នៅថ្ងៃទី ២៧ ខែសីហា ឆ្នាំ ២០២៥ ត្រូវនឹងថ្ងៃពុធ ៤ កើត ខែភទ្របទ ឆ្នាំម្សាញ់ សប្តស័ក ពុទ្ធសករាជ ២៥៦៩ ឯកឧត្តម ចាន់ ស៊ីណាត រដ្ឋលេខាធិការ និងជានាយកគម្រោង ក្នុងនាមតំណាងឯកឧត្តម ថោ ជេដ្ឋា រដ្ឋមន្ត្រីក្រសួងធនធានទឹក និងឧតុនិយម បានដឹកនាំមន្ត្រីអង្គភាពគ្រប់គ្រង និងអនុវត្តន៍គម្រោង ទីប្រឹក្សាជាតិ និងអន្តរជាតិ រួមជាមួយគណៈប្រតិភូក្រុមបេសកកម្មធនាគារវិនិយោគហេដ្ឋរចនាសម្ព័ន្ធអាស៊ី (AIIB) ដឹកនាំដោយលោក David Ginting ប្រធានក្រុមបេសកកម្ម ចុះត្រួតពិនិត្យ និងស្វែងយល់អំពីការគ្រប់គ្រងធនធានទឹកនៅអាងត្រពាំងថ្ម ស្ថិតក្នុងស្រុកភ្នំស្រុក ខេត្តបន្ទាយមានជ័យ និងសំណង់ក្បាលហុង និងសំណង់ចារឹកត្រង់ ស្ថិតក្នុងខេត្តពោធិ៍សាត់។ ការចុះពិនិត្យនេះ មានគោលបំណងសម្រាប់រៀបចំគម្រោងស្តារឡើងវិញ និងធ្វើទំនើបកម្មប្រព័ន្ធធារាសាស្ត្រ ឲ្យមានប្រសិទ្ធភាពកាន់តែច្បាស់លាស់។
ឯកឧត្តម ចាន់ ស៊ីណាត បានបញ្ជាក់ថា ធនាគារវិនិយោគហេដ្ឋរចនាសម្ព័ន្ធអាស៊ី (AIIB) គឺជាដៃគូអភិវឌ្ឍន៍ដ៏សំខាន់មួយរបស់កម្ពុជា ក្នុងការជួយគិតគូរយ៉ាងជ្រាលជ្រៅដល់ការធ្វើទំនើបកម្មវិស័យធនធានទឹក។ លោកបន្ថែមថា “គម្រោងនេះ នឹងជួយបង្កើនសមត្ថភាពស្តុកទឹក និងការគ្រប់គ្រងប្រកបដោយប្រសិទ្ធភាព ដើម្បីបញ្ចៀសបញ្ហាទឹកជំនន់ និងធានាការផ្គត់ផ្គង់ទឹកសម្រាប់កសិកម្ម និងជីវភាពប្រចាំថ្ងៃរបស់ប្រជាពលរដ្ឋ។ នេះជាការវិនិយោគលើអនាគត និងជាការចូលរួមក្នុងការជួយលើកកម្ពស់សេដ្ឋកិច្ចជាតិរបស់យើង”។
ពីផ្នែកខាង AIIB លោក David Ginting ប្រធានក្រុមបេសកកម្ម បាននិយាយថា “AIIB មានកិត្តិយសធ្វើការរួមគម្រោងជាមួយកម្ពុជា ដើម្បីលើកកម្ពស់វិស័យធនធានទឹក និងគ្រប់គ្រងអាកាសធាតុ។ យើងមានប្តេជ្ញាចិត្តផ្ដល់ការគាំទ្រដោយឥតឈប់ឈរ ក្នុងការចូលរួមអភិវឌ្ឍន៍ប្រព័ន្ធធារាសាស្ត្រនេះឲ្យកាន់តែទំនើប និងប្រកបដោយចីរភាព។”
អត្ថបទបញ្ចប់ដោយឯកឧត្តម ចាន់ ស៊ីណាត បានផ្តល់សេចក្តីអំណរគុណជាថ្មីម្តងទៀតដល់ AIIB ដែលជាដៃគូអភិវឌ្ឍន៍ស្មោះត្រង់ និងជួយកម្ពុជា ក្នុងការបង្កើតឱកាសថ្មីៗសម្រាប់ប្រជាពលរដ្ឋ និងសេដ្ឋកិច្ចជាតិ៕
ដោយ៖ KPS99TV
