ក្រសួងសុខាភិបាលរំឭកការពារជំងឺ និងការពុលអាហារ ឬស្រាក្នុងឱកាសចូលឆ្នាំខ្មែរ

តាមរបាយការណ៍ ក្រសួងសុខាភិបាលបានចេញវិធានការការពារ និងថែរក្សាសុខភាព ក្នុងឱកាសបុណ្យចូលឆ្នាំថ្មីប្រពៃណីជាតិខ្មែរ ឆ្នាំមមី អដ្ឋស័ក ព.ស.២៥៦៩–២៥៧០ គ.ស.២០២៦ ដោយអំពាវនាវឱ្យប្រជាពលរដ្ឋបង្កើនការប្រុងប្រយ័ត្ន និងអនុវត្តវិធានការអនាម័យយ៉ាងម៉ឺងម៉ាត់ ដើម្បីបង្ការជំងឺ និងហានិភ័យសុខភាពផ្សេងៗ។ ក្រសួងក៏បានជូនពរប្រជាពលរដ្ឋទូទាំងប្រទេសឱ្យមានសុខភាពល្អ សុភមង្គល និងជោគជ័យគ្រប់ភារកិច្ច ព្រមទាំងពុទ្ធពរទាំងបួន គឺ អាយុ វណ្ណៈ សុខៈ និងពលៈ។ របាយការណ៍បញ្ជាក់ថា ក្រសួងបានណែនាំឱ្យយកចិត្តទុកដាក់ការពារជំងឺផ្ដាសាយបក្សី ការពុលអាហារ និងការពុលស្រា ដោយលាងដៃញឹកញាប់ជាមួយសាប៊ូ ឬអាល់កុលសម្រាប់សម្អាតដៃ ប្រើសម្ភារៈការពារពេលប៉ះពាល់សត្វ និងជៀសវាងបរិភោគសត្វឈឺ ឬស្លាប់។ អាហារត្រូវចម្អិនឱ្យឆ្អិនល្អ រក្សាទុកឱ្យត្រឹមត្រូវ និងប្រើទឹកស្អាត ព្រមទាំងជៀសវាងអាហារខូចគុណភាព ឬហួសកាលកំណត់។ ជាពិសេស ក្រសួងរំឭកឱ្យប្រុងប្រយ័ត្នចំពោះស្រា ស ដែលមិនមានប្រភពច្បាស់លាស់ ដើម្បីបង្ការការពុលស្រាដែលអាចគ្រោះថ្នាក់ដល់ជីវិត។ ការណែនាំការពារជំងឺឆ្លងផ្សេងៗក្នុងរបាយការណ៍រួមមាន ពាក់ម៉ាស់ពេលក្អកកណ្ដាស់ ផឹកទឹកឱ្យគ្រប់គ្រាន់ ជៀសវាងកន្លែងកកកុញពេលមានរោគសញ្ញាឈឺ និងទៅរកសេវាសុខាភិបាលឆាប់រហ័សនៅមណ្ឌលសុខភាព ឬមន្ទីរពេទ្យជិតបំផុត។ ក្នុងថ្ងៃបុណ្យ ក៏ត្រូវយកចិត្តទុកដាក់ការពារជំងឺគ្រុនឈាម ដោយសម្រាន្តក្នុងមុង សម្អាតបរិស្ថានជុំវិញផ្ទះ និងកាត់បន្ថយទីជម្រក និងកន្លែងបង្កកំណើតមូស ព្រមទាំងគោរពច្បាប់ចរាចរណ៍ និងប្រុងប្រយ័ត្នអគ្គិភ័យនៅតាមគេហដ្ឋាន។ ក្រសួងបានអំពាវនាវដល់អាជ្ញាធរមូលដ្ឋានឱ្យតាមដានសុខភាពប្រជាពលរដ្ឋ និងចាត់វិធានការឆាប់រហ័សពេលមានបញ្ហា ដោយយកចិត្តទុកដាក់ជាពិសេសលើក្រុមងាយរងគ្រោះ។ សម្រាប់ព័ត៌មានបន្ថែម ប្រជាពលរដ្ឋអាចទាក់ទងលេខទូរសព្ទ១១៥ដោយឥតគិតថ្លៃ ឬតាមបណ្ដាញផ្លូវការរបស់ក្រសួងសុខាភិបាល។ ដោយ៖ សុខ ស៊ីណាន។