ភ្ញៀវទេសចរចិនជិត១លាននាក់៖ កម្ពុជាបង្ហាញទិន្នន័យចូលប្រទេសចុងក្រោយ

នៅក្នុងវេទិកាទេសចរណ៍កម្ពុជា-ចិន ឆ្នាំ២០២៥ ក្រោមប្រធានបទ «ចាប់យកឱកាសទីផ្សារទេសចរណ៍ចិន កសាងសហគមន៍វាសនារួមសម្រាប់មនុស្សជាតិ» រដ្ឋមន្ត្រីក្រសួងទេសចរណ៍កម្ពុជា លោក ហួត ហាក់ បានថ្លែងថា កម្ពុជាបានត្រៀមខ្លួនទទួលភ្ញៀវទេសចរ និងអ្នកវិនិយោគចិនកាន់តែច្រើន។ រដ្ឋាភិបាលកំពុងកែលម្អបរិយាកាសទេសចរណ៍ លើកកម្ពស់គុណភាពសេវាកម្ម និងសម្រួលការវិនិយោគ ដើម្បីចាប់យកឱកាសអភិវឌ្ឍន៍ពី «ឆ្នាំទេសចរណ៍កម្ពុជា-ចិន» (២០២៥-២០២៦) ជំរុញកិច្ចសហប្រតិបត្តិការវប្បធម៌និងទេសចរណ៍ និងផ្តល់កម្លាំងដល់កំណើនសេដ្ឋកិច្ច។ លោក ហួត ហាក់ បានបញ្ជាក់ថា ទេសចរណ៍តែងជាវិស័យអាទិភាពសម្រាប់ការអភិវឌ្ឍសេដ្ឋកិច្ចកម្ពុជា។ រដ្ឋាភិបាលកំពុងអភិវឌ្ឍផលិតផលទេសចរណ៍បៃតង ស្អាត និងឆ្លាតវៃ ព្រមទាំងជំរុញគម្រោងវប្បធម៌និងទេសចរណ៍ដែលមានតម្លៃបន្ថែមខ្ពស់ និងទេសចរណ៍ធុរកិច្ច ដើម្បីបង្កើនសមត្ថភាពប្រកួតប្រជែង។ ទិន្នន័យបង្ហាញថា ក្នុង១០ខែដំបូងឆ្នាំ២០២៥ កម្ពុជាទទួលបានភ្ញៀវទេសចរអន្តរជាតិប្រមាណ៤,៨លាននាក់ ក្នុងនោះភ្ញៀវចិនជិត១លាននាក់ ដែលបង្ហាញពីសារៈសំខាន់នៃទីផ្សារចិន។ នៅឆ្នាំ២០១៩ មុនជំងឺរាតត្បាត ភ្ញៀវចិនមានចំនួន២,៣លាននាក់ ស្មើមួយភាគបីនៃភ្ញៀវអន្តរជាតិសរុបរបស់កម្ពុជា។ លោកបានថ្លែងថា «ចិនមិនត្រឹមតែជាដៃគូយុទ្ធសាស្ត្រដ៏សំខាន់របស់កម្ពុជាទេ ប៉ុន្តែក៏ជាទីផ្សារប្រភពភ្ញៀវទេសចរដ៏សំខាន់បំផុតមួយរបស់ពិភពលោក។ ការវិលត្រឡប់របស់ភ្ញៀវចិននឹងផ្តល់ឱកាសធំដល់វិស័យទេសចរណ៍ និងឧស្សាហកម្មពាក់ព័ន្ធរបស់កម្ពុជា»។ លោកក៏បានបញ្ជាក់ថា ទោះបីស្ថានភាពសេដ្ឋកិច្ចអន្តរជាតិ និងកត្តាភូមិសាស្ត្រនយោបាយនៅតែមានភាពមិនប្រាកដប្រជាក្តី កម្ពុជាមានសុទិដ្ឋិនិយមខ្លាំងចំពោះកិច្ចសហប្រតិបត្តិការទេសចរណ៍ជាមួយចិន។ «ឆ្នាំទេសចរណ៍កម្ពុជា-ចិន» នឹងបន្តដល់ឆ្នាំ២០២៦ ដែលជាឱកាសសំខាន់សម្រាប់ពង្រឹងទំនាក់ទំនងទេសចរណ៍ កែលម្អការតភ្ជាប់ និងជំរុញការផ្លាស់ប្តូររវាងប្រជាជន ដើម្បីគាំទ្រការកសាងសហគមន៍វាសនារួមកម្ពុជា-ចិនកាន់តែជិតស្និទ្ធ និងផ្តល់ផលប្រយោជន៍ជាក់ស្តែងដល់ប្រជាជនទាំងពីរ។ សេចក្តីរាយការណ៍សរុបរបស់ស្ថានីយយើង