ត្រាំ ដកផែនការយកកម្រៃ ២០% លើការដឹកជញ្ជូនឆ្លងកាត់ច្រកសមុទ្រ Hormuz បន្ទាប់ពីរងសម្ពាធការទូតខ្លាំង

វ៉ាស៊ីនតោន – ប្រធានាធិបតីអាមេរិក ដូណាល់ ត្រាំ បានសម្រេចដកចេញវិញនូវផែនការដ៏ចម្រូងចម្រាសក្នុងការយកកម្រៃ ២០% លើទំនិញដែលឆ្លងកាត់ច្រកសមុទ្រ Hormuz បន្ទាប់ពីរងសម្ពាធការទូតយ៉ាងខ្លាំងពីបណ្តាប្រទេសឈូងសមុទ្រអារ៉ាប់ ក្នុងរយៈពេលត្រឹមតែ ២៤ ម៉ោង។ លោក ត្រាំ បានប្រកាសផែនការនេះកាលពីថ្ងៃចន្ទ ដោយអះអាងថា សហរដ្ឋអាមេរិកគួរតែទទួលបានសំណងសម្រាប់ការការពារច្រកសមុទ្រ Hormuz ដែលជាផ្លូវដឹកជញ្ជូនប្រេងដ៏សំខាន់បំផុតមួយរបស់ពិភពលោក។ ទោះជាយ៉ាងណា សំណើនេះបានធ្វើឱ្យសម្ព័ន្ធមិត្តអាមេរិក និងមន្ត្រីជាន់ខ្ពស់នៅសេតវិមានភ្ញាក់ផ្អើល ខណៈពួកគេព្រមានថា វាអាចប៉ះពាល់ដល់គោលនយោបាយការបរទេស បង្កការកើនឡើងនៃតម្លៃប្រេង និងផ្ទុយពីច្បាប់អន្តរជាតិស្តីពីសេរីភាពនៃការធ្វើនាវាចរណ៍។ នៅពីក្រោយឆាក មន្ត្រីសេតវិមានបានប្រញាប់រៀបចំផែនការអនុវត្ត ខណៈមេដឹកនាំប្រទេស អារ៉ាប៊ីសាអូឌីត អេមីរ៉ាតអារ៉ាប់រួម បារ៉ែន និងកាតា បានទាក់ទងលោក ត្រាំ ដើម្បីជំរុញឱ្យលោកបោះបង់គំនិតនេះ។ នៅថ្ងៃអង្គារ លោក ត្រាំ បានប្រកាសដកផែនការនេះវិញ ដោយបញ្ជាក់ថា ប្រទេសនៅតំបន់ឈូងសមុទ្របានសន្យាបង្កើនការវិនិយោគនៅសហរដ្ឋអាមេរិក ជាជម្រើសដែលលោកចាត់ទុកថាមានប្រយោជន៍ជាងការយកកម្រៃឆ្លងកាត់ច្រកសមុទ្រ។ ក្រុមអ្នកវិភាគចាត់ទុកថា ហេតុការណ៍នេះបានបង្ហាញពីរបៀបដឹកនាំការបរទេសរបស់លោក ត្រាំ ដែលមានលក្ខណៈបត់បែន និងផ្អែកលើការចរចាផ្នែកផលប្រយោជន៍។ ពួកគេព្រមានថា ប្រសិនបើផែនការនេះត្រូវបានអនុវត្ត វាអាចជំរុញឱ្យតម្លៃប្រេងពិភពលោកកើនឡើង ប៉ះពាល់ដល់ទីផ្សារថាមពល និងផ្តល់ហេតុផលឱ្យអ៊ីរ៉ង់អះអាងថា ប្រទេសដែលធានាសន្តិសុខនៅច្រកសមុទ្រ Hormuz គួរទទួលបានសំណង។ ទោះបីលោក ត្រាំ បានបោះបង់ផែនការនេះក៏ដោយ ភាពតានតឹងនៅច្រកសមុទ្រ Hormuz នៅតែបន្ត ខណៈការគំរាមកំហែងផ្នែកសន្តិសុខនៅតំបន់នេះកំពុងប៉ះពាល់ដល់ការដឹកជញ្ជូន និងជំរុញឱ្យតម្លៃប្រេងសកលបន្តកើនឡើង។ ប្រភព៖ CNN