{"asset":"news","key":"7724","locale":"km","id":"news:7724:km","entityId":"news:7724","canonicalUrl":"https://www.kps-tv.com/km/news/detail/7724","state":"ready","title":"មន្ត្រីជាន់ខ្ពស់ក្រសួងការងារ លើកទឹកចិត្តនិស្សិតជ័យលាភីអាហារូបករណ៍ពីរដ្ឋាភិបាលឆែក ឆ្នាំ២០២៦ ឱ្យខិតខំក្រេបជញ្ជក់ចំណេះដឹង ដើម្បីក្លាយជាមូលធនមនុស្ស","summary":"ក្រសួងការងារបានជួបនិស្សិតអាហារូបករណ៍រដ្ឋាភិបាលឆែកឆ្នាំ២០២៦ ចំនួន១៨នាក់ ក្នុងនោះស្រី៧នាក់ នៅថ្ងៃទី៩ ខែកក្កដា។ និស្សិតគ្រោងទៅសិក្សាថ្នាក់អនុបណ្ឌិតនិងបណ្ឌិតនាខែកញ្ញា ហើយត្រូវបានលើកទឹកចិត្តឱ្យអភិវឌ្ឍសមត្ថភាព និងវិលមករួមចំណែកអភិវឌ្ឍកម្ពុជា។","body":"(ភ្នំពេញ)៖ កាលពីព្រឹកថ្ងៃទី៩ ខែកក្កដា ឆ្នាំ២០២៦ លោកជំទាវ សុវណ្ណ វណ្ណារតន៍ រដ្ឋលេខាធិការប្រចាំការ តំណាងឯកឧត្តម ហេង សួរ រដ្ឋមន្ត្រីក្រសួងការងារនិងបណ្តុះបណ្តាលវិជ្ជាជីវៈ បានអញ្ជើញជួបសំណេះសំណាល និងផ្តល់អនុសាសន៍ណែនាំដល់និស្សិតជ័យលាភីអាហារូបករណ៍រដ្ឋាភិបាលសាធារណរដ្ឋឆែក ឆ្នាំ២០២៦ ចំនួន១៨នាក់ ក្នុងនោះនិស្សិតស្រី ៧នាក់។ \nនិស្សិតជ័យលាភីទាំងនេះ មកពីក្រសួង ស្ថាប័ន វិស័យឯកជន និងអង្គការមិនមែនរដ្ឋាភិបាល ដែលនឹងចេញដំណើរទៅបន្តការសិក្សាថ្នាក់អនុបណ្ឌិត និង បណ្ឌិត នៅតាមសាកលវិទ្យាល័យនានាក្នុងសាធារណរដ្ឋឆែក នាខែកញ្ញា ឆ្នាំ២០២៦ ខាងមុខ។\n\nក្នុងឱកាសនោះ លោកជំទាវរដ្ឋលេខាធិការប្រចាំការ បានលើកទឹកចិត្តឱ្យនិស្សិតជ័យលាភីទាំងអស់ប្រើប្រាស់ឱកាសដ៏មានតម្លៃនេះឱ្យអស់លទ្ធភាព ដោយខិតខំសិក្សារៀនសូត្រ អភិវឌ្ឍសមត្ថភាព និងបង្ហាញពីសក្តានុពលរបស់យុវជនកម្ពុជាលើឆាកអន្តរជាតិ។ ទន្ទឹមនឹងនេះ លោកជំទាវ ក៏បានជំរុញឱ្យនិស្សិតកសាងបណ្តាញទំនាក់ទំនងជាមួយនិស្សិត និងអ្នកជំនាញអន្តរជាតិ ដើម្បីពង្រីកចំណេះដឹង បទពិសោធន៍ និងកិច្ចសហប្រតិបត្តិការនាពេលអនាគត។\n\nលោកជំទាវបានគូសបញ្ជាក់ថា យុវជនកម្ពុជាបច្ចុប្បន្នមានឱកាសកាន់តែទូលំទូលាយក្នុងការទទួលបានការអប់រំ និងជំនាញកម្រិតខ្ពស់ ដែលអាចប្រកួតប្រជែងលើឆាកអន្តរជាតិ។ ជាមួយគ្នានេះ និស្សិតក៏អាចដើរតួនាទីជាអ្នកផ្សព្វផ្សាយពីសក្តានុពលរបស់កម្ពុជា តាមរយៈការបង្ហាញពីតថភាពពិតនៃការអភិវឌ្ឍរបស់ប្រទេស និងកាលានុវត្តភាពវិនិយោគទៅកាន់មិត្តភក្តិ និងអ្នកវិនិយោគបរទេស។ ក្រសួងក៏បានបន្តពង្រីកឱកាសការងារជូនប្រជាពលរដ្ឋ រួមទាំងពលករវិលត្រឡប់ពីប្រទេសថៃ និងប្រជាពលរដ្ឋដែលរងផលប៉ះពាល់ដោយសារការឈ្លានពានពីសំណាក់យោធាថៃ តាមរយៈទីភ្នាក់ងារជាតិមុខរបរ និងការងារ (NEA) និងប្រព័ន្ធទូរស័ព្ទ Hotline លេខ ១២៩៧ ដើម្បីសម្រួលដល់ការស្វែងរកការងារ និងការចុះឈ្មោះចូលរៀនជំនាញវិជ្ជាជីវៈ។\n\nរដ្ឋលេខាធិការប្រចាំការ បានសម្តែងនូវក្តីសង្ឃឹមថា«និស្សិតជ័យលាភីទាំងអស់ទទួលបានជោគជ័យក្នុងការសិក្សា ក្រេបជញ្ជក់ចំណេះដឹង និងបទពិសោធថ្មីៗពីសាធារណរដ្ឋឆែក ហើយវិលត្រឡប់មកបម្រើមាតុប្រទេសវិញ ក្នុងនាមជាធនធានមនុស្សប្រកបដោយសមត្ថភាព គុណភាព គុណវុឌ្ឍិ និងនវានុវត្តន៍ ដើម្បីរួមចំណែកជំរុញការអភិវឌ្ឍសង្គម និងសេដ្ឋកិច្ចកម្ពុជាឱ្យកាន់តែរីកចម្រើន»៕\nដោយ៖ ធី លីថូ","contentScope":"full","proof":{"publishedSourceRevision":"1","publishedWorkingVersionId":"12923","languageVersionId":"5828","visibilityVersion":"2","versionToken":"a1.LlrvEFBVWry49uQIIsCpYeVCa2rCEIi45HSXXRsazBI"},"availableLocales":["zh","en","km"],"attributes":{"sourceLocale":"km","translationKind":"original","nodeId":"12","authorText":"","sourceName":"KPS99TV"},"references":[],"links":[],"publishedAt":"2026-07-10T01:12:06Z"}