ក្នុងវេទិកាតំបន់អាស៊ាន (ARF) លើកទី៣ ស្តីពីការសង្គ្រោះបន្ទាន់ក្នុងទីក្រុង នៅទីក្រុងណាននីង ប្រទេសចិន តំណាងកម្ពុជាបានអំពាវនាវឱ្យបណ្តាប្រទេសក្នុងតំបន់ទាញយកអត្ថប្រយោជន៍ពីបញ្ញាសិប្បនិម្មិត (AI) ប្រកបដោយការទទួលខុសត្រូវ ដើម្បីពង្រឹងប្រសិទ្ធភាពនៃការគ្រប់គ្រងគ្រោះអាសន្ន។ ថ្លែងក្នុងឱកាសនោះ លោក រស់ សុវណ្ណ អគ្គលេខាធិការរងនៃគណៈកម្មាធិការជាតិគ្រប់គ្រងគ្រោះមហន្តរាយ (គ.ជ.គ.ម) បានគូសបញ្ជាក់ថា ស្របពេលការរីកចម្រើននៃទីក្រុងនាំមកនូវហានិភ័យថ្មីៗ កិច្ចការត្រៀមបង្ការ និងការឆ្លើយតបត្រូវការជាចាំបាច់នូវទិន្នន័យជាក់លាក់ កម្លាំងជំនាញច្បាស់លាស់ និងការសម្របសម្រួលទាន់ពេលវេលា។
លោក រស់ សុវណ្ណ បានសង្កត់ធ្ងន់លើគោលការណ៍គ្រឹះថា AI ដើរតួត្រឹមតែជាកាតាលីករជួយបង្កើនសមត្ថភាពប៉ុណ្ណោះ រីឯការសម្រេចចិត្តនិងការវិនិច្ឆ័យចុងក្រោយក្នុងការដោះស្រាយវិបត្តិ គឺដាច់ខាតត្រូវស្ថិតនៅលើមនុស្សជាស្នូល។ គោលជំហរនេះទទួលបានការចាប់អារម្មណ៍យ៉ាងខ្លាំង ខណៈពិភពលោកកំពុងស្វែងរកតុល្យភាពរវាងការប្រើប្រាស់បច្ចេកវិទ្យាទំនើប និងប្រសិទ្ធភាពសង្គ្រោះជីវិតមនុស្សជាក់ស្តែង។
ព្រឹត្តិការណ៍ ARF នេះ រៀបចំឡើងរួមគ្នាដោយប្រទេសចិន ឡាវ និងម៉ាឡេស៊ី ចាប់ពីថ្ងៃទី១៧ ដល់ថ្ងៃទី២១ ខែកញ្ញា ដោយប្រមូលផ្តុំអ្នកជំនាញ និងមន្ត្រីជំនាញជាន់ខ្ពស់មកផ្លាស់ប្តូរបទពិសោធន៍ ពិភាក្សាគោលនយោបាយ និងធ្វើសមយុទ្ធរួមគ្នា។ តាមរយៈកិច្ចសហការនេះ ចិនក៏បានបង្ហាញការប្តេជ្ញាចិត្តយ៉ាងមុតមាំក្នុងការដើរទន្ទឹមគ្នាជាមួយអាស៊ាន ដើម្បីពង្រីកប្រព័ន្ធសង្គ្រោះឆ្លាតវៃ និងកសាងភាពធន់ក្នុងតំបន់ឱ្យកាន់តែរឹងមាំចំពោះគ្រោះមហន្តរាយធម្មជាតិ។ដោយ៖ស្រីពី
