នាព្រឹកថ្ងៃទី០៤ ខែមីនា ឆ្នាំ២០២៦ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា អញ្ជើញជាអធិបតីបើក “កិច្ចប្រជុំកំពូលធុរកិច្ចអាស៊ាន–កម្ពុជា ឆ្នាំ២០២៦” ដែលប្រារព្ធឡើងនៅសណ្ឋាគារ Sofitel Phnom Penh ក្នុងរាជធានីភ្នំពេញ។
វេទិកាកំពូលនេះ បង្ហាញពីភាពជាដៃគូយុទ្ធសាស្ត្រដ៏រឹងមាំ និងយូរអង្វែង រវាងសភាពាណិជ្ជកម្មកម្ពុជា អាស៊ាន–BAC កម្ពុជា និងបណ្តាញសភាពាណិជ្ជកម្មអន្តរជាតិ ព្រមទាំងសមាគមធុរកិច្ចជាដៃគូទូទាំងតំបន់ និងសកលលោក។
ការរៀបចំកិច្ចប្រជុំកំពូលនេះ កើតឡើងក្នុងបរិបទសេដ្ឋកិច្ចពិភពលោកកំពុងប្រឈមការប្រកួតប្រជែងយុទ្ធសាស្ត្រកាន់តែខ្លាំងរវាងមហាអំណាចធំៗ។ អាស៊ានកំពុងឆ្លងកាត់សម្ពាធពីភាពតានតឹងរវាងសហរដ្ឋអាមេរិក និងចិន ខណៈរលកថ្មីនៃវិធានការពន្ធឯកតោភាគី និងការឆ្លើយតបជាបន្តបន្ទាប់ បានបង្កើនការបែកបាក់សេដ្ឋកិច្ច និងបំលែងទិសដៅពីប្រព័ន្ធពាណិជ្ជកម្មពហុភាគីផ្អែកលើបទបញ្ញត្តិ ចូលទៅរកសណ្តាប់ធ្នាប់សកលដែលផ្អែកលើប្រតិបត្តិការ និងផលប្រយោជន៍ជាក់ស្តែង។
ស្ថានការណ៍នេះត្រូវបានបន្ថែមភាពស្មុគស្មាញ ដោយការកើនឡើងនៃជម្លោះនៅមជ្ឈិមបូព៌ា ដែលប៉ះពាល់ដល់ស្ថិរភាពថាមពលសកល។ ការកើនឡើងតម្លៃប្រេងឆៅប្រភេទ Brent និងការរំខាននៅច្រកសមុទ្រ Hormuz ដែលជាចំណុចសំខាន់សម្រាប់ការដឹកជញ្ជូនប្រេងប្រមាណ ២០% នៃពិភពលោក បានបង្កសម្ពាធអតិផរណាដល់អាជីវកម្មក្នុងតំបន់។
ក្នុងបរិយាកាសអន្ដរជាតិដ៏មិនប្រាកដប្រជា អាស៊ានបន្តផ្អែកលើគោលការណ៍បើកចំហ អព្យាក្រឹតភាព និងមជ្ឈភាព ជាជំហរយុទ្ធសាស្ត្រដើម្បីរក្សាស្ថិរភាពតំបន់។ ភារកិច្ចរួមគឺធានាថា កិច្ចសហប្រតិបត្តិការសេដ្ឋកិច្ចត្រូវបានដឹកនាំដោយគោលការណ៍យុត្តិធម៌ តម្លាភាព និងការគោរពគ្នាទៅវិញទៅមក ខណៈអាស៊ានបន្តមានតួនាទីជាកម្លាំងជំរុញសន្ទនា និងការភ្ជាប់ទីផ្សារ។
