Air Cambodia គ្រោងបើកជើងហោះហើរត្រង់ភ្នំពេញ–វៀងចន្ទន៍ ចាប់ពីខែធ្នូ ៣ជើងក្នុងមួយសប្តាហ៍

ក្រុមហ៊ុនអាកាសចរណ៍ជាតិកម្ពុជា Air Cambodia បានប្រកាសថា ខ្លួននឹងបើកជើងហោះហើរត្រង់ពីភ្នំពេញទៅទីក្រុងវៀងចន្ទន៍ រដ្ឋធានីនៃប្រទេសឡាវ ចាប់ពីថ្ងៃទី១៥ ខែធ្នូ ឆ្នាំ២០២៦ ដើម្បីផ្តល់ជម្រើសធ្វើដំណើរថ្មីរវាងប្រទេសទាំងពីរ។ ផ្លូវហោះហើរថ្មីនេះនឹងភ្ជាប់អាកាសយានដ្ឋានអន្តរជាតិតេជោ (KTI) និងអាកាសយានដ្ឋានអន្តរជាតិវ៉ាត់តៃ (VTE) ដោយគ្រោងហោះហើរ៣ជើងក្នុងមួយសប្តាហ៍ នៅថ្ងៃពុធ ថ្ងៃសុក្រ និងថ្ងៃអាទិត្យ។ កាលវិភាគហោះហើរលម្អិត និងតម្លៃសំបុត្រមិនទាន់ត្រូវបានប្រកាសនៅឡើយទេ។ ក្រុមហ៊ុនអាកាសចរណ៍បានបញ្ជាក់ថា ផ្លូវហោះហើរនេះមានគោលបំណងពង្រឹងការតភ្ជាប់តាមអាកាសរវាងភ្នំពេញនិងវៀងចន្ទន៍ សម្រួលដល់ភ្ញៀវទេសចរទៅទស្សនាប្រទេសទាំងពីរ និងស្វែងយល់ពីវប្បធម៌និងធម្មជាតិនៅទីនោះ។ ផ្លូវហោះហើរថ្មីក៏នឹងសម្រួលដល់ការធ្វើដំណើរអាជីវកម្ម និងការផ្លាស់ប្តូររវាងប្រជាជនកម្ពុជានិងឡាវផងដែរ។ អ្នកធ្វើដំណើរអាចចូលគេហទំព័រផ្លូវការរបស់ Air Cambodia ដើម្បីតាមដានព័ត៌មានហោះហើរ និងការកក់សំបុត្រនាពេលបន្ទាប់។