{"asset":"news","key":"6783","locale":"km","id":"news:6783:km","entityId":"news:6783","canonicalUrl":"https://www.kps-tv.com/km/news/detail/6783","state":"ready","title":"អាជ្ញាធរអង្គរបូរីរឹបអូស និងដុតកម្ទេចសាច់បង្កកនាំចូលខុសច្បាប់ជាង៣តោន","summary":"អាជ្ញាធរស្រុកអង្គរបូរី ខេត្តតាកែវ រាយការណ៍ថា បានឃាត់រថយន្ត ២គ្រឿង និងរកឃើញសាច់បង្កក ៣៨៨កេស ទម្ងន់ ៣,០៤២គីឡូក្រាម គ្មានលិខិតអនុញ្ញាត និងវិញ្ញាបនបត្រអនាម័យត្រឹមត្រូវ នៅថ្ងៃទី២៤ ខែឧសភា ឆ្នាំ២០២៦។ ទំនិញត្រូវបានដុតកម្ទេចចោលតាមនីតិវិធី។","body":"អាជ្ញាធរស្រុកអង្គរបូរី ខេត្តតាកែវ បង្ក្រាបរថយន្ត ២គ្រឿង ដែលលួចដឹកសាច់បង្កកខុសច្បាប់ជាង ៣តោន និងសម្រេចដុតកម្ទេចចោលភ្លាមៗ ដើម្បីទប់ស្កាត់ការចរាចរចូលទីផ្សារ ដែលអាចបង្កគ្រោះថ្នាក់ដល់សុខភាពប្រជាពលរដ្ឋ។\nប្រតិបត្តិការនេះ ធ្វើឡើងកាលពីថ្ងៃទី២៤ ខែឧសភា ឆ្នាំ២០២៦ ក្រោមការដឹកនាំផ្ទាល់ពីលោក កង អាណាន់ អភិបាលស្រុកអង្គរបូរី ដោយមានការសហការពីកម្លាំងនគរបាលស្រុក ស្នងការដ្ឋាននគរបាលខេត្តតាកែវ មន្ត្រីសាខា ក.ប.ប. ខេត្ត និងមន្ត្រីគយ។\nតាមសមត្ថកិច្ចឲ្យដឹងថា ការឃាត់រថយន្តទាំង២គ្រឿងនេះ ធ្វើឡើងបន្ទាប់ពីទទួលបានព័ត៌មានស្តីពីការលួចដឹកជញ្ជូនសាច់បង្កកចូលក្នុងភូមិសាស្ត្រស្រុកអង្គរបូរី។ ក្រោយការត្រួតពិនិត្យ សមត្ថកិច្ចបានរកឃើញសាច់បង្កកចំនួន ៣៨៨កេស ស្មើនឹងទម្ងន់សរុប ៣,០៤២គីឡូក្រាម ដែលនាំចូលដោយគ្មានលិខិតអនុញ្ញាត និងគ្មានវិញ្ញាបនបត្របញ្ជាក់គុណភាពអនាម័យត្រឹមត្រូវ។\n អាជ្ញាធរបានបញ្ជាក់ថា សាច់បង្កកដែលគ្មានប្រភពច្បាស់លាស់ និងមិនឆ្លងកាត់ការត្រួតពិនិត្យតាមស្តង់ដារបច្ចេកទេស អាចបង្កហានិភ័យខ្ពស់ដល់សុខភាពអ្នកប្រើប្រាស់ ដូចជា ការពុលអាហារ ការឆ្លងមេរោគ និងជំងឺផ្សេងៗ។ ជាពិសេស សាច់ដែលរក្សាទុក ឬដឹកជញ្ជូនមិនត្រឹមត្រូវ អាចបាត់បង់គុណភាព និងបង្កគ្រោះថ្នាក់ដល់អ្នកបរិភោគ។\nក្រោយរកឃើញបទល្មើសជាក់ស្តែង និងដោយមានការណែនាំពីព្រះរាជអាជ្ញាអមសាលាដំបូងខេត្តតាកែវ ក្រុមការងារចម្រុះបានដឹកជញ្ជូនសាច់បង្កកទាំងអស់ទៅដុតកម្ទេចចោល ស្ថិតក្នុងឃុំបាស្រែ ស្រុកអង្គរបូរី ដើម្បីបញ្ចប់ហានិភ័យនៃការលួចយកទៅចែកចាយបន្តលើទីផ្សារ។\nជាមួយគ្នានេះរដ្ឋបាលស្រុកអង្គរបូរី ក៏បានអំពាវនាវដល់អាជីវករ និងអ្នកនាំចូលទំនិញទាំងអស់ ឱ្យគោរពតាមច្បាប់ និងស្តង់ដារអនាម័យឱ្យបានត្រឹមត្រូវ ខណៈអាជ្ញាធរនឹងបន្តរឹតបន្តឹងការត្រួតពិនិត្យ និងបង្ក្រាបទំនិញខុសច្បាប់ ឬទំនិញខូចគុណភាព ដោយមិនលើកលែង ដើម្បីធានាសុវត្ថិភាពស្បៀងអាហារ និងការពារសុខភាពប្រជាពលរដ្ឋ៕ ដោយ៖ ប៉ៃ សុឃីម","contentScope":"full","proof":{"publishedSourceRevision":"1","publishedWorkingVersionId":"13513","languageVersionId":"7183","visibilityVersion":"2","versionToken":"a1.0powL0MerXnset5hekRX5pvvF6CgG4Up1ZRVYwLtmiM"},"availableLocales":["zh","en","km"],"attributes":{"sourceLocale":"km","translationKind":"original","nodeId":"12","authorText":"","sourceName":"KPS99TV"},"references":[],"links":[],"publishedAt":"2026-05-25T07:16:44Z"}