វិថីអាហារកំពតត្រៀមបញ្ជីម្ហូបជាង៦០មុខសម្រាប់ចូលឆ្នាំខ្មែរ

ដើម្បីទទួលស្វាគមន៍ភ្ញៀវទេសចរជាតិ និងអន្តជាតិក្នុងឱកាសបុណ្យចូលឆ្នាំថ្មីប្រពៃណីជាតិខ្មែរខាងមុខនេះ ឯកឧត្ដម ម៉ៅ ធនិន អភិបាលខេត្តកំពត បានណែនាំឱ្យមន្ទីរជំនាញពាក់ព័ន្ធត្រៀមលក្ខណៈក្នុងការសិក្សារៀបចំបញ្ជីមុខម្ហូបអាហារជាបឋមឱ្យបានចំនួនជាង ៦០មុខ សម្រាប់ដាក់ឱ្យអាជីវករលក់ដូរនៅក្នុង«វិថីអាហារ»។ នៅក្នុងកិច្ចប្រជុំពិភាក្សាលើការងារបើកដំណើការ វិថីម្ហូបអាហារ រសៀលថ្ងៃទី១៩ ខែមីនា ឆ្នាំ២០២៦ ឯកឧត្ដម ម៉ៅ ធនិន បានលើកឡើងថា អ្វីដែលកាន់តែពិសេសបំផុតនោះ នៅក្នុងចំណោមមុខម្ហូបអាហារទាំងនោះ ក៏មានការដាក់បញ្ចូលនូវប្រភេទនំខ្មែរដែលមានលក្ខណៈបែបប្រពៃណីជាតិ នំដែលជាអត្តសញ្ញាណប្រចាំខេត្តកំពត ព្រមទាំងអាហារដែលមានប្រវត្តិយូរលង់ និងមានទំនៀមទម្លាប់ទាក់ទងនឹងការរស់នៅរបស់ប្រជាពលរដ្ឋក្នុងមូលដ្ឋាន ដើម្បីបង្ហាញដល់ភ្ញៀវទេសចរឱ្យបានស្គាល់កាន់តែច្បាស់ពីមរតកម្ហូបអាហារខ្មែរ។ គួរជម្រាបថា «វិថីម្ហូបអាហារ» ត្រូវបានអាជ្ញាធរខេត្តកំពតបង្កើតឡើងមិនត្រឹមតែជាការបង្កើតតំបន់កម្សាន្តថ្មីមួយបន្ថែមទៀតនៅក្នុងក្រុងកំពតប៉ុណ្ណោះទេ ប៉ុន្តែថែមទាំងមានការចូលរួមជួយលើកកម្ពស់សេដ្ឋកិច្ចគ្រួសាររបស់ប្រជាពលរដ្ឋបានមួយកំរិតបន្ថែមទៀត និងមានការអភិរក្សនូវម្ហូបអាហារដែលជាទំនៀមទម្លាប់របស់ជាតិ តាមរយៈការរៀបចំឱ្យមានរបៀបរៀបរយ និងមានសោភ័ណភាព និងធានាបាននូវអនាម័យឱ្យបានស្អាតល្អបំផុតថែមទៀតផងដែ។ អាជ្ញាធរខេត្តកំពត ក៏បានអំពាវនាវ និងគោរពអញ្ជើញភ្ញៀវទេសចរជាតិ និងអន្តរជាតិទាំងអស់ មេត្តាមកចូលរួមគាំទ្រ និងទស្សនាកម្សាន្តឱ្យបានច្រើនកុះករ ដើម្បីរួមគ្នាលើកកម្ពស់មរតកម្ហូបអាហារដែលពាក់ព័ន្ធនឹងទំនៀមទម្លាប់ប្រពៃណីខ្មែរ ក្នុងឱកាសពិធីបុណ្យចូលឆ្នាំថ្មីប្រពៃណីជាតិខ្មែរ ឆ្នាំ២០២៦ ខាងមុខនេះ នៅលើទឹកដីខេត្តកំពត ដែលជាក្រុងបេតិកភណ្ឌរស់រវើកជាមួយម្ហូបអាហារដ៏ឆ្ងុយឆ្ងាញ់ពិសារនៅកន្លែង វិថីអាហារ និងបដិសណ្ឋារកិច្ចដ៏កក់ក្ដៅបំផុតនៅក្នុងក្រុងកំពត ខេត្តកំពត៕ អត្ថបទ៖ ឡាយ កុល