026-04-02T03:17:27Z"}