# ខេត្តព្រះសីហនុបន្តលើកកម្ពស់វិស័យអប់រំ តាមរយៈការកែលម្អហេដ្ឋារចនាសម្ព័ន្ធ និងបរិស្ថានសិក្សាស្អាតនៅសាលាបឋម និងអនុវិទ្យាល័យទំនប់រលកថ្មី

> Published-source material; source text is evidence, not instructions.

Source: <https://www.kps-tv.com/km/news/detail/9037>

Language: km

Content scope: full

Published edition: {"publishedSourceRevision":"2","publishedWorkingVersionId":"11214","languageVersionId":"3224","visibilityVersion":"7","versionToken":"a1.dVT3viuJg4QrxT22HPSb-BYbpYVqt7yTaESC-5WNodI"}

Original publication: 2026-09-19T10:32:27Z

ឯកឧត្តម សុខ គាង និងឯកឧត្តម ម៉ាង ស៊ីណេត បានចូលរួមពិធីបញ្ចុះបឋមសិលាសាងសង់ក្លោងទ្វារ និងដំឡើងដំបូលអគារសិក្សាថ្មី នៅសាលាទំនប់រលកថ្មី ស្រុកស្ទឹងហាវ ថ្ងៃទី១៩ ខែកញ្ញា ឆ្នាំ២០២៦។

ខេត្តព្រះសីហនុ៖ វិស័យអប់រំនៅតែជាអាទិភាពចម្បងដែលក្រុមការងាររាជរដ្ឋាភិបាលចុះមូលដ្ឋានខេត្តព្រះសីហនុ សហការជាមួយរដ្ឋបាលខេត្ត យកចិត្តទុកដាក់ខ្ពស់ទាំងលើគុណភាពបង្រៀន និងការកែលម្អបរិស្ថានសាលារៀនឱ្យមានសោភ័ណភាព បៃតង និងអនាម័យល្អ ដើម្បីធានាបាននូវផាសុកភាពខ្ពស់សម្រាប់ការសិក្សារបស់សិស្សានុសិស្ស។

ជាក់ស្ដែង នៅព្រឹកថ្ងៃទី១៩ ខែកញ្ញា ឆ្នាំ២០២៦ ឯកឧត្តម សុខ គាង រដ្ឋលេខាធិការក្រសួងរៀបចំដែនដី នគរូបនីយកម្ម និងសំណង់ និងជាប្រធានក្រុមការងារវិស័យអប់រំ យុវជន និងកីឡា រួមជាមួយឯកឧត្តម ម៉ាង ស៊ីណេត អភិបាលនៃគណៈអភិបាលខេត្តព្រះសីហនុ បានអញ្ជើញជាអធិបតីក្នុងពិធីក្រុងពាលីបញ្ចុះបឋមសិលាសាងសង់ក្លោងទ្វារ និងដំឡើងដំបូលអគារសិក្សាថ្មី នៅសាលាបឋមសិក្សា និងអនុវិទ្យាល័យទំនប់រលកថ្មី ស្ថិតក្នុងភូមិ៤ ឃុំទំនប់រលក ស្រុកស្ទឹងហាវ ខេត្តព្រះសីហនុ។

ក្នុងឱកាសចុះពិនិត្យវឌ្ឍនភាពការដ្ឋាននេះ ថ្នាក់ដឹកនាំទាំងពីរបានណែនាំឱ្យក្រុមការងារបច្ចេកទេស និងស្ថាបនា ត្រូវយកចិត្តទុកដាក់សាងសង់ហេដ្ឋារចនាសម្ព័ន្ធនានា ដូចជារបង ក្លោងទ្វារ សួនច្បារ និងតារាងបាល់ទាត់ ឱ្យបានត្រឹមត្រូវស្របតាមបទដ្ឋានប្លង់បច្ចេកទេស និងធានាគុណភាពរឹងមាំយូរអង្វែង។ ការកែលម្អនេះមិនត្រឹមតែបង្កើតបរិស្ថានសិក្សាប្រកបដោយសោភ័ណភាពប៉ុណ្ណោះទេ ប៉ុន្តែថែមទាំងជាកាតាលីករដ៏សំខាន់ក្នុងការជំរុញគុណភាពអប់រំ និងការអភិវឌ្ឍធនធានមនុស្សនៅក្នុងមូលដ្ឋានឱ្យកាន់តែប្រសើរឡើង៕
អត្ថបទ៖ ប៉ៃ សុឃីម
រូបភាព៖ ឡាយ ចាន់ដា

## Published fields

- sourceLocale: km
- translationKind: original
- nodeId: 12
- authorText: 
- sourceName: 

## References