ថ្ងៃនេះ គឺជាថ្ងៃទី៤៥ហើយដែលវីរកងទ័ពកម្ពុជាចំនួន១៨រូបត្រូវបានកងយោធាថៃចាប់ខ្លួន និងដាក់ឱ្យស្ថិតក្រោមការឃុំខ្លួន។ រាជរដ្ឋាភិបាលកម្ពុជាបានអំពាវនាវជាថ្មីដល់ភាគីថៃឱ្យពិចារណាដោះលែងកងទ័ពទាំង១៨រូប ឱ្យបានឆាប់រហ័ស និងឲ្យពួកគាត់អាចវិលត្រឡប់មកជួបជុំគ្រួសារវិញដោយសុវត្ថិភាពស្របតាមច្បាប់ និងកាតព្វកិច្ចមនុស្សធម៌អន្តរជាតិ។
តាមការបញ្ជាក់រដ្ឋាភិបាលកម្ពុជា ក្រសួងការពារជាតិ និងកងយោធពលខេមរភូមិន្ទកំពុងប្រើប្រាស់គ្រប់យន្តការដោយមិនអស់ការខិតខំដើម្បីជំរុញឱ្យមានដំណោះស្រាយ និងឲ្យកងទ័ពទាំង១៨នាក់ត្រូវបានដោះលែងវិលត្រឡប់មកប្រទេសកម្ពុជាវិញឲ្យបានឆាប់រហ័សជាទីបំផុត។
រាជរដ្ឋាភិបាល ក្រសួងការពារជាតិ និងកងយោធពលខេមរភូមិន្ទ មិនដែលបោះបង់កងកម្លាំងរបស់យើងណាម្នាក់ចោលនោះឡើយ ទោះក្នុងកាលៈទេសៈណាក៏ដោយ។
ដោយ៖ ស្ថានីយទូរទស្សន៍ខេត្តព្រះសីហនុ
