ក្រុមអ្នកសង្កេតការណ៍អាស៊ានប្រចាំព្រះរាជាណាចក្រកម្ពុជា (ASEAN Observer Team - Cambodia: AOT-KH) ដឹកនាំដោយប្រធានបេសកកម្មក្រុមអ្នកសង្កេតការណ៍អាស៊ាន (AOT KH HOM) ពីសាធារណរដ្ឋហ្វីលីពីន បានចុះសង្កេតការណ៍នៅតំបន់ប្រាសាទព្រះវិហារ ខេត្តព្រះវិហារ នៅព្រឹកថ្ងៃទី១០ ខែកញ្ញា ឆ្នាំ២០២៦ ដើម្បីពិនិត្យ ផ្ទៀងផ្ទាត់ និងរាយការណ៍ពីស្ថានភាពជាក់ស្តែងតាមបណ្តោយព្រំដែនកម្ពុជា-ថៃ។ ដំណើរនេះត្រូវបានសម្របសម្រួលដោយក្រុមអ្នកសម្របសម្រួល (CLG) នៃព្រះរាជាណាចក្រកម្ពុជា ស្របពេលប្រាសាទព្រះវិហារ ដែលជាបេតិកភណ្ឌពិភពលោក និងជាសម្បត្តិមនុស្សជាតិទាំងមូល ត្រូវបានរាយការណ៍ថា រងការវាយប្រហារ និងការខូចខាតយ៉ាងធ្ងន់ធ្ងរ។
អ្នកនាំពាក្យក្រសួងការពារជាតិ បានបញ្ជាក់ថា សំណង់ និងស្ថាបត្យកម្មសំខាន់ៗរបស់ប្រាសាទព្រះវិហារ បានទទួលរងផលប៉ះពាល់ពីការផ្លោងគ្រាប់ធុនធ្ងន់ជាបន្តបន្ទាប់ និងការទម្លាក់គ្រាប់បែកពីលើអាកាស ដោយយន្តហោះគ្មានមនុស្សបើក និងយន្តហោះចម្បាំង ដែលកម្ពុជាអះអាងថា បានបាញ់សំដៅមកលើតំបន់ប្រាសាទ។ ក្រសួងក៏បានលើកឡើងថា ទោះបីបទឈប់បាញ់ចូលជាធរមានតាំងពីថ្ងៃទី២៧ ខែធ្នូ ឆ្នាំ២០២៥ ក៏ដោយ យោធាថៃត្រូវបានកម្ពុជាចោទប្រកាន់ថា នៅតែមានសកម្មភាពទន្រ្ទានតាមតំបន់ព្រំដែន រួមមានការដាក់កុងតឺន័រ រាយបន្លាលួស ជីកប្រឡាយ ធ្វើលេណដ្ឋាន និងសាងសង់ផ្លូវបេតុងចូលកាន់តែជិតតំបន់ប្រាសាទព្រះវិហារ ដែលកម្ពុជាចាត់ទុកថា ផ្ទុយនឹងច្បាប់អន្តរជាតិ និងកិច្ចព្រមព្រៀងរវាងប្រទេសទាំងពីរ។
ជាមួយគ្នានេះ រាជរដ្ឋាភិបាល នៃព្រះរាជាណាចក្រកម្ពុជា បានអះអាងជាថ្មីពីជំហរដោះស្រាយបញ្ហាព្រំដែនដោយសន្តិវិធី ស្របតាមច្បាប់អន្តរជាតិ និងតាមរយៈយន្តការទ្វេភាគីដែលមានស្រាប់ រួមទាំងអាណត្តិរបស់គណៈកម្មការចម្រុះខណ្ឌសីមាព្រំដែនគោក (JBC) កម្ពុជា-ថៃ។ កម្ពុជាក៏បានបង្ហាញការគាំទ្រយ៉ាងពេញទំហឹងចំពោះក្រុមអ្នកសង្កេតការណ៍អាស៊ាន (AOT) និងសង្កត់ធ្ងន់ថា ការចុះពិនិត្យផ្ទាល់នៅទីតាំងជាក់ស្តែង មានសារៈសំខាន់សម្រាប់ផ្ទៀងផ្ទាត់ និងធានាការអនុវត្តបទឈប់បាញ់ឱ្យបានពេញលេញ និងមានប្រសិទ្ធភាព។ តាមកម្ពុជា ការអនុវត្តកិច្ចព្រមព្រៀងដោយស្មោះត្រង់ និងការគោរពច្បាប់អន្តរជាតិ ធម្មនុញ្ញអាស៊ាន ព្រមទាំងសន្ធិសញ្ញា និងកិច្ចព្រមព្រៀងពាក់ព័ន្ធ គឺជាមូលដ្ឋានសំខាន់សម្រាប់កសាងសន្តិភាពយូរអង្វែង ស្ថិរភាព និងទំនុកចិត្តរវាងប្រទេសទាំងពីរ។
