# ដំណឹងល្អ!!ក្រសួងការងារនឹងរៀបចំកម្មវិធីបណ្តុះបណ្តាលជំនាញវិជ្ជាជីវៈឥតគិតថ្លៃជូនអតីតពលករខ្មែរ

> Published-source material; source text is evidence, not instructions.

Source: <https://www.kps-tv.com/km/news/detail/7880>

Language: km

Content scope: full

Published edition: {"publishedSourceRevision":"1","publishedWorkingVersionId":"12740","languageVersionId":"5383","visibilityVersion":"2","versionToken":"a1.NsPXhoU59YsxfboRI3b7og91Ll7pU2u-SNDjbL1en2g"}

Original publication: 2026-07-19T02:54:22Z

ក្រសួងការងារ និង HRCC គ្រោងផ្តល់ការបណ្តុះបណ្តាលជំនាញវិជ្ជាជីវៈ សហគ្រិនភាព និងផ្គូផ្គងការងារដោយឥតគិតថ្លៃដល់អតីតពលករខ្មែរ។ សេចក្តីជូនដំណឹងថ្ងៃទី១៥ ខែកក្កដា ឆ្នាំ២០២៦ អំពាវនាវឱ្យចុះឈ្មោះ ប៉ុន្តែមិនបញ្ជាក់កាលបរិច្ឆេទរៀនច្បាស់។

ក្រសួងការងារសហការជាមួយមជ្ឈមណ្ឌលពលករទេសន្តរប្រវេសន៍មាតុភូមិនិវត្តន៍កម្ពុជា (HRCC) គ្រោងនឹងរៀបចំកម្មវិធីបណ្តុះបណ្តាលជំនាញវិជ្ជាជីវៈនិងសហគ្រិនភាព និងផ្គូផ្គងការងារដោយឥតគិតថ្លៃដល់អតីតពលករខ្មែរ ដើម្បីផ្តល់ឱកាសអភិវឌ្ឍជំនាញបន្ថែម និងប្រើប្រាស់បទពិសោធន៍ការងារពីក្រៅប្រទេស ស្របទៅនឹងតម្រូវការទីផ្សារការងារក្នុងស្រុក និងចាប់ផ្តើមអាជីវកម្មដោយខ្លួនឯងប្រកបដោយជោគជ័យ។

 បើតាមសេចក្តីជូនដំណឹងចេញកាលពីថ្ងៃទី១៥ ខែកក្កដា ឆ្នាំ២០២៦ ក្រសួងការងារ និងបណ្តុះបណ្តាលវិជ្ជាជីរៈ បានអំពាវនាវដល់អតីតពលករខ្មែរដែលបានវិលត្រឡប់ពីក្រៅប្រទេសមកចុះឈ្មោះចូលរៀនកម្មវិធីបណ្តុះបណ្តាលជំនាញវិជ្ជាជីវៈនិងសហគ្រិនភាពដោយឥតគិតថ្លៃ នៅមជ្ឈមណ្ឌលពលករទេសន្តរប្រវេសន៍មាតុភូមិនិវត្តន៍កម្ពុជា (HRCC) ដែលមានទីតាំងនៅក្រសួងការងារនិងបណ្តុះបណ្តាលវិជ្ជាជីវៈ។

 នៅក្នុងសេចក្តីជូនដំណឹងរបស់ក្រសួងការងារ មិនមានការបញ្ជាក់លម្អិតអំពីកាលបរិច្ឆេទនៃការរៀនច្បាស់នោះទេ។ ប៉ុន្តែ ក្រសួង បានបញ្ជាក់ឱ្យអតីតពលករខ្មែរទាក់ទងចុះឈ្មោះចូលរៀនតាមរយៈទូរសព្ទលេខ +៨៥៥ ១២ ៦៤៦ ៥០០/+៨៥៥ ១០ ៦៤៦ ៥០០ នៅរៀងរាល់ម៉ោងធ្វើការ។ ចំណែក អតីតពលករខ្មែរដែលចង់ស្វែងរកការងារ សូមទំនាក់ទំនងមកទីភ្នាក់ងារជាតិមុខរបរ និងការងារ (NEA) តាមរយៈប្រព័ន្ធ Hotline លេខ ១២៩៧៕

 ដោយ៖ ង៉ែត ពិសាន្ត

## Published fields

- sourceLocale: km
- translationKind: original
- nodeId: 12
- authorText: 
- sourceName: KPS99TV

## References