កុមារភៀសសឹកប្រាថ្នាវិលចូលថ្នាក់រៀនវិញ ក្រោយមួយឆ្នាំនៃផលប៉ះពាល់ពីសង្គ្រាមតាមព្រំដែនឈ្លានពានរបស់យោធាថៃ

មួយឆ្នាំក្រោយព្រឹត្តិការណ៍ប្រដាប់អាវុធតាមបណ្តោយព្រំដែន ដែលបានបង្កឱ្យប្រជាពលរដ្ឋជាច្រើនបាត់បង់ផ្ទះសម្បែង និងត្រូវភៀសខ្លួនចេញពីលំនៅឋាន ក្តីស្រមៃដ៏ធំបំផុតរបស់កុមារភៀសសឹកជាច្រើន គឺការបានវិលត្រឡប់ទៅសាលារៀនវិញ ដើម្បីបន្តការសិក្សា និងកសាងអនាគតរបស់ខ្លួន។ សង្គ្រាមបានបន្សល់ទុកនូវផលប៉ះពាល់យ៉ាងធ្ងន់ធ្ងរ ដោយសាលារៀន ផ្ទះសម្បែង និងហេដ្ឋារចនាសម្ព័ន្ធមួយចំនួនរងការខូចខាត ខណៈប្រជាពលរដ្ឋជាច្រើន រួមទាំងកុមារ ត្រូវរស់នៅក្នុងមណ្ឌលស្នាក់នៅបណ្តោះអាសន្ន។ បើទោះបីស្ថិតក្នុងស្ថានភាពលំបាក កុមារទាំងនោះនៅតែបង្ហាញពីឆន្ទៈរឹងមាំ និងប្តេជ្ញាចិត្តចង់បន្តការសិក្សា ព្រោះពួកគេជឿជាក់ថា ការអប់រំគឺជាគន្លឹះសម្រាប់អនាគត។ កុមារី យ៉ាន ស្រីរ័ត្ន ជាសិស្សថ្នាក់ទី៥ មកពីតំបន់អានសេះ ដែលបច្ចុប្បន្នកំពុងរស់នៅក្នុងមណ្ឌលស្នាក់នៅបណ្តោះអាសន្ន ភូមិតាកឹងបៃតង ឃុំថ្មី ស្រុកគូលែន ខេត្តព្រះវិហារ បានរៀបរាប់ទាំងអួលដើមកថា ខណៈកំពុងសិក្សាក្នុងថ្នាក់ ស្រាប់តែឮសំឡេងផ្ទុះ និងគ្រាប់ផ្លោងធ្លាក់នៅក្បែរសាលា បង្ខំឱ្យសិស្សានុសិស្សរត់ភៀសខ្លួនទាំងភាពភ័យខ្លាច។ កុមារីបានបង្ហាញអារម្មណ៍ឈឺចាប់ចំពោះសង្គ្រាម និងបាននិយាយដោយសាមញ្ញ ប៉ុន្តែមានន័យជ្រាលជ្រៅថា៖ «ខ្ញុំមិនចង់ឃើញសង្គ្រាមនោះទេ»។ សម្រាប់កុមារភៀសសឹកជាច្រើន ការបានវិលត្រឡប់ទៅកាន់សាលារៀន មិនត្រឹមជាក្តីស្រមៃប៉ុណ្ណោះទេ ប៉ុន្តែជាក្តីសង្ឃឹមក្នុងការស្តារជីវិតឡើងវិញ។ ពួកគេយល់ថា ការអប់រំជាមូលដ្ឋានដ៏សំខាន់សម្រាប់ការអភិវឌ្ឍសមត្ថភាពផ្ទាល់ខ្លួន និងការចូលរួមកសាងសង្គមជាតិនាពេលអនាគត។ ដូច្នេះ ការគាំទ្រពីអាជ្ញាធរពាក់ព័ន្ធ ដៃគូអភិវឌ្ឍន៍ និងសហគមន៍ គឺមានសារៈសំខាន់ក្នុងការធានាឱ្យកុមារទាំងនេះអាចបន្តការសិក្សាបានដោយគ្មានការរំខាន។ ថ្ងៃទី២៤ ខែកក្កដា ឆ្នាំ២០២៦ គឺជាខួបមួយឆ្នាំនៃព្រឹត្តិការណ៍ប្រដាប់អាវុធដែលបានចាប់ផ្តើមនៅថ្ងៃទី២៤ ខែកក្កដា ឆ្នាំ២០២៥ នៅតំបន់ប្រាសាទតាមាន់ធំ មុនរាលដាលទៅកាន់តំបន់មួយចំនួនតាមបណ្តោយព្រំដែនកម្ពុជា-ថៃ។ ហេតុការណ៍នេះបានបង្កឱ្យមានការបាត់បង់អាយុជីវិត ការរងរបួស ការបែកបាក់គ្រួសារ និងការខូចខាតទ្រព្យសម្បត្តិជាច្រើន ព្រមទាំងបន្សល់ទុកស្នាមរបួសផ្លូវចិត្តដល់ប្រជាពលរដ្ឋជាច្រើន។ មួយឆ្នាំបានកន្លងផុតទៅ ប៉ុន្តែការចងចាំអំពីផលប៉ះពាល់នៃសង្គ្រាមនៅតែដក់ជាប់ក្នុងចិត្តប្រជាពលរដ្ឋ។ ទន្ទឹមនឹងនេះ ក្តីប្រាថ្នារបស់កុមារភៀសសឹកក្នុងការវិលត្រឡប់ទៅសិក្សាវិញ ក៏ក្លាយជានិមិត្តរូបនៃក្តីសង្ឃឹម សន្តិភាព និងអនាគតដ៏ល្អប្រសើរសម្រាប់កម្ពុជា។ រាជរដ្ឋាភិបាល និងប្រជាជនកម្ពុជាបន្តប្តេជ្ញាថែរក្សាសន្តិភាព ស្ថិរភាព និងការពារអធិបតេយ្យភាពជាតិ ដើម្បីកុំឱ្យព្រឹត្តិការណ៍ដ៏ឈឺចាប់បែបនេះកើតឡើងម្តងទៀត៕ ដោយ៖ ប៉ៃ សុឃីម