ឃាត់ខ្លួននាយកសាលាបឋមសិក្សាម្នាក់ រៀបចំបញ្ជូនទៅតុលាការ ក្រោយសង្ស័យបៀតបៀនកេរ្តិ៍ខ្មាសសិស្សស្រីអាយុ ១៣ឆ្នាំ ក្នុងបន្ទប់ទីចាត់ការ

កម្លាំងអធិការដ្ឋាននគរបាលស្រុកសំពៅលូនខេត្តបាត់ដំបង សហការជាមួយប៉ុស្តិ៍នគរបាលរដ្ឋបាលតាស្តា បានកសាងសំណុំរឿង ដើម្បីបញ្ជូនខ្លួនជនសង្ស័យជានាយកសាលាបឋមសិក្សាម្នាក់ ទៅកាន់សាលាដំបូងខេត្តបាត់ដំបង ពាក់ព័ន្ធករណី «ប្រទូស្តកេរខ្មាសមានស្ថានទម្ងន់ទោស» លើកុមារីជាសិស្សសាលា។ ជនសង្ស័យមានឈ្មោះ ជឹង ចាន់ធឿន (ហៅ វិត) អាយុ ៥១ឆ្នាំ ជានាយកសាលាបឋមសិក្សាកូនភ្នំ៣២ រស់នៅឃុំតាស្តា ស្រុកសំពៅលូន ខេត្តបាត់ដំបង។ យោងតាមពាក្យបណ្តឹងរបស់អាណាព្យាបាលកុមារីរងគ្រោះ (ឈ្មោះ រ.ស.ម អាយុ ១៣ឆ្នាំ) បានឱ្យដឹងថា កាលពីវេលាម៉ោងប្រហែល ១៤:២០នាទី ថ្ងៃទី១៧ ខែកញ្ញា ឆ្នាំ២០២៦ ជនសង្ស័យបានហៅក្មេងស្រីរងគ្រោះចូលទៅក្នុងបន្ទប់ទីចាត់ការ រួចបង្ខំឱ្យលាត់អាវឡើងលើ ដោយយកខ្សែម៉ែត្រមកវាស់ដើមទ្រូង ប្រើដៃស្ទាប និងយកទូរស័ព្ទដៃថតរូបថែមទៀតផង។ ក្រោយទទួលបានបណ្តឹង កម្លាំងសមត្ថកិច្ចបានបើកការស្រាវជ្រាវ និងឈានដល់ការឃាត់ខ្លួនជនសង្ស័យនៅព្រឹកថ្ងៃទី១៨ ខែកញ្ញា ឆ្នាំ២០២៦ នៅចំណុចភូមិកូនភ្នំខាងត្បូង។ យោងតាមការរាយការណ៍របស់សមត្ថកិច្ច ជនសង្ស័យបានសារភាពថា ខ្លួនពិតជាបានប្រព្រឹត្តសកម្មភាពប្រទូស្តកេរខ្មាស និងថតរូបអាសអាភាសលើសិស្សស្រីរងគ្រោះពិតប្រាកដមែន។ បច្ចុប្បន្ន ជនសង្ស័យកំពុងស្ថិតក្នុងនីតិវិធីបញ្ជូនទៅតុលាការខេត្តបាត់ដំបង ដើម្បីចាត់ការតាមផ្លូវច្បាប់៕ដោយ៖ ប៉ៃ សុឃីម