# សប្តាហ៍គាំពារសង្គមកម្ពុជា ឆ្នាំ២០២៦ បើកជាផ្លូវការ

> Published-source material; source text is evidence, not instructions.

Source: <https://www.kps-tv.com/km/news/detail/9468>

Language: km

Content scope: full

Published edition: {"publishedSourceRevision":"3","publishedWorkingVersionId":"10897","languageVersionId":"2577","visibilityVersion":"5","versionToken":"a1.XbO4XAZyWH96T3TwWBuVOlpqrL8enrGotJ-qY3qgW4E"}

Original publication: 2026-09-30T10:35:42Z

សប្តាហ៍គាំពារសង្គមកម្ពុជា ឆ្នាំ២០២៦ បើកថ្ងៃទី៣០ ខែកញ្ញា ដោយផ្តោតលើប្រធានបទ៧ រហូតដល់ថ្ងៃទី១ ខែតុលា និងប្រកាសផែនការអនុវត្តក្របខណ្ឌគាំពារសង្គមឆ្លើយតបនឹងគ្រោះអាសន្ន ឆ្នាំ២០២៦–២០៣០។

(ភ្នំពេញ)៖ នាថ្ងៃទី៣០ ខែកញ្ញា ឆ្នាំ២០២៦ ឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ និងជាប្រធានក្រុមប្រឹក្សាជាតិគាំពារសង្គម បានអញ្ជើញជាអធិបតីក្នុងពិធីបើក សប្តាហ៍គាំពារសង្គមកម្ពុជា ឆ្នាំ២០២៦ ក្រោមមូលបទ«គាំពារសង្គមក្នុងអំឡុងពហុវិបត្តិ ក្នុងបរិបទកម្ពុជា និងតំបន់៖ នវានុវត្តន៍ កិច្ចសហប្រតិបត្តិការ ភាពធន់ និងចីរភាព»។ 

ពិធីបើកសប្តាហ៍គាំពារសង្គមឆ្នាំ២០២៦នេះ មានការអញ្ជើញចូលរួមពីសំណាក់ រដ្ឋមន្រ្តីនានា អនុប្រធាន និងសមាជិកក្រុមប្រឹក្សាជាតិគាំពារសង្គម, ប្រធាន-អនុប្រធាន និងសមាជិកគណៈកម្មាធិការប្រតិបត្តិនៃក្រុមប្រឹក្សាជាតិគាំពារសង្គម, លោកជំទាវ Vladanka Andreeva អ្នកសម្របសម្រួលអង្គការសហប្រជាជាតិប្រចាំកម្ពុជា (UNRC), ឯកឧត្តម Derek Yip ឯកអគ្គរដ្ឋទូតអូស្ត្រាលីប្រចាំកម្ពុជា, ថ្នាក់ដឹកនាំតំណាងក្រសួង-ស្ថាប័នពាក់ព័ន្ធនានាជាច្រើនទៀត។ 

ស្របពេលជាមួយគ្នានោះ ក៏មានការប្រកាសដាក់ឱ្យអនុវត្តជាផ្លូវការនូវ
«ផែនការប្រតិបត្តិសម្រាប់អនុវត្តគោលការណ៍ណែនាំ ស្តីពីក្របខណ្ឌកិច្ចគាំពារសង្គមឆ្លើយតបនឹងគ្រោះអាសន្ន ឆ្នាំ២០២៦–២០៣០» ដើម្បីពង្រឹងការផ្តល់កិច្ចគាំពារដល់ប្រជាពលរដ្ឋរងផលប៉ះពាល់ឱ្យបានទាន់ពេល និងមានប្រសិទ្ធភាព ព្រមទាំងគាំទ្រការស្តារជីវភាពក្រោយគ្រោះអាសន្ន។

សូមជម្រាបថា សប្តាហ៍គាំពារសង្គមកម្ពុជា ឆ្នាំ២០២៦ មានការអញ្ជើញចូលរួមដោយអ្នកតាក់តែងគោលនយោបាយ ប្រតិបត្តិករ និងអ្នកជំនាញក្នុងប្រទេស និងអន្តរជាតិ ដើម្បីចូលរួមផ្តល់ជាវេទិកាពិភាក្សាសម្រាប់ចែករំលែកបទពិសោធ និងចំណេះដឹងពាក់ព័ន្ធនឹងកិច្ចគាំពារសង្គម ដែលនឹងផ្តោតលើប្រធានបទគន្លឹះចំនួន ៧ តាមវគ្គពិភាក្សានីមួយៗចាប់ពីថ្ងៃទី៣០ ខែកញ្ញា ដល់ថ្ងៃទី១ ខែតុលា ឆ្នាំ២០២៦៕ 
ដោយ៖ ស្រីពី

## Published fields

- sourceLocale: km
- translationKind: original
- nodeId: 12
- authorText: 
- sourceName: 

## References