លោក ហួត ហាក់ លើកឡើងពីសារៈសំខាន់នៃមូលធនមនុស្សក្នុងវិស័យទេសចរណ៍

ខេត្តកំពត៖ ការកសាងមូលធនមនុស្សក្នុងវិស័យទេសចរណ៍ គឺជាកត្តាសំខាន់ក្នុងការជំរុញការអភិវឌ្ឍវិស័យនេះឱ្យមានភាពប្រកួតប្រជែង និងប្រកបដោយចីរភាព។ នេះជាការលើកឡើងរបស់ ឯកឧត្តម ហួត ហាក់ រដ្ឋមន្ត្រីក្រសួងទេសចរណ៍ ក្នុងពិធីបើកវគ្គបណ្តុះបណ្តាលគ្រូបង្គោល មេគង្គ-ឡានឆាង លើកទី២ ស្តីពីសេវាឧត្តមភាព ការអភិវឌ្ឍជំនាញ និងនវានុវត្តន៍ទេសចរណ៍ ដែលកម្ពុជាធ្វើជាម្ចាស់ផ្ទះ និងរៀបចំឡើងនៅខេត្តកំពត នាថ្ងៃទី១១ ខែមីនា ឆ្នាំ២០២៦។ ឯកឧត្តមរដ្ឋមន្ត្រីក្រសួងទេសចរណ៍បានលើកឡើងថា វគ្គបណ្តុះបណ្តាលគ្រូបង្គោលមេគង្គ-ឡានឆាង លើកទី២នេះ ផ្តោតលើការលើកកម្ពស់គុណភាពសេវាកម្មទេសចរណ៍ ការពង្រឹងការបណ្តុះបណ្តាលផ្អែកលើសមត្ថភាព និងការជំរុញនវានុវត្តន៍ក្នុងការអភិវឌ្ឍផលិតផលទេសចរណ៍។ តាមរយៈវគ្គបណ្តុះបណ្តាលនេះ គ្រូបង្គោល និងអ្នកជំនាញទេសចរណ៍ពីបណ្តាប្រទេសសមាជិក នឹងអាចផ្លាស់ប្តូរចំណេះដឹង និងបទពិសោធន៍ ដើម្បីពង្រឹងវិធីសាស្ត្របណ្តុះបណ្តាល និងយកទៅបន្តផ្សព្វផ្សាយនៅក្នុងប្រទេសរបស់ខ្លួន។ ឯកឧត្តមរដ្ឋមន្ត្រីបានសង្កត់ធ្ងន់ថា ការអភិវឌ្ឍធនធានមនុស្ស និងមូលធនមនុស្សក្នុងវិស័យទេសចរណ៍ គឺជាគន្លឹះសម្រាប់ធានាគុណភាពសេវាកម្ម និងភាពប្រកួតប្រជែងនៃគោលដៅទេសចរណ៍។ ការរៀបចំវគ្គបណ្តុះបណ្តាលនេះក៏បង្ហាញពីការប្តេជ្ញាចិត្តរបស់បណ្តាប្រទេសមេគង្គ-ឡានឆាង ក្នុងការពង្រឹងកិច្ចសហប្រតិបត្តិការទេសចរណ៍ និងជំរុញការអភិវឌ្ឍវិស័យទេសចរណ៍ប្រកបដោយចីរភាពនៅទូទាំងតំបន់។ នាឱកាសនោះ លោក ខៀវ រិទ្ធិភ័ណ្ឌ អភិបាលរងខេត្តកំពត បានស្វាគមន៍យ៉ាងកក់ក្តៅចំពោះប្រតិភូដែលបានចូលរួម និងបានរំលេចពីសក្តានុពលទេសចរណ៍របស់ខេត្តកំពត ដែលមានទាំងតំបន់ឆ្នេរ សហគមន៍ទេសចរណ៍ បេតិកភណ្ឌវប្បធម៌ និងម្ហូបអាហារដ៏ល្បីល្បាញ ដែលកំពុងទាក់ទាញភ្ញៀវទេសចរជាតិ និងអន្តរជាតិ។ លោកអភិបាលរងខេត្តបានបន្តថា ខេត្តកំពតកំពុងបន្តអភិវឌ្ឍខ្លួនជាគោលដៅទេសចរណ៍ដ៏មានសក្តានុពលមួយនៅកម្ពុជា៕ ដោយ៖ ប៉ៃ សុឃីម