យុវតីកម្ពុជា Helene Kouch ទទួលបានសញ្ញាបត្រអនុបណ្ឌិតច្បាប់ពីសាកលវិទ្យាល័យ Cambridge

នាពេលថ្មីៗនេះ យុវតីកម្ពុជា Helene Kouch បានឱ្យដឹងថា នាងបានបញ្ចប់ការសិក្សាពីសាកលវិទ្យាល័យ Cambridge នៅចក្រភពអង់គ្លេស ដោយទទួលបានសញ្ញាបត្រ Master of Law (LLM) និងជាសមាជិកនៃមហាវិទ្យាល័យ Clare។ ក្នុងសេចក្តីថ្លែងការណ៍ផ្ទាល់ខ្លួនជាសាធារណៈ នាងបានអះអាងថា នាងជាជនជាតិខ្មែរដំបូងគេដែលទទួលបានសញ្ញាបត្រអនុបណ្ឌិតច្បាប់ពីសាកលវិទ្យាល័យ Cambridge។ Helene Kouch មានមូលដ្ឋានសិក្សារឹងមាំ ដោយបានបញ្ចប់ការសិក្សាថ្នាក់បរិញ្ញាបត្រផ្នែកច្បាប់ពីសាកលវិទ្យាល័យ Manchester នៅចក្រភពអង់គ្លេស ជាមួយលទ្ធផលល្អប្រសើរ។ ក្នុងអំឡុងពេលសិក្សានៅបរទេស នាងបានបង្ហាញសមត្ថភាពល្អលើផ្នែកជាច្រើន និងចូលរួមយ៉ាងសកម្មក្នុងការងារសង្គម និងកិច្ចការនិស្សិត។ តាមសេចក្តីរាយការណ៍ នាងបានក្លាយជាទូតសុឆន្ទៈនៃសាកលវិទ្យាល័យ Manchester ក្នុងឆ្នាំ ២០២៣។ នាងបានឱ្យដឹងថា ក្នុងឆ្នាំ ២០២៥ នាងទទួលបានការសរសើរក្នុងកម្មវិធីពានរង្វាន់ «Volunteer of the Year Award» របស់សាកលវិទ្យាល័យ សម្រាប់ការងារស្ម័គ្រចិត្តរបស់នាង។ ពីឆ្នាំ ២០២៤ ដល់ឆ្នាំ ២០២៥ នាងក៏បានធ្វើជាអនុប្រធានសមាគមនិស្សិតខ្មែរនៅចក្រភពអង់គ្លេស ដើម្បីជួយសម្របសម្រួលកិច្ចការពាក់ព័ន្ធនឹងនិស្សិតដែលសិក្សានៅបរទេស។ តាមសេចក្តីរាយការណ៍ កន្លងមក Helene Kouch ធ្លាប់ទទួលបានអាហារូបករណ៍ពីសាកលវិទ្យាល័យល្បីៗនៅបរទេស រួមមានវិទ្យាស្ថានទំនាក់ទំនងអន្តរជាតិរដ្ឋមូស្គូ នៅប្រទេសរុស្ស៊ី និងសាកលវិទ្យាល័យ Chulalongkorn នៅប្រទេសថៃ។ ចំពោះអនាគត នាងបានបញ្ជាក់ថា នឹងបន្តពង្រឹងចំណេះដឹង និងយកអ្វីដែលបានសិក្សាទៅអនុវត្ត ដោយប្រើចំណេះដឹងជំនាញ និងបទពិសោធន៍ជាក់ស្តែង ដើម្បីរួមចំណែកដល់ការអភិវឌ្ឍប្រទេសកម្ពុជា។ សាកលវិទ្យាល័យ Cambridge ត្រូវបានបង្កើតឡើងនៅឆ្នាំ ១២០៩ ហើយតែងស្ថិតក្នុងចំណោមសាកលវិទ្យាល័យកំពូលៗរបស់ពិភពលោក ដោយការចូលរៀនសម្រាប់និស្សិតអន្តរជាតិមានការប្រកួតប្រជែងយ៉ាងខ្លាំង។