# កម្ពុជា-ចិន បន្តដៃគូរឹងមាំ! វាយតម្លៃខ្ពស់លើលទ្ធផលបោសសម្អាតបទល្មើសអនឡាញខុសច្បាប់ និងឧក្រិដ្ឋកម្មឆ្លងដែន

> Published-source material; source text is evidence, not instructions.

Source: <https://www.kps-tv.com/km/news/detail/9232>

Language: km

Content scope: full

Published edition: {"publishedSourceRevision":"2","publishedWorkingVersionId":"10940","languageVersionId":"2680","visibilityVersion":"5","versionToken":"a1.YaPebX3YN-ztDGTrRO-KTgupKvxDMLE15zj1xB0VZaY"}

Original publication: 2026-09-25T03:03:11Z

នៅថ្ងៃទី២៤ ខែកញ្ញា ឆ្នាំ២០២៦ ឯកឧត្តម ស សុខា បានទទួលស្វាគមន៍ឯកឧត្តម យ៉ាង វៃលីន នៅទីស្តីការក្រសួងមហាផ្ទៃ ដើម្បីពិភាក្សាអំពីកិច្ចសហប្រតិបត្តិការអនុវត្តច្បាប់កម្ពុជា-ចិន។

ភ្នំពេញ៖ភាពជាដៃគូអនុវត្តច្បាប់រវាងកម្ពុជានិងចិនកាន់តែស្អិតរមួត ស្របពេលដែលថ្នាក់ដឹកនាំជាន់ខ្ពស់នៃស្ថាប័នសន្តិសុខនៃប្រទេសទាំងពីរ បានជួបពិភាក្សាការងារយ៉ាងយកចិត្តទុកដាក់ កាលពីរសៀលថ្ងៃទី២៤ ខែកញ្ញា ឆ្នាំ២០២៦ នៅទីស្តីការក្រសួងមហាផ្ទៃ។ ក្នុងឱកាសនោះ ឯកឧត្តមអភិសន្តិបណ្ឌិត ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បានរៀបចំពិធីទទួលស្វាគមន៍ផ្លូវការប្រកបដោយកិត្តិយសជូន ឯកឧត្តម យ៉ាង វៃលីន អនុរដ្ឋមន្ត្រីក្រសួងសន្តិសុខសាធារណៈ នៃសាធារណរដ្ឋប្រជាមានិតចិន ដើម្បីរួមគ្នាបើកកិច្ចប្រជុំបូកសរុបលទ្ធផលការងារ និងឈានទៅចុះហត្ថលេខាលើផែនការបន្តឆ្នាំនៃកិច្ចសហប្រតិបត្តិការអនុវត្តច្បាប់ទ្វេភាគី។

 របៀបវារៈស្នូលនៃកិច្ចពិភាក្សាទ្វេភាគី បានផ្តោតលើការចែករំលែកបទពិសោធជាក់ស្តែង និងការពង្រឹងវិធានការក្តៅក្នុងការទប់ស្កាត់បទល្មើសឆបោកតាមប្រព័ន្ធបច្ចេកវិទ្យា (Online Scams) ព្រមទាំងបណ្តាញឧក្រិដ្ឋកម្មឆ្លងដែននានា រួមមានការជួញដូរមនុស្ស បញ្ហាគ្រឿងញៀន និងការចរាចរណ៍ទំនិញខុសច្បាប់។ ថ្នាក់ដឹកនាំទាំងពីររូបបានសម្តែងការកោតសរសើរ និងថ្លែងអំណរគុណយ៉ាងជ្រាលជ្រៅចំពោះកងកម្លាំងមានសមត្ថកិច្ចនៃភាគីទាំងសងខាង ដែលបានប្រឹងប្រែងបំពេញបេសកកម្មរួមគ្នាដោយភាពស្មោះត្រង់ និងសម្រេចបានស្នាដៃជាក់ស្តែងជាច្រើនគួរឱ្យកត់សម្គាល់។

 ជាចុងក្រោយ ប្រមុខស្ថាប័នអនុវត្តច្បាប់ទាំងកម្ពុជានិងចិន បានបង្ហាញនូវការពេញចិត្តជាខ្លាំងចំពោះវឌ្ឍនភាពការងារនាពេលកន្លងមក ជាពិសេសប្រតិបត្តិការបង្ក្រាបសំបុកបទល្មើសអនឡាញ ដែលទទួលបានការគាំទ្រ និងការអបអរសាទរទៅវិញទៅមក។ ភាពជោគជ័យនេះ គឺជាសក្ខីភាពបញ្ជាក់យ៉ាងច្បាស់ពីការប្តេជ្ញាចិត្តខ្ពស់របស់រដ្ឋាភិបាលទាំងពីរ ក្នុងការថែរក្សាសន្តិសុខ សណ្តាប់ធ្នាប់សង្គម និងការការពារសុវត្ថិភាពជូនប្រជាពលរដ្ឋឱ្យកាន់តែមានប្រសិទ្ធភាពខ្ពស់៕ដោយ៖ ស្រីពី

## Published fields

- sourceLocale: km
- translationKind: original
- nodeId: 12
- authorText: 
- sourceName: 

## References