លោក ស៊ុន ចាន់ថុល ដឹកនាំកិច្ចសន្ទនារដ្ឋ–ឯកជនកម្ពុជា–អាមេរិកលើកទី៤

នៅរសៀលថ្ងៃពុធ ទី១១ ខែមីនា ឆ្នាំ២០២៦ ឯកឧត្តម ស៊ុន ចាន់ថុល ឧបនាយករដ្ឋមន្រ្តី និងអនុប្រធានទី១ ក្រុមប្រឹក្សាអភិវឌ្ឍន៍កម្ពុជា បានដឹកនាំកិច្ចសន្ទនាលើកទី៤ រវាង រដ្ឋ និងវិស័យឯកជន កម្ពុជា-សហរដ្ឋអាមេរិក។ កិច្ចសន្ទនានេះមានការចូលរួមពីលោកស្រី Bridgette L. Walker, ភារធារីស្ថានទូតសហរដ្ឋអាមេរិកប្រចាំកម្ពុជា, អនុប្រធានក្រសួងរ៉ែ និងថាមពល, អគ្គលេខាធិការក្រសួង, តំណាង AmCham Cambodia, ក្រុមប្រឹក្សាធុរកិច្ច US-ABC, តំណាងវិស័យឯកជន និងមន្ត្រីជំនាញជាច្រើន។ កិច្ចសន្ទនានេះមានគោលបំណង លើកស្ទួយកិច្ចសហប្រតិបត្តិការ សេដ្ឋកិច្ច និងវិនិយោគ រវាងកម្ពុជា និងសហរដ្ឋអាមេរិក។ វាផ្តល់ឱកាសសម្រាប់វិនិយោគិនអាមេរិកក្នុងការលើកឡើងពីបញ្ហាប្រឈម និងស្វែងរកដំណោះស្រាយសមស្រប ដើម្បីកសាងទំនាក់ទំនងកាន់តែរឹងមាំ និងជំរុញការវិនិយោគបន្ថែមក្នុងប្រទេសកម្ពុជា។ ក្នុងកិច្ចសន្ទនានេះផងដែរ ឯកឧត្តម ស៊ុន ចាន់ថុល បានស្វាគមន៍យ៉ាងកក់ក្តៅការចូលរួមរបស់ភារធារីស្ថានទូត តំណាងស្ថាប័ន និងវិស័យឯកជនអាមេរិកទាំងអស់។ លោកបានលើកឡើងថា វេទិកានេះបង្ហាញពី ការប្តេជ្ញាចិត្តរួមគ្នា ក្នុងការកសាងទំនាក់ទំនងរវាងរដ្ឋ និងធុរកិច្ច និងបង្កើនភាពជាដៃគូយុទ្ធសាស្ត្ររវាងកម្ពុជា និងសហរដ្ឋអាមេរិក។ ឯកឧត្តមស៊ុន ចាន់ថុល បានផ្តល់បច្ចុប្បន្នភាពថ្មីៗដល់វិនិយោគិន រួមមាន៖ ការអនុម័តគម្រោងវិនិយោគឆ្នាំ២០២៥, ការកើនឡើងនៃពាណិជ្ជកម្មកម្ពុជា-អាមេរិក និងវឌ្ឍនភាពក្នុងការអនុវត្ត កិច្ចព្រមព្រៀងពាណិជ្ជកម្មបដិការ។ បន្ថែមពីនេះ កិច្ចសន្ទនានេះបានលើកឡើងពីគំនិតរៀបចំជំនួបអាហារពេលព្រឹកជាមួយសភាពាណិជ្ជកម្មអន្តរជាតិ ដើម្បីផ្តល់ឱកាសសម្រាប់វិនិយោគិនក្នុងការផ្លាស់ប្តូរព័ត៌មាន និងពង្រឹងភាពជិតស្និទ្ធជាមួយរាជរដ្ឋាភិបាល។ លោកស្រី Bridgette L. Walker បានបង្ហាញពីសេចក្ដីសោមនស្សរីករាយក្នុងការចូលរួមកិច្ចសន្ទនានេះ និងបានបញ្ជាក់ពីសុទិដ្ឋិនិយមក្នុងការស្វែងរកដំណោះស្រាយសមស្របសម្រាប់បញ្ហាប្រឈមនានា ដែលវិនិយោគិនអាមេរិកបានលើកឡើង។ កិច្ចសន្ទនានេះនឹងជំរុញ បរិយាកាសវិនិយោគ និងធុរកិច្ចនៅកម្ពុជា អោយកាន់តែរីកចម្រើន និងទាក់ទាញវិនិយោគបន្ថែមពីអន្តរជាតិ។ ដោយ៖ KPS99TV