# ឯកឧត្តមបណ្ឌិត លី ធុជ អំពាវនាវឱ្យប្រទេសទាំងអស់ជ្រើសរើសកិច្ចសហប្រតិបត្តិការ ជំនួសការប្រឈមមុខដាក់គ្នា

> Published-source material; source text is evidence, not instructions.

Source: <https://www.kps-tv.com/km/news/detail/7482>

Language: km

Content scope: full

Published edition: {"publishedSourceRevision":"1","publishedWorkingVersionId":"13113","languageVersionId":"6246","visibilityVersion":"2","versionToken":"a1.uFQ6Wl2DLaarAH9TqTdO2g2AtyQx61Z9-0Ff2C72X1A"}

Original publication: 2026-06-28T01:48:11Z

ឯកឧត្តមបណ្ឌិត លី ធុជ បានថ្លែងនៅ Dubrovnik Forum 2026 ថ្ងៃទី២៧ មិថុនា ថាស្វ័យភាព ការសន្ទនា និងច្បាប់អន្តរជាតិជាមូលដ្ឋានសន្តិភាព ហើយអំពាវនាវឱ្យប្រទេសទាំងអស់ជ្រើសរើសភាពជាដៃគូ និងកិច្ចសហប្រតិបត្តិការ ជំនួសការប្រឈមមុខដាក់គ្នា។

ថ្ងៃទី២៧ ខែមិថុនា ឆ្នាំ២០២៦ ឯកឧត្តមបណ្ឌិត លី ធុជ បានចូលរួមជាវាគ្មិន និងចែករំលែកបទពិសោធន៍របស់ កម្ពុជា ក្នុងកិច្ចពិភាក្សាកម្រិតខ្ពស់ក្រោមប្រធានបទ «Asia-Pacific in Motion: New Powers, Old Rivalries» ដែលរៀបចំឡើងក្នុងអំឡុងវេទិកា Dubrovnik Forum 2026។
 ក្នុងឱកាសនោះ ឯកឧត្តមទេសរដ្ឋមន្ត្រីបានលើកឡើងថា ស្វ័យភាព ការសន្ទនា និងការគោរពច្បាប់អន្តរជាតិ គឺជាមូលដ្ឋានដ៏សំខាន់សម្រាប់ការរក្សាសន្តិភាព និងស្ថិរភាពនៅក្នុងតំបន់អាស៊ី-ប៉ាស៊ីហ្វិក ស្របពេលពិភពលោកកំពុងឈានទៅរករបៀបពហុប៉ូលកាន់តែច្បាស់លាស់។
 ដោយផ្អែកលើបទពិសោធន៍របស់កម្ពុជា ឯកឧត្តមបណ្ឌិត លី ធុជ បានបញ្ជាក់ថា ការប្រកួតប្រជែងរវាងមហាអំណាច មិនគួរបង្កឱ្យប្រទេសតូចៗទទួលរងផលប៉ះពាល់នោះទេ។ ឯកឧត្តមបានគូសបញ្ជាក់ថា កម្ពុជាបានរក្សាឯករាជ្យភាព និងអធិបតេយ្យភាពរបស់ខ្លួន តាមរយៈការកសាងទំនាក់ទំនងជាដៃគូប្រកបដោយតុល្យភាព ជាមួយប្រទេសនានា ដោយផ្អែកលើការគោរពគ្នាទៅវិញទៅមក ផលប្រយោជន៍រួម និងផលប្រយោជន៍ជាតិ។
 ឯកឧត្តមទេសរដ្ឋមន្ត្រីក៏បានលើកឡើងពីតួនាទីដ៏សំខាន់របស់ អាស៊ាន ក្នុងការរក្សាការសន្ទនា និងកិច្ចសហប្រតិបត្តិការរវាងប្រទេសមានឥទ្ធិពលនៅក្នុងតំបន់។ ឯកឧត្តមបានបញ្ជាក់ថា ការទូត និងការកសាងទំនុកចិត្ត គឺជាឧបករណ៍ដ៏មានប្រសិទ្ធភាពក្នុងការទប់ស្កាត់ជម្លោះ ពង្រឹងការយោគយល់គ្នា និងបង្កើនភាពធន់របស់តំបន់។
 ជាចុងក្រោយ ឯកឧត្តមបណ្ឌិត លី ធុជ បានអំពាវនាវឱ្យប្រទេសទាំងអស់ជ្រើសរើសភាពជាដៃគូ និងកិច្ចសហប្រតិបត្តិការ ជំនួសការប្រឈមមុខដាក់គ្នា។ ឯកឧត្តមបានគូសបញ្ជាក់ថា ការរីកចម្រើនរបស់តំបន់អាស៊ី-ប៉ាស៊ីហ្វិក មិនគួរត្រូវបានមើលឃើញថាជាការគំរាមកំហែងនោះទេ ប៉ុន្តែគួរត្រូវបានចាត់ទុកជាឱកាសដ៏មានតម្លៃសម្រាប់ការកសាងភាពជាដៃគូ សន្តិភាព និងវិបុលភាពរួមគ្នា៕ ដោយ៖ ប៉ៃ សុឃីម

## Published fields

- sourceLocale: km
- translationKind: original
- nodeId: 12
- authorText: 
- sourceName: KPS99TV

## References