៧២ លានដុល្លារជួយកែលម្អវិស័យកសិកម្មកម្ពុជា គ្រួសារកសិករខ្នាតតូច ២០ ម៉ឺនគ្រួសារនឹងទទួលបានអត្ថប្រយោជន៍

ធនាគារអភិវឌ្ឍន៍អាស៊ី (ADB) ថ្មីៗនេះបានអនុម័តកញ្ចប់ហិរញ្ញប្បទានសរុបចំនួន ៧២ លានដុល្លារអាម៉េរិក ដើម្បីគាំទ្រកម្ពុជាក្នុងការកែលម្អវិស័យកសិកម្មនៅជនបទ បង្កើនការចូលរួមរបស់ស្ត្រី និងពង្រឹងសមត្ថភាពរបស់គ្រួសារកសិករខ្នាតតូចប្រមាណ ២០ ម៉ឺនគ្រួសារ ក្នុងការទប់ទល់នឹងគ្រោះមហន្តរាយធម្មជាតិ។ កញ្ចប់ហិរញ្ញប្បទាននេះរួមមានឥណទានសម្បទានចំនួន ៥៧ លានដុល្លារ និងជំនួយឥតសំណងចំនួន ១៥ លានដុល្លារ។ គម្រោងនេះក៏ទទួលបានសហហិរញ្ញប្បទានចំនួន ២៣ លានដុល្លារពីមូលនិធិហេដ្ឋារចនាសម្ព័ន្ធអាស៊ាន ជំនួយឥតសំណងចំនួន ១០ លានដុល្លារពីមូលនិធិអាកាសធាតុបៃតង ជំនួយឥតសំណងចំនួន ៣ លានដុល្លារពីរដ្ឋាភិបាលជប៉ុន និងថវិកាបដិភាគចំនួន ៤,៣ លានដុល្លារពីរដ្ឋាភិបាលកម្ពុជា។ គម្រោងនេះនឹងគ្របដណ្ដប់ឃុំចំនួន ១៨៦ ដែលងាយរងគ្រោះដោយគ្រោះមហន្តរាយ នៅក្នុងខេត្តចំនួន ៧ ដោយផ្ដោតលើការធ្វើទំនើបកម្មប្រព័ន្ធធារាសាស្ត្រ កែលម្អលទ្ធភាពទទួលបានទឹកសម្រាប់ស្រែចម្ការ និងស្ដារផ្លូវប្រវែង ១៩០ គីឡូម៉ែត្រ ដើម្បីជួយកសិករភ្ជាប់ទៅកាន់ទីផ្សារ និងឱកាសការងារ។ ADB បានបញ្ជាក់ថា រលកកម្ដៅ គ្រោះរាំងស្ងួត និងទឹកជំនន់បានប៉ះពាល់ដល់ផលិតកម្មកសិកម្ម ហេដ្ឋារចនាសម្ព័ន្ធ និងសន្តិសុខស្បៀងនៅកម្ពុជា។ ប្រជាជននៅជនបទមានប្រមាណ ៥៩% នៃប្រជាជនទូទាំងប្រទេស ខណៈស្ត្រីមានប្រមាណ ៥១% នៃកម្លាំងពលកម្មកសិកម្ម ប៉ុន្តែលទ្ធភាពទទួលបានហិរញ្ញប្បទាន និងឱកាសសេដ្ឋកិច្ចនៅមានកម្រិត។ គម្រោងនេះក៏នឹងផ្ដល់ការបណ្ដុះបណ្ដាលបច្ចេកទេស ដើម្បីលើកកម្ពស់វិធីផលិតដែលធន់នឹងគ្រោះមហន្តរាយ ដូចជាសាកវប្បកម្ម ការចិញ្ចឹមបសុសត្វ និងបក្សី និងវារីវប្បកម្ម ព្រមទាំងផ្ដល់ជំនួយឥតសំណង ដើម្បីជួយកសិករកាត់បន្ថយការពឹងផ្អែកលើឥន្ធនៈ និងជីនាំចូល។ ទន្ទឹមនឹងនេះ គម្រោងនឹងជំរុញការរៀបចំផែនការភាពធន់របស់សហគមន៍ លើកទឹកចិត្តឱ្យស្ត្រី និងក្រុមងាយរងគ្រោះចូលរួមក្នុងការបង្ការ និងកាត់បន្ថយគ្រោះមហន្តរាយ និងពង្រឹងសមត្ថភាពសហគមន៍ក្នុងការគ្រប់គ្រងហានិភ័យ។ ADB បានលើកឡើងថា ការវិនិយោគលើកសិករខ្នាតតូច ជាពិសេសស្ត្រី ជួយពង្រឹងសមត្ថភាពសេដ្ឋកិច្ចជនបទក្នុងការទប់ទល់នឹងផលប៉ះពាល់ពីអាកាសធាតុ។