ស៊ីម៉ាក់ប្រកាសលទ្ធផល១០ខែ៖ បោសសម្អាតដីជាង១៤ពាន់ហិកតា រកឃើញមីន និងសំណល់យុទ្ធភណ្ឌជាង៤៣ពាន់គ្រាប់

នៅថ្ងៃទី១៥ ខែវិច្ឆិកា ឆ្នាំ២០២៥ មជ្ឈមណ្ឌលសកម្មភាពកម្ចាត់មីនកម្ពុជា (ស៊ីម៉ាក់) បានផ្សព្វផ្សាយលទ្ធផលប្រតិបត្តិការការបោសសម្អាតមីន និងសំណល់យុទ្ធភណ្ឌសង្គ្រាម រយៈពេល ១០ ខែ (មករា–តុលា ២០២៥) តាមប្រព័ន្ធផ្លូវការលើបណ្ដាញសង្គមហ្វេសប៊ុក។ សេចក្តីរាយការណ៍ត្រូវបានបង្ហាញដោយ ឯកឧត្តម ហេង រតនា រដ្ឋមន្រ្តីប្រតិភូទទួលតំណែងអគ្គនាយកស៊ីម៉ាក់។ យោងតាមលទ្ធផល ស៊ីម៉ាក់បានសម្រេចសមិទ្ធិផលសំខាន់ៗក្នុងការអនុវត្តផែនការប្រតិបត្តិការទូទៅ។ ក្នុងរយៈពេល ១០ ខែ អង្គភាពបានបោសសម្អាតផ្ទៃដីដែលមានគ្រោះថ្នាក់មីន និងសំណល់យុទ្ធភណ្ឌបានទំហំសរុប ១៤,៣៩៧ ហិកតា ហើយរកឃើញគ្រាប់មីន និងគ្រាប់យុទ្ធភណ្ឌមិនទាន់ផ្ទុះសរុប ៤៣,៩១៦ គ្រាប់។ ជាបន្ត ស៊ីម៉ាក់បានអនុវត្តកម្មវិធីអប់រំការយល់ដឹងអំពីគ្រោះថ្នាក់មីន និងសំណល់យុទ្ធភណ្ឌសង្គ្រាម ជាមួយនឹងវគ្គអប់រំសរុប ២១,៧៨៨ លើក។ ការអប់រំតាមខ្នងផ្ទះឈានដល់ ១,០៥២,៤៣៨ ខ្នងផ្ទះ និងមានអ្នកចូលរួមទទួលព័ត៌មានសរុប ២,២២០,៩៥០ នាក់។ សម្រាប់តំបន់រងផលប៉ះពាល់ពីជម្លោះប្រវត្តិសាស្ត្រនៅព្រំដែនខេត្តឧត្តរមានជ័យ និងព្រះវិហារ ស៊ីម៉ាក់បានបើកវគ្គផ្សព្វផ្សាយអប់រំអំពីគ្រោះថ្នាក់សំណល់យុទ្ធភណ្ឌជាង ២៣០ លើក ដែលមានអ្នកចូលរួមជិត ៤០០,០០០ នាក់។ អគ្គនាយកស៊ីម៉ាក់ក៏បានលើកឡើងអំពីលទ្ធផលការងារស្រាវជ្រាវ និងដាក់ស្លាកសញ្ញាកំណត់តំបន់គ្រោះថ្នាក់។ ការស្រាវជ្រាវបានបញ្ចប់លើ ៦៦ ភូមិ ក្នុងចំណោម ៧៧ ភូមិ ដែលត្រូវបានកំណត់ថារងផលប៉ះពាល់ (ភូមិជួរមុខ ១១ ភូមិ កំពុងស្រាវជ្រាវបន្ត)។ សរុប រកឃើញករណីភស្តុតាង ៣,៥៨៦ ករណី និងបញ្ជាក់តំបន់ចម្ការមីនចំនួន ១,៧៥៤ ប្លង់ ដែលមានផ្ទៃដីសរុប ១,០៩៣ គីឡូម៉ែត្រក្រឡា។ ស៊ីម៉ាក់បន្តខិតខំអនុវត្តភារកិច្ចដើម្បីធានាសុវត្ថិភាពសាធារណៈ និងរួមចំណែកក្នុងការអភិវឌ្ឍប្រទេស។ ដោយ៖ ទូរទស្សន៍ខេត្តព្រះសីហនុ