# អគ្គនាយកដ្ឋានអន្តោប្រវេសន៍រាយការណ៍ពីការបណ្ដេញជនជាតិចិន៣៣០នាក់ ពាក់ព័ន្ធករណីឆបោក និងអន្តោប្រវេសន៍

> Published-source material; source text is evidence, not instructions.

Source: <https://www.kps-tv.com/km/news/detail/6414>

Language: km

Content scope: full

Published edition: {"publishedSourceRevision":"1","publishedWorkingVersionId":"13938","languageVersionId":"8122","visibilityVersion":"2","versionToken":"a1.m_WQajS4hzvawlZH1-QNgfkHYmSv_luXgPImg6rGGu4"}

Original publication: 2026-05-06T07:06:42Z

អគ្គនាយកដ្ឋានអន្តោប្រវេសន៍បានឱ្យដឹងថា ខ្លួនបានសហការជាមួយស្ថានទូតចិន បណ្ដេញជនជាតិចិន៣៣០នាក់ រួមទាំងស្ត្រី៦នាក់ តាមយន្តហោះពិសេស នៅយប់ថ្ងៃទី៥ ឈានចូលថ្ងៃទី៦ ខែឧសភា ឆ្នាំ២០២៦។

អគ្គនាយកដ្ឋានអន្តោប្រវេសន៍បានឱ្យដឹងថា ដោយសហការជាមួយស្ថានទូតចិន នៅយប់ថ្ងៃទី៥ ឈានចូលថ្ងៃទី៦ ខែឧសភា ឆ្នាំ២០២៦ ខ្លួនបានអនុវត្តការបណ្ដេញជនជាតិចិនសរុបចំនួន៣៣០នាក់ ក្នុងនោះមានស្ត្រី៦នាក់ ពាក់ព័ន្ធនឹងករណីឆបោកតាមប្រព័ន្ធបច្ចេកវិទ្យា និងការស្នាក់នៅ និងធ្វើការខុសច្បាប់។
ការបណ្ដេញនេះត្រូវបានអនុវត្តតាមរយៈយន្តហោះពិសេស ចេញពីប៉ុស្តិ៍នគរបាលច្រកទ្វារអាកាសយានដ្ឋានអន្តរជាតិតេជោ។
របាយការណ៍បានពិពណ៌នាថា វិធានការនេះជាការអនុវត្តតាមគោលនយោបាយរបស់សម្ដេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា និងក្រោមការដឹកនាំរបស់ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ ស សុខា ក្នុងគោលបំណងបង្ក្រាប និងលុបបំបាត់ឧក្រិដ្ឋកម្មតាមប្រព័ន្ធបច្ចេកវិទ្យា នៅក្នុងព្រះរាជាណាចក្រកម្ពុជា។
របាយការណ៍បានបន្តថា វិធានការនេះមានគោលដៅធានាសុវត្ថិភាពសាធារណៈទាំងក្នុងតំបន់ និងអន្តរជាតិ ដោយមិនមានការលើកលែងចំពោះមេខ្លោង ឬអ្នកពាក់ព័ន្ធណាមួយឡើយ។ ជាមួយគ្នានេះ អាជ្ញាធរក៏បានជួយសង្គ្រោះជនរងគ្រោះដែលត្រូវបានបោកបញ្ឆោតឱ្យចូលរួមក្នុងសកម្មភាពឆបោក ដោយផ្តល់សេរីភាព និងអនុញ្ញាតឱ្យវិលត្រឡប់ទៅប្រទេសដើមវិញ។ ដោយ៖ ប៉ៃ សុឃីម

## Published fields

- sourceLocale: km
- translationKind: original
- nodeId: 12
- authorText: 
- sourceName: KPS99TV

## References