លោក មីន អ៊ុងឡាំង អញ្ជើញដល់កម្ពុជា ដើម្បីជួបសម្តេចតេជោ ហ៊ុន សែន និងសម្តេចធិបតី ហ៊ុន ម៉ាណែត

យោងតាមសេចក្តីប្រកាសរបស់ក្រសួងការបរទេស និងសហប្រតិបត្តិការអន្តរជាតិកម្ពុជា ចុះថ្ងៃទី១០ ខែកញ្ញា ប្រធានាធិបតីមីយ៉ាន់ម៉ា លោក មីន អ៊ុងឡាំង នឹងបំពេញទស្សនកិច្ចផ្លូវរដ្ឋនៅកម្ពុជា ចាប់ពីថ្ងៃទី១១ ដល់ថ្ងៃទី១២ ខែកញ្ញា តបតាមការយាងរបស់ព្រះករុណា ព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រនៃកម្ពុជា។ ក្នុងអំឡុងទស្សនកិច្ច លោក មីន អ៊ុងឡាំង នឹងជួបសម្តេចតេជោ ហ៊ុន សែន ប្រមុខរដ្ឋស្តីទីកម្ពុជា និងជួបពិភាក្សាទ្វេភាគីជាមួយសម្តេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា។ ភាគីទាំងពីរនឹងពិភាក្សាអំពីការពង្រឹងទំនាក់ទំនងកម្ពុជា–មីយ៉ាន់ម៉ា ការពង្រីកកិច្ចសហប្រតិបត្តិការដែលផ្តល់ផលប្រយោជន៍ទៅវិញទៅមក ព្រមទាំងបញ្ហាតំបន់ និងអន្តរជាតិដែលមានការយកចិត្តទុកដាក់រួម។ តាមកម្មវិធី លោក មីន អ៊ុងឡាំង ក៏នឹងអញ្ជើញដាក់កម្រងផ្កានៅវិមានឯករាជ្យ និងព្រះបរមរូបព្រះករុណា ព្រះបាទសម្តេចព្រះ នរោត្តម សីហនុ ព្រះបរមរតនកោដ្ឋ នៅរាជធានីភ្នំពេញផងដែរ។ ក្រសួងការបរទេសកម្ពុជាបានបញ្ជាក់ថា ទស្សនកិច្ចនេះមានគោលបំណងពង្រឹងបន្ថែមទៀតនូវចំណងមិត្តភាពរវាងប្រទេស និងប្រជាជនកម្ពុជា និងមីយ៉ាន់ម៉ា។ ប្រទេសទាំងពីរបានបង្កើតទំនាក់ទំនងការទូតជាផ្លូវការនៅថ្ងៃទី១២ ខែកក្កដា ឆ្នាំ១៩៥៥។