សម្តេចធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា នៅថ្ងៃទី២៧ ខែតុលា ឆ្នាំ២០២៦ បានជួបសំណេះសំណាលជាមួយលោកគ្រូ អ្នកគ្រូបង្គោល ព្រមទាំងនាយក និងនាយិកានៃសាលារៀនចំនួន ១៦០សាលា ដែលជាសាលាគោលដៅរបស់គណៈកម្មាធិការជាតិជំរុញការអនុវត្តវិធានការគន្លឹះក្នុងវិស័យអប់រំ (គ.វ.អ.) ដើម្បីពិនិត្យវឌ្ឍនភាពការងារ និងស្វែងរកដំណោះស្រាយលើបញ្ហាប្រឈមក្នុងការអនុវត្តកម្មវិធីសិក្សាថែមម៉ោង។
ជំនួបនេះបង្ហាញពីការយកចិត្តទុកដាក់លើការលើកកម្ពស់គុណភាពអប់រំ តាមរយៈការស្តាប់ដោយផ្ទាល់នូវលទ្ធផលការងារ បញ្ហាប្រឈម និងបទពិសោធន៍ពីអ្នកអប់រំដែលកំពុងអនុវត្តការងារជាក់ស្តែងនៅតាមសាលារៀន។
ក្នុងឱកាសនេះ ការពិភាក្សាផ្តោតលើការវាយតម្លៃលទ្ធផលនៃការអនុវត្តកម្មវិធីសិក្សាថែមម៉ោង និងការស្វែងរកវិធីសាស្ត្របន្ថែម ដើម្បីជំរុញការអប់រំនៅកម្រិតមូលដ្ឋានឱ្យកាន់តែមានប្រសិទ្ធភាព ព្រមទាំងធានាឱ្យការបង្រៀន និងរៀនឆ្លើយតបនឹងស្តង់ដាបណ្តុះបណ្តាល និងគុណភាពអប់រំដែលបានកំណត់។
ការយកចិត្តទុកដាក់លើវិស័យអប់រំ គឺជាកត្តាសំខាន់ក្នុងការអភិវឌ្ឍធនធានមនុស្ស និងត្រៀមលក្ខណៈដល់កុមារ និងយុវជនសម្រាប់អនាគត។ ការលើកកម្ពស់គុណភាពអប់រំមិនត្រឹមតែផ្តោតលើចំណេះដឹងប៉ុណ្ណោះទេ ប៉ុន្តែថែមទាំងរួមបញ្ចូលការបណ្តុះឥរិយាបថល្អ សីលធម៌ វិន័យ និងស្មារតីទទួលខុសត្រូវរបស់សិស្សានុសិស្សផងដែរ។
ជាមួយគ្នានេះ ការចូលរួមពីថ្នាក់ដឹកនាំសាលារៀន និងគ្រូបង្រៀន មានសារៈសំខាន់ក្នុងការកំណត់បញ្ហាជាក់ស្តែង និងជំរុញការកែលម្អការបង្រៀនឱ្យកាន់តែប្រសើរ ដើម្បីឱ្យសិស្សានុសិស្សនៅតាមសាលារៀនទូទាំងប្រទេសទទួលបានការអប់រំប្រកបដោយគុណភាព និងសមធម៌។
ជំនួបនេះជាឱកាសមួយសម្រាប់ពង្រឹងការអនុវត្តវិធានការគន្លឹះក្នុងវិស័យអប់រំ និងជំរុញកិច្ចសហការរវាងអ្នកពាក់ព័ន្ធ ដើម្បីឈានទៅរកការកែលម្អគុណភាពសិក្សា និងការអភិវឌ្ឍធនធានមនុស្សប្រកបដោយចីរភាពនៅកម្ពុជា៕ ដោយ៖ សុភ័ក្រ្ត
