ម្ចាស់កសិដ្ឋានឃ្មុំនៅត្បូងឃ្មុំថា កម្ដៅខ្លាំង និងថ្នាំសម្លាប់សត្វល្អិតប៉ះពាល់ដល់ទិន្នផលទឹកឃ្មុំ

លោក ហ៊ន់ សៀងហៃ ម្ចាស់កសិដ្ឋានចិញ្ចឹមឃ្មុំខ្មែរ ស្ថិតនៅតាមចម្ការកៅស៊ូក្នុងខេត្តត្បូងឃ្មុំ បានឱ្យដឹងថា ឆ្នាំនេះទិន្នផលទឹកឃ្មុំហាក់ប្រមូលបានតិចជាងឆ្នាំមុនៗ ហើយតម្លៃក៏ធ្លាក់ចុះខ្លះដែរ។ លោកបានបញ្ជាក់ថា ការប្រមូលទឹកឃ្មុំបានតិច បណ្ដាលមកពីអាកាសធាតុក្ដៅខ្លាំង និងការបាញ់ថ្នាំសម្លាប់សត្វល្អិតរបស់ម្ចាស់ចម្ការកៅស៊ូ និងចម្ការមៀន ដែលប៉ះពាល់ដល់ការចិញ្ចឹមឃ្មុំរបស់លោក។ លោកថា មេឃ្មុំងាប់ច្រើន ទើបធ្វើឱ្យទិន្នផលទឹកឃ្មុំធ្លាក់ចុះ។ ចំពោះតម្លៃ លោកបានឱ្យដឹងថា ទឹកឃ្មុំមួយលីត្របច្ចុប្បន្នអាចលក់ទៅទីផ្សារបានត្រឹម៥ម៉ឺនទៅ៦ម៉ឺនរៀល បើធៀបនឹងឆ្នាំមុនៗដែលអាចលក់បាន៧ម៉ឺនទៅ៨ម៉ឺនរៀលក្នុងមួយលីត្រ។ នៅពេលនោះ អ្នកចិញ្ចឹមឃ្មុំមិនទាន់មានច្រើនដូចសព្វថ្ងៃទេ។ អត្ថបទបានឱ្យដឹងថា កសិដ្ឋានចិញ្ចឹមឃ្មុំខ្មែរនៅចម្ការកៅស៊ូក្នុងខេត្តត្បូងឃ្មុំនេះ បច្ចុប្បន្នមានធុងឃ្មុំជាង៣០០ធុង សម្រាប់ធ្វើជាជម្រក និងផលិតទឹកឃ្មុំផ្គត់ផ្គង់ទីផ្សារប្រមាណ៥០០០ទៅ៦០០០លីត្រក្នុងមួយខែ។ ដោយ៖ ប៉ៃ សុឃីម