(ភ្នំពេញ)៖ ក្រសួងបរិស្ថាន បានឱ្យដឹងថា កម្ពុជាបានជាប់ចំណាត់ថ្នាក់លេខ១ ក្នុងតំបន់អាស៊ីអាគ្នេយ៍ និងឈរនៅលេខរៀងទី១៧ លើពិភពលោក ជាប្រទេសដែលវិស័យទេសចរណ៍ធម្មជាតិ (Eco-Tourism) ល្អបំផុត យោងតាមរបាយការណ៍វាយតម្លៃចុងក្រោយរបស់ស្ថាប័នវាយតម្លៃអន្តរជាតិU.S News & World Report។
ប្រជាជនកម្ពុជា ពិតជាមានមោទកភាពជាតិយ៉ាងក្រៃលែង និងបានចូលរួមអបអរសាទរ ជាមួយសមិទ្ធផលនិងជោគជ័យថ្មីបន្ថែមទៀត ដែលកើតពីផ្លែផ្កានៃសន្តិភាព និងការខិតខំប្រឹងប្រែងអនុវត្តគោលនយោបាយ និងយុទ្ធសាស្រ្តរបស់រាជរដ្ឋាភិបាលកម្ពុជា ដែលបានដាក់ចេញដ៏ត្រឹមត្រូវ ច្បាស់លាស់ ឆ្ពោះទៅសម្រេចទស្សនវិស័យឆ្នាំ២០៥០។
តាមបណ្ដាញទំនាក់ទំនងសង្គមហ្វេសប៊ុក របស់ក្រសួងបរិស្ថាន នាថ្ងៃទី៩ ខែកញ្ញា ឆ្នាំ២០២៦នេះ បានឱ្យដឹងថា សមិទ្ធផលដ៏គួរឱ្យមោទនភាពរបស់ប្រទេសនិងប្រជាជនកម្ពុជា ត្រូវបានមជ្ឈដ្ឋានជាតិមើលឃើញថា ជាលទ្ធផលកើតឡើងដោយផ្ទាល់ពី ស្ថិរភាពនយោបាយ និងសន្តិភាពពេញលេញ បង្កលក្ខណៈ ដល់ការគ្រប់គ្រងតំបន់ការពារធម្មជាតិ និងការលើកម្ពស់ការអភិរក្សជីវៈចម្រុះ និងជីវភាពសហគមន៍មូលដ្ឋាននានា។ លើសពីនេះ តំបន់លម្ហែបៃតងនៅតាមតំបន់ការពារធម្មជាតិ កំពុងបង្ហាញសក្តានុពល និងការទាក់ទាញទេសចរណ៍ធម្មជាតិ ដែលជំរុញឱ្យកម្ពុជាបង្កើតបានសក្តានុពលយ៉ាងសំខាន់ក្នុងការស្រូបទាញភ្ញៀវទេសចរគ្រប់ទិសទី ទាំងជាតិនិងអន្តរជាតិដែលស្រឡាញ់ ចូលរួមការពារនិងអភិរក្សធនធានធម្មជាតិ និងបរិស្ថានបានល្អប្រសើរ ជាលំដាប់។
សម្តេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានផ្តល់ការណែនាំ និងការចង្អុលបង្ហាញជាយុទ្ធសាស្ត្រយ៉ាងម៉ឺងម៉ាត់ ក្នុងការជំរុញការអភិវឌ្ឍ សហគមន៍តំបន់ការពារធម្មជាតិ ឱ្យក្លាយទៅជាម្ចាស់នៃការអភិវឌ្ឍន៍សេដ្ឋកិច្ចមូលដ្ឋាន ផ្សារភ្ជាប់នឹងការការពារនិងអភិរក្សធនធានធម្មជាតិប្រកបដោយចីរភាព។ គោរពតាមការដឹកនាំរបស់សម្តេចធិបតី ហ៊ុន ម៉ាណែត ក្រសួងបរិស្ថានកម្ពុជា«កំពុងជំរុញយ៉ាងសកម្មលើការអភិវឌ្ឍ «គោលដៅលំហែបៃតង» នៅតាមតំបន់ការពារធម្មជាតិ»។
ការបង្កើតគោលដៅលំហែបៃតងនេះ ធ្វើឡើងស្របយុទ្ធសាស្ត្រចក្រាវិស័យបរិស្ថាន ឆ្នាំ២០២៣-២០២៨ ផ្តោតលើមុំយុទ្ធសាស្ត្រទាំងបីគឺ «ស្អាត ភាពបៃតង និងចីរភាព» ក្នុងគោលបំណងកែប្រែជីវភាពប្រជាសហគមន៍ឱ្យមាន «ការងារបៃតង» និងចំណូលប្រកបដោយចីរភាព ជំនួសឱ្យការចូលព្រៃកាប់ឈើ ឬបរបាញ់សត្វ។
សូមបញ្ជាក់ថា ក្រសួងបរិស្ថានបានរៀបចំគោលដៅលំហែបៃតងរួចជាស្រេចនូវ ២ទីតាំង និងមានផែនការដំឡើងទៅជា «របៀងលំហែបៃតង» ផ្សារភ្ជាប់គ្នាក្នុងខេត្តដែលមានសក្តានុពល។ ក្នុងពេលកន្លងមក ក្រសួងបានអនុវត្ត ស្ថិតនៅឧទ្យានជាតិព្រះសុរាម្រិតកុសុមៈ «គិរីរម្យ» (ខេត្តកំពង់ស្ពឺ) និងឧទ្យានជាតិព្រះជ័យវរ្ម័ននរោត្តម «ភ្នំគូលែន» (ខេត្តសៀមរាប) ហើយបន្ទាប់មក បានផែនពង្រីក និងតភ្ជាប់បន្ថែម តំបន់សក្តានុពលផ្សេងទៀត ដូចជា ភ្នំខ្នងផ្សារ និងតំបន់ ទេទឹកពុះ (ខេត្តកំពង់ស្ពឺ)។ នាថ្ងៃទី៨ ខែកញ្ញា ឆ្នាំ២០២៦ ថ្មីៗកន្លងមកនេះ ក្រសួងចំនួន៣ រួមមាន ក្រសួងបរិស្ថាន ក្រសួងអភិវឌ្ឍន៍ជនបទ និងក្រសួងទេសចរណ៍ បានបើកកិច្ចប្រជុំរួមគ្នា ដើម្បីរៀបចំអភិវឌ្ឍន៍តំបន់ការពារធម្មជាតិជីផាត (ខេត្តកោះកុង) ឱ្យទៅជា «គោលដៅលំហែបៃតង» គំរូថែមទៀត៕
ដោយ៖ ធី លីថូ