ទោះបីប្រឈមបញ្ហាប្រឈមសកលក៏ដោយ តំបន់អាស៊ីអាគ្នេយ៍នៅតែត្រូវបានទស្សនាថាជាតំបន់មានភាពធន់ ថាមវន្ត និងកាលានុវត្តភាពខ្ពស់។ តាមការព្យាករ នៅឆ្នាំ២០៣០ អាស៊ានអាចក្លាយជាសេដ្ឋកិច្ចធំទីបួនរបស់ពិភពលោក ជាមួយផលិតផលក្នុងស្រុកសរុបជិត ១០ ទ្រីលានដុល្លារអាមេរិក។ កំណើននេះ គឺជាលទ្ធផលនៃគោលនយោបាយជាក់ស្តែង កិច្ចសហប្រតិបត្តិការតំបន់ និងការចូលរួមយ៉ាងសកម្មរបស់វិស័យឯកជន។
កិច្ចប្រជុំកំពូលឆ្នាំ២០២៦ សាងសង់លើមូលដ្ឋានបទពិសោធន៍ និងមរតករបស់កម្ពុជា ក្នុងនាមម្ចាស់ផ្ទះកិច្ចប្រជុំកំពូលអាស៊ានឆ្នាំ២០០២, ២០១២ និង ២០២២។ ព្រឹត្តិការណ៍នេះ មិនត្រឹមតែជាការរំលឹកសមិទ្ធផលកន្លងមកទេ ប៉ុន្តែជាវេទិកាសំខាន់សម្រាប់កំណត់ទិសដៅអនាគត។
ក្រោមប្រធានបទ “បរិវត្តកម្មអាស៊ាន៖ នវានុវត្តន៍ សមាហរណកម្ម និងការវិវត្តន៍ឧស្សាហកម្ម” កិច្ចប្រជុំផ្តោតលើការឆ្លើយតបចំពោះការប្រែប្រួលសេដ្ឋកិច្ចសកលយ៉ាងលឿន។
ឆ្នាំ២០២៦ ត្រូវបានកត់សម្គាល់ជាឆ្នាំសំខាន់សម្រាប់នវានុវត្តន៍ឌីជីថល ជាពិសេសការចុះហត្ថលេខាលើកិច្ចព្រមព្រៀងក្របខ័ណ្ឌសេដ្ឋកិច្ចឌីជីថលអាស៊ាន (DEFA) ដែលរំពឹងថានឹងជំរុញសេដ្ឋកិច្ចឌីជីថលតំបន់ឱ្យកើនដល់ប្រមាណ ២ ទ្រីលានដុល្លារអាមេរិកនៅឆ្នាំ២០៣០។
ជាមួយគ្នានេះ ការធ្វើសមាហរណកម្មសេដ្ឋកិច្ចកាន់តែស៊ីជម្រៅ តាមរយៈភាពជាដៃគូសេដ្ឋកិច្ចគ្រប់ជ្រុងជ្រោយក្នុងតំបន់ កំពុងជំរុញការសមកាលកម្មខ្សែសង្វាក់ផ្គត់ផ្គង់ជាមួយដៃគូសំខាន់ៗ រួមមានចិន ជប៉ុន សាធារណរដ្ឋកូរ៉េ អូស្ត្រាលី និងនូវែលសេឡង់។
បន្ថែមពីនេះ ការផ្លាស់ប្តូរបៃតងកំពុងទទួលបានសន្ទុះ ដោយការភ្ជាប់បណ្តាញថាមពលក្នុងតំបន់អនុញ្ញាតឱ្យថាមពលកកើតឡើងវិញឆ្លងកាត់ព្រំដែន និងគាំទ្រកំណើនប្រកបដោយចីរភាព និងបរិយាប័ន្ន ចាប់ពីអនុតំបន់មេគង្គរហូតដល់សមុទ្រជ្វា។
កិច្ចប្រជុំកំពូលធុរកិច្ចអាស៊ាន–កម្ពុជា ឆ្នាំ២០២៦ ដូច្នេះ គឺជាវេទិកាយុទ្ធសាស្ត្រសំខាន់មួយ សម្រាប់ពង្រឹងភាពជាមជ្ឈភាពរបស់អាស៊ាន និងលើកកម្ពស់ការចូលរួមរបស់វិស័យឯកជន ក្នុងការបង្កើតអនាគតសេដ្ឋកិច្ចតំបន់ប្រកបដោយភាពធន់ នវានុវត្តន៍ និងចីរភាព។ ដោយ៖ KPS99TV
