ប្រទេសកម្ពុជា និងថៃ ត្រៀមចុះហត្ថលេខាលើកិច្ចព្រមព្រៀងសន្តិភាពមួយថ្មី នៅថ្ងៃទី២៦ ខែតុលា ឆ្នាំ២០២៥ ខាងមុខនេះ នៅប្រទេសម៉ាឡេស៊ី ក្នុងពិធីដឹកនាំដោយលោក អាន់វ៉ា អ៊ីប្រាហ៊ីម នាយករដ្ឋមន្ត្រីម៉ាឡេស៊ី និងមានការចូលរួមជាសាក្សីពីប្រធានាធិបតីសហរដ្ឋអាមេរិក លោក ដូណាល់ ត្រាំ។
កិច្ចព្រមព្រៀងសន្តិភាពនេះ ត្រូវបានរៀបចំឡើង បន្ទាប់ពីកម្ពុជា និងថៃ បានព្រមព្រៀងលើបទឈប់បាញ់កាលពីថ្ងៃទី២៨ ខែកក្កដា ឆ្នាំ២០២៥ ដើម្បីបញ្ចប់ការប៉ះទង្គិចតាមបណ្តោយព្រំដែន។ ទោះជាយ៉ាងណា កិច្ចព្រមព្រៀងសន្តិភាពថ្មីនេះ មានគោលបំណងពង្រឹងការអនុវត្តបទឈប់បាញ់ និងបង្កើតយន្តការបណ្តាញសន្តិភាពអចិន្ត្រៃយ៍ជាផ្លូវការ។
តាមការវិភាគរបស់អ្នកជំនាញ កិច្ចព្រមព្រៀងសន្តិភាពថ្មីមានសារៈសំខាន់ចម្បងចំនួនប្រាំប្រការ៖
១. ដោះស្រាយមូលហេតុនៃជម្លោះ។ បទឈប់បាញ់កាលពីខែកក្កដា មានតួនាទីបញ្ឈប់ការប្រយុទ្ធ ប៉ុន្តែមិនទាន់ដោះស្រាយបញ្ហាមូលដ្ឋានដូចជា ការកំណត់ព្រំដែន ការដកកងទ័ព និងបញ្ហាប្រាសាទដែលមានជម្លោះនៅឡើយ។
២. ធ្វើឲ្យដំណើរការសន្តិភាពក្លាយជាផ្លូវការ។ កិច្ចព្រមព្រៀងនេះនឹងបម្លែងពីបទឈប់បាញ់បណ្តោះអាសន្នទៅជាសន្ធិសញ្ញាផ្លូវការ មានយន្តការត្រួតពិនិត្យ កំណត់ពេលវេលា និងការចូលរួមរបស់អ្នកសង្កេតការណ៍អន្តរជាតិ។
៣. កសាងទំនុកចិត្ត និងទប់ស្កាត់ជម្លោះថ្មី។ កិច្ចព្រមព្រៀងនេះនឹងរួមបញ្ចូលវិធានដូចជា តំបន់គ្មានយោធា ការល្បាតរួម និងប្រព័ន្ធទំនាក់ទំនងបន្ទាន់ ដើម្បីការពារការយល់ច្រឡំ និងការប៉ះទង្គិចឡើងវិញ។
៤. ជាសញ្ញានយោបាយនិងការទូតសំខាន់។ កិច្ចព្រមព្រៀងនេះបង្ហាញពីការប្តេជ្ញាចិត្តរបស់ប្រទេសទាំងពីរចំពោះសន្តិភាព និងស្ថិរភាពក្នុងតំបន់ ដែលអាចបង្កើនភាពជឿទុកចិត្តពីសហគមន៍អន្តរជាតិ និងអ្នកវិនិយោគ។
៥. បង្កើតក្របខ័ណ្ឌសហប្រតិបត្តិការទូលំទូលាយ។ កិច្ចព្រមព្រៀងសន្តិភាពអាចនាំឲ្យមានកិច្ចសហប្រតិបត្តិការថ្មីៗលើវិស័យសេដ្ឋកិច្ច ពាណិជ្ជកម្មតាមព្រំដែន និងវប្បធម៌ ដើម្បីបង្កើតទំនាក់ទំនងយូរអង្វែងរវាងប្រទេសទាំងពីរ។
ប្រជាពលរដ្ឋខ្មែរមានក្តីសង្ឃឹមថា ក្រោយពិធីចុះហត្ថលេខាកិច្ចព្រមព្រៀងសន្តិភាពនេះ ស្ថានការណ៍តាមបណ្តោយព្រំដែននឹងស្ថិតក្នុងសភាពស្ងប់ស្ងាត់ ការរំខានដល់ជីវភាពប្រជាពលរដ្ឋនឹងត្រូវបញ្ចប់ និងទំនាក់ទំនងរវាងប្រទេសទាំងពីរនឹងអភិវឌ្ឍទៅក្នុងទិសដៅសន្តិភាព និងស្ថិរភាពជានិច្ច៕
ដោយ៖ ស្ថានីយទូរទស្សន៍ខេត្តព្រះសីហនុ
