«យុគសម័យអគ្គិសនី»របស់កម្ពុជាមកដល់ហើយ! ចំនួនចុះបញ្ជីលើសពី ២២.០០០ គ្រឿង

ទីផ្សារយានយន្តអគ្គិសនីនៅកម្ពុជាកំពុងបន្តកម្រិតកើនឡើង។ គិតត្រឹមខែសីហា ឆ្នាំ២០២៦ ចំនួនយានយន្តអគ្គិសនីដែលបានចុះបញ្ជីទូទាំងប្រទេសសម្រេចបាន ២២.៧៩៣ គ្រឿង។ ជាមួយនឹងការយកចិត្តទុកដាក់ និងការទទួលយកយានយន្តអគ្គិសនីរបស់ប្រជាពលរដ្ឋកាន់តែច្រើនឡើងៗ ការធ្វើដំណើរបែបបៃតងកំពុងជ្រាបចូលទៅក្នុងគ្រួសារកម្ពុជាកាន់តែច្រើនឡើង។ ពីទិដ្ឋភាពប្រភេទយានយន្ត រថយន្តអគ្គិសនីដែលបានចុះបញ្ជីបច្ចុប្បន្នមានចំនួនច្រើនបំផុត សរុប ១៦.៩២៦ គ្រឿង។ ម៉ូតូអគ្គិសនីមាន ៤.៩៧៤ គ្រឿង ហើយត្រីចក្រយានយន្តអគ្គិសនីមាន ៨៩៣ គ្រឿង។ លោក ផន រឹម បានឲ្យដឹងថា ការប្រើប្រាស់យានយន្តអគ្គិសនីប្រចាំថ្ងៃមានតម្លៃទាបបើធៀបនឹងយានយន្តប្រភេទផ្សេង បទពិសោធន៍ជិះមានភាពផាសុកភាព ព្រមទាំងអាចកាត់បន្ថយការបញ្ចេញឧស្ម័នពុល។ កត្តាទាំងនេះកំពុងជំរុញឲ្យអ្នកប្រើប្រាស់បង្វែរមកយានយន្តអគ្គិសនីបន្តបន្ទាប់។ ក្នុងរយៈពេលប៉ុន្មានឆ្នាំចុងក្រោយនេះ រដ្ឋាភិបាលកម្ពុជាក៏បានបន្តបង្កើតលក្ខខណ្ឌដល់ការអភិវឌ្ឍន៍យានយន្តអគ្គិសនី។ ក្នុងឆ្នាំ២០២៤ រដ្ឋាភិបាលបានដាក់ចេញនូវគោលនយោបាយជាតិស្តីពីការអភិវឌ្ឍន៍យានយន្តអគ្គិសនីឆ្នាំ២០២៤—២០៣០ ដោយជំរុញការពេញនិយមនៃយានយន្តអគ្គិសនីតាមរយៈការអភិវឌ្ឍន៍វិស័យ និងការកសាងហេដ្ឋារចនាសម្ព័ន្ធ។ ទន្ទឹមនឹងនេះ ការសាងសង់សេវាកម្មសាកថ្មក៏កំពុងត្រូវបានជំរុញជាបណ្តើរៗ ដើម្បីផ្តល់ការគាំទ្រផ្នែកហេដ្ឋារចនាសម្ព័ន្ធដល់កំណើនចំនួនយានយន្តអគ្គិសនី។ ជាមួយនឹងការគាំទ្រពីគោលនយោបាយ ភាពពេញលេញនៃបណ្តាញសាកថ្ម និងការទទួលយកពីអ្នកប្រើប្រាស់កាន់តែច្រើនឡើង ចំនួនយានយន្តអគ្គិសនីនៅកម្ពុជាត្រូវបានរំពឹងថានឹងបន្តកើនឡើងទៀត។ សម្រាប់កម្ពុជាដែលកំពុងជំរុញការផ្លាស់ប្តូរថាមពល យានយន្តអគ្គិសនីមិនត្រឹមតែជាការផ្លាស់បូរទម្រង់នៃការធ្វើដំណើរប៉ុណ្ណោះទេ ប៉ុន្តែក៏ក្លាយជាផ្នែកសំខាន់មួយក្នុងការជំរុញការអភិវឌ្ឍន៍ដឹកជញ្ជូនបៃតងផងដែរ។