# មន្ទីរសុខាភិបាលខេត្តព្រះវិហារ ចុះបាញ់ថ្នាំមូសជាង ៤០០ខ្នងផ្ទះ ទប់ស្កាត់ការរាតត្បាតជំងឺគ្រុនឈាម

> Published-source material; source text is evidence, not instructions.

Source: <https://www.kps-tv.com/km/news/detail/9052>

Language: km

Content scope: full

Published edition: {"publishedSourceRevision":"2","publishedWorkingVersionId":"11203","languageVersionId":"3215","visibilityVersion":"5","versionToken":"a1.f9bC6V6A4bAFOHUY-TjdolXfgVfSaJ5sHbj49SltrIc"}

Original publication: 2026-09-20T07:33:49Z

ក្រុមការងារសុខាភិបាល និងអ្នកស្ម័គ្រចិត្តបានបាញ់ថ្នាំសម្លាប់មូសតាមផ្ទះ៤០៥ខ្នង នៅក្រុងព្រះវិហារ ថ្ងៃទី១៩ ខែកញ្ញា ឆ្នាំ២០២៦ និងអំពាវនាវឱ្យប្រជាពលរដ្ឋលុបបំបាត់ប្រភពកកើតមូស និងការពារការឆ្លងជំងឺគ្រុនឈាម។

ក្រុមការងារគ្រុនឈាមនៃមន្ទីរសុខាភិបាលខេត្តព្រះវិហារ សហការជាមួយមណ្ឌលសុខភាពត្បែង និងអ្នកស្ម័គ្រចិត្តភូមិហ្មសែត បានចុះយុទ្ធនាការបាញ់ថ្នាំសម្លាប់មូសនៅតាមខ្នងផ្ទះប្រជាពលរដ្ឋសរុប ៤០៥ខ្នង ក្នុងភូមិហ្មសែត សង្កាត់កំពង់ប្រណាក ក្រុងព្រះវិហារ កាលពីថ្ងៃទី១៩ ខែកញ្ញា ឆ្នាំ២០២៦។
លោកវេជ្ជបណ្ឌិត គួង ឡូ ទីប្រឹក្សាក្រសួងសុខាភិបាល និងជាប្រធានមន្ទីរសុខាភិបាលខេត្តព្រះវិហារ បានគូសបញ្ជាក់ថា ប្រតិបត្តិការនេះធ្វើឡើងដើម្បីកាត់បន្ថយ និងទប់ស្កាត់ការចម្លងជំងឺគ្រុនឈាមដែលបង្កឡើងដោយមូសខ្លា។ លោកបានសង្កត់ធ្ងន់ថា ទោះបីការបាញ់ថ្នាំអាចជួយកាត់បន្ថយសត្វមូសបានមួយកម្រិតក្តី ប៉ុន្តែវិធានការដែលមានប្រសិទ្ធភាព និងចីរភាពបំផុត គឺផ្ដើមចេញពីការចូលរួមរបស់ប្រជាពលរដ្ឋផ្ទាល់។

ទន្ទឹមនឹងនេះ លោកប្រធានមន្ទីរបានអំពាវនាវដល់សាធារណជនចូលរួម លុបបំបាត់ប្រភពកកើតមូសខ្លា ត្រូវសម្អាតបរិស្ថានជុំវិញផ្ទះ កម្ចាត់វត្ថុដក់ទឹក គ្របពាង ធុង ឬអាងទឹកឱ្យជិត និងផ្លាស់ប្តូរទឹកជាប្រចាំ ការពារពីការមូសខាំត្រូវ គេងក្នុងមុង និងប្រើប្រាស់មធ្យោបាយការពារផ្សេងៗ។
ប្រុងប្រយ័ត្នសុខភាព ករណីមានរោគសញ្ញាសង្ស័យ ដូចជាក្ដៅខ្លួនខ្លាំង ឈឺក្បាល ឈឺសាច់ដុំ ឬសន្លាក់ ត្រូវប្រញាប់ទៅពិនិត្យ និងព្យាបាលនៅមណ្ឌលសុខភាព ឬមន្ទីរពេទ្យដែលនៅជិតជាបន្ទាន់ ដោយមិនត្រូវទិញថ្នាំលេបដោយខ្លួនឯងឡើយ៕

ដោយ៖ ប៉ៃ សុឃីម

## Published fields

- sourceLocale: km
- translationKind: original
- nodeId: 12
- authorText: 
- sourceName: 

## References