{"asset":"news","key":"9537","locale":"km","id":"news:9537:km","entityId":"news:9537","canonicalUrl":"https://www.kps-tv.com/km/news/detail/9537","state":"ready","title":"ស្មារតីសមរភូមិក្រោយជួយសមរភូមិមុខ៖ លោកជំទាវ ចម និម្មល នាំយកអំណោយលើកទឹកចិត្តដល់កងទ័ពបញ្ជាការដ្ឋានកាំភ្លើងធំក្នុងឱកាសបុណ្យភ្ជុំបិណ្ឌ","summary":"នៅថ្ងៃទី៤ ខែតុលា រដ្ឋមន្ត្រីក្រសួងពាណិជ្ជកម្ម ចម និម្មល ដឹកនាំប្រតិភូចុះសួរសុខទុក្ខកងទ័ពបញ្ជាការដ្ឋានកាំភ្លើងធំ និងប្រគល់ថវិកា ស្បៀង និងសម្ភារប្រើប្រាស់ក្នុងឱកាសបុណ្យភ្ជុំបិណ្ឌ។","body":"ដើម្បីចូលរួមអបអរសាទរពិធីបុណ្យភ្ជុំបិណ្ឌប្រពៃណីជាតិ និងរឹតចំណងសាមគ្គីភាពឱ្យកាន់តែស្អិតល្មួត លោកជំទាវ ចម និម្មល រដ្ឋមន្ត្រីក្រសួងពាណិជ្ជកម្ម បានដឹកនាំគណៈប្រតិភូចុះសួរសុខទុក្ខ សំណេះសំណាល និងនាំយកអំណោយឧបត្ថម្ភជាច្រើនប្រគល់ជូនដល់នាយទាហាន នាយទាហានរង និងពលទាហាន នៃបញ្ជាការដ្ឋានកាំភ្លើងធំ កងទ័ពជើងគោក នាព្រឹកថ្ងៃទី៤ ខែតុលា ឆ្នាំ២០២៦។\nវត្តមានរបស់គណៈប្រតិភូក្រសួងពាណិជ្ជកម្ម ត្រូវបានទទួលស្វាគមន៍យ៉ាងកក់ក្តៅ និងស្និទ្ធស្នាលបំផុតពីសំណាក់ ឯកឧត្តម ឧត្តមសេនីយ៍ឯក ពៅ សុខា មេបញ្ជាការរងកងទ័ពជើងគោក និងជាមេបញ្ជាការបញ្ជាការដ្ឋានកាំភ្លើងធំ រួមជាមួយថ្នាក់ដឹកនាំ ព្រមទាំងយោធិនទូទាំងអង្គភាព។\nថ្លែងនៅក្នុងពិធីសំណេះសំណាល លោកជំទាវរដ្ឋមន្ត្រី បានសង្កត់ធ្ងន់ពីស្មារតី «សមរភូមិក្រោយ ជួយគាំទ្រសមរភូមិមុខ» ដោយគូសរំលេចថា គិតចាប់តាំងពីឆ្នាំ២០១៤ មក ក្រសួងពាណិជ្ជកម្មតែងតែឈរយ៉ាងរឹងមាំក្នុងនាមជាអង្គភាពសម្ព័ន្ធមេត្រីភាព តាមរយៈការចូលរួមចំណែកយ៉ាងសកម្មក្នុងការកសាងហេដ្ឋារចនាសម្ព័ន្ធចាំបាច់ ព្រមទាំងផ្គត់ផ្គង់គ្រឿងឧបភោគបរិភោគជាប្រចាំ។ កាយវិការទាំងនេះ ធ្វើឡើងក្នុងគោលបំណងឆ្លើយតបចំពោះតម្រូវការជាក់ស្ដែង ព្រមទាំងជួយលើកកម្ពស់ជីវភាព និងសុខុមាលភាពរបស់បងប្អូនវីរកងទ័ពឱ្យកាន់តែប្រសើរឡើង។\nបន្ថែមពីលើសារសួរសុខទុក្ខប្រកបដោយក្តីស្រឡាញ់ លោកជំទាវរដ្ឋមន្ត្រី ក៏បានប្រគល់ថវិកា ស្បៀងអាហារ និងសម្ភារប្រើប្រាស់ចាំបាច់មួយចំនួនដល់អង្គភាព ដើម្បីជួយសម្រាលតម្រូវការប្រចាំថ្ងៃ និងបង្កបរិយាកាសរីករាយដល់កងទ័ពក្នុងរដូវបុណ្យភ្ជុំបិណ្ឌ ដែលជាការឆ្លុះបញ្ចាំងឱ្យឃើញពីចំណងមិត្តភាព និងការដឹងគុណយ៉ាងជ្រាលជ្រៅចំពោះការលះបង់របស់កងកម្លាំងការពារជាតិ៕ ដោយ៖ ប៉ៃ សុឃីម","contentScope":"full","proof":{"publishedSourceRevision":"3","publishedWorkingVersionId":"11015","languageVersionId":"2493","visibilityVersion":"7","versionToken":"a1.X1D_I4JmUMBPW20F6h-VGUAkBCkOgflw7nqzvRqUTiU"},"availableLocales":["zh","en","km"],"attributes":{"sourceLocale":"km","translationKind":"original","nodeId":"12","authorText":"","sourceName":""},"references":[],"links":[],"publishedAt":"2026-10-04T07:49:52Z"}