{"asset":"news","key":"7088","locale":"km","id":"news:7088:km","entityId":"news:7088","canonicalUrl":"https://www.kps-tv.com/km/news/detail/7088","state":"ready","title":"ភ្ញៀវទេសចរអន្តរជាតិចូលរួមរែកទឹកត្នោត លើកស្ទួយ និងផ្សព្វផ្សាយអត្តសញ្ញាណវប្បធម៌កម្ពុជាទៅកាន់ពិភពលោក","summary":"ភ្ញៀវទេសចរអន្តរជាតិបានចូលរួមរែកទឹកត្នោត និងស្វែងយល់ពីការប្រមូលទឹកត្នោតតាមបែបប្រពៃណី។ សេចក្តីរាយការណ៍ចាត់ទុកសកម្មភាពនេះថាជាឱកាសស្គាល់ជីវភាពនិងវប្បធម៌ខ្មែរ ផ្សារភ្ជាប់សហគមន៍ និងរួមចំណែកលើកស្ទួយទេសចរណ៍មូលដ្ឋាន។","body":"សកម្មភាពរែកទឹកត្នោតរបស់ភ្ញៀវទេសចរអន្តរជាតិ ដែលជាមុខរបរ និងរបៀបរស់នៅបែបប្រពៃណីរបស់ប្រជាពលរដ្ឋខ្មែរ ត្រូវបានចាត់ទុកជាបេតិកភណ្ឌវប្បធម៌រស់មួយ ដែលឆ្លុះបញ្ចាំងពីភាពឧស្សាហ៍ព្យាយាម ភាពច្នៃប្រឌិត និងទំនាក់ទំនងជិតស្និទ្ធរវាងប្រជាជនជាមួយធម្មជាតិ។ នាពេលបច្ចុប្បន្ន សកម្មភាពនេះកំពុងទាក់ទាញការចាប់អារម្មណ៍ពីភ្ញៀវទេសចរអន្តរជាតិជាច្រើន ដែលបានចូលរួមសាកល្បង និងស្វែងយល់ពីដំណើរការប្រមូលទឹកត្នោតតាមបែបប្រពៃណី។\n តាមរយៈការចូលរួមរែកទឹកត្នោត ភ្ញៀវទេសចរមិនត្រឹមតែទទួលបានបទពិសោធន៍ថ្មី និងសប្បាយរីករាយប៉ុណ្ណោះទេ ប៉ុន្តែថែមទាំងបានសិក្សាស្វែងយល់កាន់តែស៊ីជម្រៅអំពីជីវភាពរស់នៅ ប្រពៃណី ទំនៀមទម្លាប់ និងមរតកវប្បធម៌ដ៏មានតម្លៃរបស់ប្រជាជនកម្ពុជា។ សកម្មភាពនេះបានបង្កើតឱកាសឱ្យភ្ញៀវទេសចរបានផ្សារភ្ជាប់ទំនាក់ទំនងដោយផ្ទាល់ជាមួយសហគមន៍មូលដ្ឋាន និងទទួលស្គាល់ពីតម្លៃនៃការអភិរក្សមុខរបរបុរាណដែលមានតាំងពីដូនតាមក។\n ជាមួយគ្នានេះ ការចូលរួមរបស់ភ្ញៀវទេសចរអន្តរជាតិក្នុងសកម្មភាពរែកទឹកត្នោត ក៏ជាការរួមចំណែកលើកស្ទួយវិស័យទេសចរណ៍សហគមន៍ និងជួយបង្កើនប្រាក់ចំណូលដល់ប្រជាពលរដ្ឋនៅតាមមូលដ្ឋានផងដែរ។ រូបភាព និងបទពិសោធន៍ដែលភ្ញៀវទេសចរបានចែករំលែកតាមបណ្តាញសង្គម បានក្លាយជាមធ្យោបាយដ៏មានប្រសិទ្ធភាពក្នុងការផ្សព្វផ្សាយពីភាពសម្បូរបែបនៃវប្បធម៌ ប្រពៃណី និងសក្ដានុពលទេសចរណ៍របស់កម្ពុជាទៅកាន់មិត្តភក្តិ និងសាធារណជននៅជុំវិញពិភពលោក។\n សកម្មភាពនេះបានបង្ហាញថា វប្បធម៌ និងរបៀបរស់នៅប្រចាំថ្ងៃរបស់ប្រជាពលរដ្ឋខ្មែរ មិនត្រឹមតែជាមោទនភាពជាតិប៉ុណ្ណោះទេ ប៉ុន្តែថែមទាំងជាផលិតផលទេសចរណ៍ដ៏ទាក់ទាញ ដែលអាចទាញយកចំណាប់អារម្មណ៍ពីភ្ញៀវទេសចរជាតិ និងអន្តរជាតិ ឱ្យមកស្វែងយល់ និងស្គាល់ប្រទេសកម្ពុជាកាន់តែច្បាស់ថែមទៀតផងដែរ៕ ដោយ៖ ប៉ៃ សុឃីម","contentScope":"full","proof":{"publishedSourceRevision":"1","publishedWorkingVersionId":"13246","languageVersionId":"6629","visibilityVersion":"2","versionToken":"a1.De6iBkTmAkA2--AoSQOwzHmYX30IQvvLpiM34v0XHnQ"},"availableLocales":["zh","en","km"],"attributes":{"sourceLocale":"km","translationKind":"original","nodeId":"12","authorText":"","sourceName":"KPS99TV"},"references":[],"links":[],"publishedAt":"2026-06-11T03:04:19Z"}