ដើម្បីរួមចំណែកកែលម្អហេដ្ឋារចនាសម្ព័ន្ធក្នុងតំបន់ឱ្យកាន់តែមានរបៀបរៀបរយ ឯកឧត្តម ម៉ាង ស៊ីណេត អភិបាល នៃគណៈអភិបាលខេត្តព្រះសីហនុ បានដឹកនាំក្រុមការងារបច្ចេកទេស និងអាជ្ញាធរពាក់ព័ន្ធ ចុះពិនិត្យមើលវឌ្ឍនភាពនៃការសាងសង់ផ្លូវបេតុង១ខ្សែ ស្ថិតនៅតាមបណ្តោយផ្លូវឧកញ៉ា ប៉ោ សួន ក្នុងភូមិ១ សង្កាត់លេខ៣ ក្រុងព្រះសីហនុ កាលពីថ្ងៃទី២០ ខែសីហា ឆ្នាំ២០២៦។ ផ្លូវបេតុងឆ្អឹងដែកមួយខ្សែនេះ មានប្រវែង ៣២០ម៉ែត្រ ទទឹង ៨ម៉ែត្រ ព្រមទាំងបំពាក់ប្រព័ន្ធលូរំដោះទឹកអមសងខាងផ្លូវ ដើម្បីធានាការប្រើប្រាស់បានយូរអង្វែង និងកាត់បន្ថយការលិចលង់។
គម្រោងហេដ្ឋារចនាសម្ព័ន្ធមូលដ្ឋាននេះ ចំណាយថវិកាសរុបប្រមាណ ១៥០,០០០ដុល្លារអាមេរិក ដែលជាអំណោយសប្បុរសធម៌ផ្ទាល់ខ្លួនរបស់លោកជំទាវ ប្រាក់ សុខា ក្នុងការចូលរួមអភិវឌ្ឍន៍ក្រុងព្រះសីហនុ។ ផ្លូវថ្មីនេះនឹងជួយសម្រួលដល់ការធ្វើចរាចរណ៍ប្រចាំថ្ងៃរបស់ប្រជាពលរដ្ឋឱ្យកាន់តែងាយស្រួល និងសុវត្ថិភាព ព្រមទាំងចូលរួមចំណែកយ៉ាងសំខាន់ក្នុងការលើកកម្ពស់សោភ័ណភាព បរិស្ថាន និងបង្កើនភាពទាក់ទាញដល់ទីក្រុងទេសចរណ៍ដ៏មានសក្តានុពលមួយនេះ។
នៅក្នុងឱកាសនោះ ឯកឧត្តម ម៉ាង ស៊ីណេត បានសម្តែងនូវការអរគុណយ៉ាងជ្រាលជ្រៅ និងបានប្រគល់លិខិតថ្លែងអំណរគុណជូនលោកជំទាវ ប្រាក់ សុខា ចំពោះទឹកចិត្តសប្បុរសធម៌នេះ។ ឯកឧត្តមអភិបាលខេត្តបានគូសបញ្ជាក់ថា នេះជាសមិទ្ធផលថ្មីមួយ និងជាគំរូដ៏ល្អរវាងវិស័យឯកជន និងរដ្ឋបាលខេត្តព្រះសីហនុ ក្នុងការសហការគ្នាស្តារ និងអភិវឌ្ឍន៍មុខមាត់ទីក្រុងឱ្យប្រែក្លាយជាមជ្ឈមណ្ឌលសេដ្ឋកិច្ច ហិរញ្ញវត្ថុ និងទេសចរណ៍ដ៏សំខាន់នៅភាគនិរតីនៃប្រទេសកម្ពុជា៕
ដោយ៖ ប៉ៃ សុឃីម
