តម្លៃសាច់គោស្រស់នៅលើទីផ្សារកម្ពុជា បន្តកើនឡើងចាប់ពីចុងឆ្នាំ២០២៥ ដល់ពាក់កណ្តាលឆ្នាំ២០២៦ ខណៈការនាំចូលពីថៃត្រូវបានផ្អាក

ចាប់តាំងពីចុងឆ្នាំ២០២៥ រហូតដល់ពាក់កណ្តាលឆ្នាំ២០២៦ តម្លៃសាច់គោស្រស់នៅលើទីផ្សារកម្ពុជាបានបន្តកើនឡើងគួរឱ្យកត់សម្គាល់ បន្ទាប់ពីការនាំចូលគោរស់ និងសាច់គោពីប្រទេសថៃត្រូវបានផ្អាក។ ស្ថានភាពនេះបានជួយលើកតម្លៃផលិតផលក្នុងស្រុក និងផ្តល់ក្តីសង្ឃឹមដល់អ្នកចិញ្ចឹមគោ ប៉ុន្តែក៏បង្កការព្រួយបារម្ភចំពោះប្រជាពលរដ្ឋដែលមានចំណូលទាបផងដែរ។ លោក ស្រ៊ុន ពៅ ប្រធានសមាគមអ្នកចិញ្ចឹមសត្វកម្ពុជា បានឱ្យដឹងថា តម្លៃសាច់គោបានចាប់ផ្តើមកើនឡើងជាបន្តបន្ទាប់ចាប់តាំងពីខែតុលា ឆ្នាំ២០២៥។ បច្ចុប្បន្ន សាច់គោស្រស់លក់រាយនៅតាមទីផ្សារមានតម្លៃចន្លោះពី ៣៥,០០០ ទៅ ៣៨,០០០រៀលក្នុងមួយគីឡូក្រាម ខណៈកាលពីឆ្នាំ២០២៥ តម្លៃជាមធ្យមមានត្រឹមប្រមាណ ៣០,០០០រៀល ឬទាបជាងនេះក្នុងមួយគីឡូក្រាម។ លោកបានបញ្ជាក់ថា កាលពីពេលមានការនាំចូលគោរស់ពីប្រទេសថៃ តម្លៃគោរស់ក្នុងស្រុកបានធ្លាក់ចុះមកនៅប្រមាណ ៧,០០០រៀលក្នុងមួយគីឡូក្រាម ដែលធ្វើឱ្យអ្នកចិញ្ចឹមជាច្រើនជួបការលំបាក ហើយខ្លះបានបោះបង់មុខរបរនេះ។ ទោះជាយ៉ាងណា ក្រោយការផ្អាកនាំចូល និងការកើនឡើងនៃតម្រូវការក្នុងស្រុក ព្រមទាំងតម្រូវការនាំចេញទៅប្រទេសវៀតណាម តម្លៃគោរស់បានកើនឡើងដល់ប្រមាណ ១៣,០០០រៀលក្នុងមួយគីឡូក្រាម។ លោក ស្រ៊ុន ពៅ ចាត់ទុកការកើនឡើងនេះថាជាសញ្ញាវិជ្ជមានសម្រាប់វិស័យចិញ្ចឹមសត្វនៅកម្ពុជា ព្រោះវាជួយឱ្យកសិករទទួលបានប្រាក់ចំណេញសមរម្យ និងជំរុញឱ្យពួកគេបន្តពង្រីកការចិញ្ចឹម ដើម្បីឆ្លើយតបនឹងតម្រូវការទីផ្សារក្នុងស្រុក និងឱកាសនាំចេញនាពេលខាងមុខ។ យោងតាមរបាយការណ៍របស់ក្រសួងកសិកម្ម រុក្ខាប្រមាញ់ និងនេសាទ កម្ពុជាមានតម្រូវការសាច់សត្វសម្រាប់បរិភោគជាង ៣៣០,០០០តោនក្នុងមួយឆ្នាំ។ ក្នុងនោះ សាច់ជ្រូកមានតម្រូវការខ្ពស់ជាងគេប្រមាណ ១៥២,០០០តោន ស្មើនឹងជាង ៣លានក្បាល។ សាច់គោ និងសាច់ក្របីមានតម្រូវការប្រមាណ ៨៩,០០០តោន ស្មើនឹងជាង ៨សែនក្បាល ខណៈសាច់បក្សី ដូចជាមាន់ និងទា មានតម្រូវការប្រមាណ ៦៤,០០០តោន ស្មើនឹងជាង ៥៣លានក្បាលក្នុងមួយឆ្នាំ៕ ដោយ៖ ប៉ៃ សុឃីម